少爺威威~~

今日介紹一個樣子可愛得很, 一望到佢, 即刻令我心都軟埋既小朋友~~~

牠的名子叫 ------ 威威(兩個月大)!!!

朋友早在一兩個月前已經話我知佢屋企將會有多隻貓貓新成員 (原本佢屋企已經有兩隻!!)

收到照片後~~

嘩.. 真係超cute呀!! 好想攬住佢唔放呀~~~ BB..BB.. 無論任何BB既物體都令我肉緊非常 (老鼠及昆蟲界除外!)

威威...威威,, 少爺威威..你真有福,, 跟著我朋友呢一家~~~ (佢地夏天出街都會開冷氣俾貓涼!!  又有成千幾呎屋俾佢地活動... 仲唔幸福呀!!)

噢.. 威威... 我返HK好想去探你.. 你唔好大得咁快呀~~

以前既我係唔鐘意貓.. 只愛狗!! 因為細細個有一次係屋企樓下買完雪條,, 一路食一路行返屋企時...

突然有隻貓係轉角位以急速跑出? 嚇我一個措手不及... 兩動物(我&貓)迎面相撞... 最後, 我都唔記得當時實際情形係點交接..

總之我係成個人扒左落地下.. 支雪條唔知飛左去邊??

所以,, 我對街貓一直感覺唔好.. 總覺得佢地不懷好意~~~

但自從人大左, 眼界相對擴大後..發現原來有好多人都鐘意養貓.... 而且貓貓都唔係我想像中咁難接受..

我愛佢既高倣, 愛佢既驕嗲, 更愛佢安靜既一面...

漸漸,, 我發覺我依家愛貓多過愛狗!

 

提外話一則 :

幾年前, 係銅鑼灣一間賣衫既店鋪見到有一隻超級迷你松鼠狗... 可愛到極點!!! 佢既size, 我想同威威差不多... 但已是九歲之人(狗)!!!!  我問個老板娘..你隻狗係邊到買架,, 好得意呀?? 幾錢呀??  佢答 : 我係加拿大買架,, 依家回流咪帶埋佢返黎囉... 都萬幾蚊一隻架!!! 跟住bilibala..係咁講~~~

當我興致勃勃返屋企見到親愛的爸爸... 同佢講 : Daddy..我今日見到隻迷你狗好得意架... 超細隻.. 每日食三粒狗糧咋!! 連d 屎都係好細條唔嗅架... 不如俾我養返隻呀~~

之後我Daddy好認真咁講 : 呢d所謂既迷你狗... 咪即係侏儒!!!!  你諗下如果你帶佢出去散步.. 其他狗見到佢, 係咪等於我地見到朱儒咁~~~ 好傷雙狗既自尊心架!!! 成日掛住得意得意.. 你有冇諗過隻狗既感受呀? 你見到d侏儒.. 你會唔會覺得佢得意呀??

佢講完一大段佢既道理... 我無聲出... 走返入回已房! 

夏の湯飯

依家d天氣熱到屎 (尤其我地呢邊!! 日日高企41度

)   企係街到唔洗五分鐘, 個額頭都已經出晒汗!!!

好彩既係.. 呢邊既building興裝中央冷氣... 所以就算係廚房煮飯, 都有冷氣涼住!  

  之但係有時對住個火爐,, 就算個冷氣係你面前,, 都會熱到出晒汗架~~

好似日本主婦話齋, 天口氣, 都無乜謂口煮飯/食飯!!  不過我就特別怪~~  天口越熱, 我就特別鐘意煮熱辣辣既湯飯!

雖然食湯飯會令到個人好鬼熱,, 食完好多時都一身汗!

但係煮湯飯有兩個好處係... 簡單, 快捷! 

只需要落適當材料滾個靚湯出黎... 即可!!! 咁樣,, 我咪唔洗響個廚房焗咁耐囉...

而且仲有另一個最吸引既地方係就係  --------------可以洗少好多碗碟!!!

呢個係冬瓜粒海鮮湯飯,, 冬瓜滾湯好好味... 再加D海鮮料.. 簡簡單單又一餐!!!

雖然簡單, 但我D蝦都好大隻架!!! 絶不欺場~~

好多人話食湯飯無乜益, 容易胃痛!! 但我自己認為, 只要慢慢咀嚼, 唔好太心急吞落肚... 呢款咁健康既湯飯, 又點會無益呢??   你地話係咪??

忍無可忍!

日式芝士棉花蛋糕

尋日終於忍唔住... 要出手啦!!!

點解會咁失敗忍唔住架??

原因有好多.... (見到個個都整美味甜品, 係佢地引我囉, 衰到死!!!   因為今日做左好多運動, 咪俾自己relax下囉.. 因為..因為.. 因為有好多奶剩, 再唔用會過期架.... 仲知好多原因啦~~

)

啊~~~搵到一個最俱說服力的

是緣我地尋晚會去打golf.. 等大少放工後, 便會急急出發, 一打更是兩個鐘之多...

經過前幾次經驗,, 打完波後會又攰又餓... 之後進食, 好容易唔知飽食多左!

所以, 今日準備小小點心醫住個肚先!  出發前, 食兩件打底先, 打完波咪唔會餓到胃都痛囉!!

我呢個解釋係咪好合理呢!!!!!

算啦~~ 我知你地睇穿晒我架啦!!  真正原因得兩個字.... 為食!  (我認囉~~

)

今次用新買既心心模黎焗, 諗住方便係車到食用,, 但未上車.. 係屋企已經兩啖食晒lu~~

(焗既時候火力over左,, 攪到個心裂開

出爐時收縮,, 便晒皺皮阿婆!)

細細隻, 食2隻都唔過份姐!  

睇下佢個texture 似唔似洗碗海棉.. heeeeeeeeeee

做開當然唔會做咁少... 剩餘物資再焗個大既,, 聽日可以請人食!!!

軟棉棉既棉花芝士蛋糕,, 真係好吸引架!!

食譜請Click呢到