久違了一段時間既New York Cheese Cake
大少耐唔耐都會講一句話好想食..
前日終於達成佢既心願, 但係........
噢,, 個面焗燶左,,, 仲要燶得幾過份, 哈哈!!!!!
大少見到第一個反應 : 咦,, 新口味啊?? 面個d係咩黎架? 朱古力??
實在太慚愧,, 無做一排, 竟然如此失手!!!
幸好, 仍然深得大少喜愛, 否則又嘥左三盒Cream Cheese!
2008年10月29日 星期三
永遠做足二百分
依家好似做賊咁, 要等到大少去沖涼, 我先可以借用佢部電腦上黎整整相片&寫blog..
哈,, 個頭叫自己唔好咁沈迷, 呢頭又咁緊張...
學貓姐話齋, 似係我中毒多過部電腦中毒!
呢個晚餐係前晚煮,, 八月攞過黎既帶子終於完部食晒, 雖然一包好似要$198, 但真係物有所價, 有好多粒, 而且口感非常唔錯, 下次返HK要再買啊!!!
特大帶子每次煮四至五粒已經好夠食(二人份), 我見到又想食啊!!!
其實識得買呢D帶子係因為Cindy, 記得以前睇佢個blog, 佢經常會自己落廚煮日式餐俾天皇食,, 係佢介紹呢d特大帶子係吉之島有售.. Cindy, I miss you..
另外令到大少激讚既係呢個"自制磨菇湯", 食譜係跟大少奶既書P. 128
大少從來都無試過咁激昂地讚賞一款湯,,, 佢直程講到話 : 嘩, 真係好正啊!!!!!!!!! (語氣勁強) 呢個湯好掂啊, 你點整架? 呢個湯可以出得大場面招呼朋友無得頂啊~~ 呢個湯出去飲, 可以賣40dhs啊! (下刪50字重覆,, 好好飲啊!!)
見到大少咁興奮, 我當然要扮冷靜... 哈!
但老實講, 原來自家煮既磨菇湯係咁好味, 我真係估唔到... 最正既係, 自己打拌磨菇, 可以唔好打得咁幼細, 飲落仲會有磨菇碎粒既口感.... 真係美味非常!!!! (我唔再讚大少奶本書, 費事又話我賣廣告)
最好笑係大少仲要講句 : 你知唔知你呢餐有幾多分啊 ? (我無佢咁好氣咁望住佢)
大少 : 二....百... 分.... 啊!!!! (加埋手指動作.. haaa)
哈,,, 傻佬,, 好多謝你咁欣賞我所煮既野,, 每次見到你食得咁開心, 我都覺得好開心.. 多謝你!!!
2008年10月27日 星期一
自選動作!
是日晚餐超簡單, 而且美味, 最啱好似我呢d唔係好識煮魚既人, 簡直係驚喜之作! 哈哈哈~ (我太唔知醜!!
)
點解我會咁雀躍?
因為我愛吃魚, 更愛豆腐...
屋企有半磚豆腐未食, 諗緊點煮之際, 俾我諗到將佢同魚二合為一
效果出黎超正, 豆腐吸晒魚汁, 好入味... 所以一定要同大家分享!!!
呢條'咦'名叫Seabean, 中文我唔知係乜, 而且我都唔識分邊條魚打邊條?! 總之望落好似幾新鮮, 應該唔難攪既, 我就會買!
材料 : (我食過後認為加埋紅椒粒會更野味!!)
魚一條
布包豆腐半磚切片
薑&蔥段適量
紅椒切粒
調味料 :
蠔油.... 2湯匙 ; 豉油 ..... 2湯匙 ; 酒 .... 1 湯匙 ; 糖少許 ; 水....一碗 (我太約估返出黎, 大家要自己試味)
做法 :
1) 將魚洗淨抺乾, 係肚上界三刀(以便熟) 酒上鹽備用
2) 落油起獲, 落薑略兜, 再慢慢將魚放入獲
3) 大火煎至金黃, 返轉再煎另一邊
4) 將調味料, 蔥段 &豆腐倒入獲, 蓋上蓋炆兩分鐘, 再反轉魚炆三分鐘 (驚唔熟, 可以用筷字篤一篤睇下穿唔穿得過)
5) 最後調味料應該收汁, 可以試味(唔夠咸加豉油, 太咸就落), 攪掂!
依家開始煮飯都會刻意少糖少油少鹽, 為求健康啊!!!
大家唔洗擔心我啊!
