承熹&采霖 (June)

傻豬妹妹又同大家見面

我覺得妹妹既生長反應無哥哥咁早熟

承熹以前好細個已經識揸住啲牙膠黎講, 或者對於一啲玩具都會好有反應

妹妹剛好相反, 懵下懵下咁, 哈!


多謝茄姨姨送既香蕉牙膠

妹妹仲未好識揸實啲野放入口, 每次好快就會鬆手, 繼而跌左. 所以佢都係覺得食自己隻手指多方便啲

傻豬妹咬咬下訓著左



承熹之前一直返開CPDA既playgroup, 我覺得呢間playgroup唔錯, 導師有愛心, 承熹每次返都好開心

不過返埋今個月就停啦, 因為七八月參加左另一個音樂班, 承熹好鐘意音樂跳舞, 俾佢試下搵唔搵到佢想學既樂器

八月尾開始除左返幼兒園(N班)外, 仲會參加教會既Awana, 類似童軍制既形式, 但當中包含聖經既教導! (好期待~)

妹妹依家無之前訓咁多, 仲開始識得投訴! 例如佢係highchair, 但我地走開左去食飯或唔係佢視線範圍, 佢就會大叫, 叫你返黎倍佢傾計, 或者要你推埋去食飯枱, 等佢可以望到我地

依家最好玩係, 當你一同佢有眼神接觸, 佢就會笑! 尤其朝早起身, 佢係床仔望住我, 就會即刻笑得好開心... 冧死媽媽~

再一次溫馨提示: 懷孕期間, 不妨多吃乳酪, 可以令到BB骨骼強壯啲! 我陀住哥哥同阿妹時都有食, 一星期隔日或日日食, 所以哥哥同妹妹兩個月已經好硬淨, 擺百日宴個個親戚朋友都話佢地唔似得三個月, 條頸仔已經好夠力!

P.S. 我係一個唔戒口既孕婦, 在我立場只要乾淨既野我乜都有食, 但當然唔係狂食啦! e.g. 咖啡, 沙律, 魚生, 甚至生蠔 (呢個我都知有啲過份)

除左因為我為食外, 我覺得有時太過戒口反而唔好, 因為註冊營養師分享過, BB係唔識分好味同唔好味, 佢地只係會分個隻味道係熟悉定唔熟悉

所以, 好多時偏食既BB係因為媽媽本身偏食, 有好多食物佢地係無試過既(佢地經胎水係懂得分辨到食物既味道), 所以當佢地可以食固體食物時就會識得選擇

相反, 經常接觸唔同種類食物既BB, 會較願意多常試唔同種類既食物!

我唔可以100%肯定呢位營養師講既係啱, 不過以我經驗, 承熹確係大部份食物都肯食, 而且唔會話唔鐘意食,

而妹妹, 我雖然未知, 但好感恩, 係我無戒口情況底下, 佢兩個啲皮膚狀況都係好好, 無話敏感或出疹 (因為我亦都聽話有人話媽媽戒得越清, BB既抵抗力會越弱, 因為無乜接觸過)

不過, 呢啲都係只作參考, 個個人唔同體質, 好難講!
 
其實講咁多我都想帶出, 做媽媽緊張自己小朋友係理解的, 不過有時放鬆啲去面對, 唔好俾太大壓力自己, 偶然放肆一下令自己開心都唔係壞事..
 

我覺得胎教都好有用, 我陀住佢地時都不停叫佢地要乖乖地, 要肯食奶, 自己訓, 唔好成日喊, so far都OK

但千算萬算, 算漏左唔記得叫佢地唔好食手指!!!!!