今日心情好到爆~~~
另外, 我北海道之旅既野都攪得七七八八...黎緊希望一切順利 (感謝主!)
再黎, 平時用新世界電訊打長途去Dubai 要HK$2x/mins, 今日諗住打去CHECK到現時為止, 究竟打左幾錢? 一CHECK, HK$798!!!! 下, 我有冇聽錯呀?? 我諗住無四五千都走唔甩... 一問之下, 原來由五月十一日到六月二十二日, 打去杜拜做緊優惠, 只須HK$3.xx/mins, 所以.... 慳返好多好多呀~~ (再一次感謝主!!)
最後最後,, 緊係約左好耐既BLOG友聚會啦, 終於等到呢一日~~~ 有GG x 2 & Karen!! 今次約係銅鑼灣Time Square 食通天 ---- 金滿庭 (麻煩晒GG book定位... 仲要好細心咁BOOK左好多間俾我地揀!)
我地真係好勁!!! 我地由六點半坐低食飯.. 食到成十點幾十一點先肯走... 你話女人幾多野講!!!
今日同大少有少少argue, 雖然無損大家感情... 但心情唔多唔少都受到影響!!
分開兩地最難頂既係有問題唔可以面對面傾, 係電話到都唔傾得耐(因為打長途去杜拜每分鐘2X蚊!!), 人與人缺乏溝通, 就最容易有磨擦 (尤其最近要為去旅行既事而煩惱!)
收線個一刻, 我即時大小姐脾氣上身... 毫不留情將電話飛落地下!
細心諗返頭先大家既對話... 諗諗下, 想起神!
係櫃筒攞返本聖經出黎, 想搵返愛的真諦段經文...
我好耐無睇聖經, 所以唔記得係邊...
有意無意, 神好似先安排呢段經文俾我,, 睇完之後.. 再細心回想.. 我既怒氣完全熄烕, 相反, 覺得自己好差勁!
馬太福音 第七章3-4節
為什麼看見你弟兄眼中有刺, 卻不想自己眼中有梁木呢?
你自己眼中有梁木, 怎能對你弟兄說 : 容我去掉你眼中的刺?
唔好講人地... 我先睇返自己先... 我絶對唔係一個好人, 我有大把缺點, 鐘意發小姐脾氣, 扭計, 小氣, 又懶, 大洗, 無記性, 唔上心, 唔上進, 唔識體諒別人, 霸道, 野蠻, 幾十樣缺點數之不盡... 我自己又改善左幾多? 點解我唔檢討下自己既缺點, 反而去挑剔別人既不是呢?
神既話語真係好啱, 感謝主提醒左我...
每對情侶總有意見分歧既時候... 每個人總有自己既個性特質, 無可能完美...
藉此想同大家分享以上經文, 希望大家都有所領悟!
繼續介紹返九龍城美食....
食完一餐美味既晚飯, 當然唔少得要配合去食埋糖水先為之Very Good!
途經發現一間叫做'金滿堂'(希望我無記錯名) 既甜品屋, 招牌個selling point寫住低糖, 少甜糖水..
就係咁吸引左我地呢班又怕肥, 又要食既路人甲乙丙埋去
(健康真係好緊要, 依家個個都好著重!!)相討一輪,, 叫左以下幾款甜品 (你知我地D女仔好三心兩意, 又想試呢樣, 又想食個食~~~
)
樣樣甜品都好好... 仲有好多款我地都想試但又係個句- 個肚無位擠~~ 呢間極力推介, 下次一定要翻炒
今日要介紹一間超好味又抵食既泰國菜館 (越多人去食越抵食!)
地點位於九龍城南角道
金麥泰泰國菜館 , 全店均由泰國人in charge! 所以好正宗架!!
呢間菜館我自己都去過好多次... 亦都介紹唔少朋友去食... 個個都話好味!!
泰式生蝦 (佢地自稱日日馬來西亞空運到港!) 我唔理邊到運黎啦.. 好味就得啦~~ 正!
泰式雜錦拼盤 , 蝦餅好好味~~
呢隻菜係我朋友特別order... 佢話係地道泰式菜館先有得食... 好似叫做野菜?? 唔sure...但食落又好好味喎!
主菜.... 咖喱炒蟹!! 超好味既蟹加上佢既汁(平時唔好蟹, 因為懶得剝殼既我, 都係咁食蟹!!) 我地仲order左2客蒜蓉包黎配d汁呀!! 真係好味到絶頂! 
蒜蓉包... 即叫即焗, 好鬆脆!
牛肉串燒.... 好嫩口, 一D都唔'un'
好好味既豬頸肉... 又肥又爽口! 配埋個辣汁... 一流呢~~
泰式炒青口... 我鐘意食個d香葉.. 好正呀!!
泰式炒河 ... 不過不失啦!我又要讚一次... 香港食野真係又抵又好味呀~~~