我只係怕自己會容易患上糖尿病, 因為我睇報紙話大肚腩既人比起一般人更易患上糖尿病,, 我自知個肚腩超大, 所以認為為著自己健康著想, 真係要的起心肝開始戎口, 唔好乜都食得咁盡... 仲有要做我至憎既運動! 唉~
2008年10月26日 星期日
馬拉串燒
好耐無post晚餐, 自係香港返黎後, 都無好好咁煮過一餐飯 (慚愧...)
啱啱過左個Weekend去Fish Market & Supermarket大量入貨
誓要好好咁煮餐晚飯俾大少食!
啱啱有同事係馬拉返黎, 佢地竟然好勁咁帶左20串牛肉串燒(生)返黎俾我地, 實在令人太感動!!!!!!!
前者係牛肉串燒, 後者係我地之前食剩既香茅雞翼, 兩樣都好好味!!!!!
馬來西亞最出名既串燒主角不在於肉類上, 而係佢既沙嗲醬呢! 唔係一般既沙嗲醬, 佢地呢種味道食落有花生, 唔會好辣, 香口非常!!! 可以配埋切片青瓜, 一樣係點醬食... 真係好好味架!!!!
真係多謝晒同事們辛苦運返黎!!!!!!!! 
最近開始擔心自己身體狀況, 所以成日要不斷提醒自己要戎口... 希望病魔會遠離我啊!!!!!!
2008年10月25日 星期六
悠閒‧甜蜜
每日最期待既係大少放工時候
每週最期待既係weekend既來臨
放假時可以好悠閒, 可以好甜蜜
悠閒咁訓到自然醒, 甜蜜咁一齊準備早餐, 悠閒咁一齊睇電視劇, 甜蜜咁手拖手行街
一切雖然平淡, 但卻令人安心, 快樂!
大少為我煮既早餐, 有我地至愛Pancake + 太陽蛋
而我, 都為大少沖調一杯香濃咖啡, 係刺激腸臟蠕動既好幫手
大少煎Pancake既技術比好我, 我覺得煎得好靚, 我最鐘意食佢煎既Pancake!!!!!
做女人千祈唔好禁止男人入廚, 只要佢地有心想為你落廚, 就一定要加以支持同鼓勵, 咁樣佢地以後就會好樂意為你效勞架啦! 哈~
依家中東既天氣一日比一日舒服，唔再酷熱, 係秋天既天氣, 呢種天氣大約會維持到出年既三月! 除左藍天白雲外, 仲可以日日睇日落!
我相信呢段時間係杜拜最得人鐘意既時候! 要黎杜拜玩, 都應該盡量揀十至三月喔~
2008年10月23日 星期四
Let's do it!
今日整Peter仔, 原因唔係因為想食Peter, 而係想飲洋蔥湯
但整洋蔥湯無可能夾住食中餐架麻, 見屋企有足夠材料可以起壇, let's do it!
入爐前樣貌~
經過上次既經驗, 今次將份量減左2/3, 將個Peter皮有咁薄碌咁薄, 唔想食厚批啊!
Woo,, 今次個Peter 焗得十分之靚仔, 色水無得頂, 大少都好興奮咁話 : 今次好靚啊!!!
記得上次用茄醬做主題, 味道唔係太出! 今次改用千島醬, 加左大量海鮮雜燴, 磨菇 & 煙三文魚,, 焗完有香濃既海鮮味!! 正正~
主菜其實係洋蔥湯, 一直唔愛洋蔥既我, 自從飲過家姐大少奶做既洋蔥湯, 一試便愛上! 今日就照住佢本書做(P. 132),, 好成功啊~
原來煮到好淋既洋蔥好好味,, 個湯好清, 但片芝士多士就好香口, 形成好大對比, 味道好夾!
我將會陸陸續續跟大少奶本書做出美味食物, 因為佢入面所教既都係簡單方便但又出得大出面既餸,, 啱晒我呢d要求高, 但想付出少既人, 哈哈!!!!
如果你地都想好似我咁練精學懶, 仲唔去書局買"大少奶的自悠煮意生活"!
Pizza 食譜可以睇返呢到, 但我今次得兩個人食, 所以只用1/3既份量!
2008年10月22日 星期三
情有獨鐘
今次係香港返黎, 帶左好多新麵包/蛋糕書, 全部都係購於香港&台灣!
基本上, 我日日對住d書, 真係眼花撩亂...
