就快滿月啦!

小魔怪仲有幾日就滿月啦!

我地唔會擺滿月酒, 因為小魔怪太細個, 只係會訓同食, 所以擺滿月酒似乎無乜意思, 都係等到一百日先擺, 到時佢應該會精靈 d, 抵抗力都會好d, 而我都應該有精神返d掛?!

諗返起呢段照顧佢既時間, 真係有氣餒, 有忟憎, 有痴左線既時候. 可能之前實在太睇小一個初生嬰兒既威力, 亦都高估左自己既能力... 原來湊一個bb係咁辛苦!

不過回顧返呢段日子, 我好感恩... 因為神賜左一個小生命俾我地, 賜俾佢健康, 賜俾我地有能力去照顧佢, 呢d日子都係值得, 都係一個好好既回憶!

依家我同大少偶然都會兩個人出街拍下拖, 放低小魔怪俾倍月姨姨睇住先, 但我地兩個都好攪笑, 例如去餐應食飯等緊上菜無野做時, 大家都會攞個電話出黎係咁睇小魔怪d相, 然後一齊笑, 一齊講, 百看不厭!   又或者行行下街大家都會話, 好掛住小魔怪, 不如早d返去囉~

真的, 原來有左小朋友, 大家既心態會唔同晒! 雖然係好辛苦, 但一見到自己個仔/女, 就咩痛苦都忘記晒, 臉上只會掛住幸福既笑容~

小魔怪既喊聲由初初細細聲演變到依家喊到好似拆天咁! 為免佢喊到食晒風入肚, 積晒d啖係氣管到, 所以我都最後都屈服左要俾奶咀佢啜, 奶咀係我地依家既殺手簡, 攪佢唔掂就會出手!

不過就算唔俾奶咀佢食, 佢依家無野做既時候就會將隻手放入口, 佢暫時手腳仲未協調, 好多時都放唔啱位, 成日都食唔到, 笑死我! 但當佢好好彩咁將隻手放正入口, 佢就會好似中左獎咁開心, 係咁起勢啜 ~

大少完全俾呢隻小魔怪征服左... 成日同我掙抱佢! 哼~

以前成日都聽人講唔好抱慣BB, 唔係將來好難湊! 或許呢個說法係正確, 但BB仔呢段時期真係大得好快好快.. (短短三星期我地都覺得佢大個左好多), 呢刻既BB Size係最好抱, 最值得花時間去同佢地建立信任.. 所以我地都好珍惜依家既時刻!

傻b真係好多表情, 好攪笑!!!

屋企越黎越多小魔怪既野... 將來大個d有埋玩具, 間屋應該好難再整整齊齊

Kathy 姐姐送俾小魔怪既"虎仔BOOT", 不過睇怕都無乜機會著!

當bb訓得好林好林既時候, 佢真係完完全全放軟晒!  呢個時候就係我攪攪陣既時間, 幫佢剪指甲, 洗面, 抹咀, 擺pose影相等.. 哈!

好鐘意佢d腳趾, 就好似新車咁, 未落過地行, 皮膚超滑, 零腳枕, 漲卜卜, 好好摸架!

呢隻小魔怪仲有個特質, 就係每當訓係我膊頭時, 佢都鐘意用隻手托住自己個頭黎訓, 有時打側訓覺都係咁, 鐘意用手托住自己個頭, 同之前照4D時既動作一樣, 好攪笑!

前兩日同大少去BB展, 買左呢條孭帶返黎用, 好似唔錯咁, 但我成日擔心對BB腰骨唔好!