個心好想每款都試下, 希望有d新突破
可惜唔爭氣既我, 嘴吧只愛鐘情於某幾款
太花巧既蛋糕/麵包反而唔吸引我
所以有時都覺得自己好無謂, 做黎做去都係個幾款
跟本唔需要再買新書, 哈! (但每每見到又靚又詳細既食譜, 我又會愛不釋手)
好耐無做過"蛋糕仔", 真係百吃不厭....
原來最原始, 最清淡既食物先係我既至愛!
一 口 蛋 糕 仔 食 譜 Recipe (我由大少奶到COPY, 大少奶係撰寫自小魚仔, 點都好, 要唔該晒佢兩位!)
材 料 ( 50 - 60 個 份 量 )
無鹽牛油 ( 室温 ) 150 克 ; 砂糖 12 克 ; 蛋黃 3 個 ; 蛋白 3 個 ; 砂糖 102 克 ; 低筋粉 ( 篩好 ) 126 克 ; 發粉 1/2 茶匙
小紙杯模 ~ 適量
做 法 :
(1) 首先預熱焗爐 180 度 火 / 15 分鐘 及 低筋粉 + 發粉 ( 篩好 ) ~ 備 用。
(2) 室温牛油 + 砂糖 (12克) 放入缸內用 (1號速) 打至鬆發 。
(3) 加入蛋黄 ( 分2-3次加入 ) 繼續攪拌至光滑 。
(4) 另外將蛋白放入缸內用 (1號速) 打至發泡，加入砂糖 (102克) 分2-3次加入打至企身。
(5) 用膠挖將蛋黃糊分2-3次加入蛋白糊內輕輕攪拌勻 。
(6) 加入巳薛好低筋粉 + 發粉落去攪拌勻 。
(7) 將麵糊放入唧袋內，然後唧落紙杯仔內 (6-7成滿) ，再入焗爐 (中層) 180度 / 15-20 分鐘。
2008年10月21日 星期二
煨蕃薯
前兩日係supermarket見到疑似紫心蕃薯
依家天氣無咁熱, 之前係香港已經見到有炒粟子車出沒
當時無買黎食, 反而過左黎就好想食煨蕃薯
記得家姐大少奶曾經post過一篇煨蕃薯既食譜
正, 即刻執幾條返去開工試下!
雖然唔係紫心蕃薯, 但煨完出黎香氣撲鼻, 正正同街買既煨蕃薯一樣香啊!!!!
未食既時候好擔心會唔好食, 唔食好既原因唔係個食譜唔好, 只係經常性被呢到既野欺騙, e.g. 三十蚊一粒既芒果, 無芒果味; 六十蚊細細盒既車厘子無車厘子味; 廿蚊兩碌既粟米無甜味!!!! 
煨完切開兩邊, 見到個心唔夠黃, 好淺色, 我都好怕疑似美味既煨蕃薯係無蕃薯味!
你睇, 煨出黎既效果同街買既真係"一模一樣"!!!!!
最後, 個晚我自己一個食左兩條做晚餐, 實在太美味啊!!!!!!!
無論味道同質感, 都無得頂! 大少夜晚返黎我俾左一條佢食, 佢初初都唔太睇好, 但食完第一啖已經話 : 咦,, 正喎!!! 點整架? 可以做得咁似, 咁好味既????
哈, 黎緊呢到冬天, 我又多一款選擇啦!! (Thank you 家姐)
*************************************************************************
食譜 : (Copy from 大少奶)
做法：
蕃薯: 2隻
片糖: 3片, 將3片片糖煲一鍋水，煲蕃薯20分鐘 (**我係香港帶過黎既片糖好珍貴, 所以我只用左一片半, 煲細煲D水, 用煮公仔麵煲)
煲好後抹乾水放焗爐250度焗45分
*每隔15分鐘反一反佢咁就可以均勻地焗
*唔好懶唔做片糖水步驟，煨蕃薯香就係呢個step啊
*我就焗15分鐘既時候再搽一次片糖水，更香
*用不黏布代替錫紙，初初我用錫紙覺得黏底，轉番用不黏布，因為片糖好黏啊
2008年10月20日 星期一
大少奶的自悠煮意生活 -- 讀後感!
啱啱睇完家姐大少奶本書, 由尋晚半夜攞到手, 我已經好急好急咁睇,, 因為我好想知道本書既內容係點??
直到今早連去辦大事都唔捨得放手, 要攞入廁所完成埋佢!
我唔係一個好識用文字表達既人,, 初初見到各姊妹寫既讀後感都深深感到: 嘩,, 寫得好好啊!!! 然後心裡暗想: 點算, 我成日詞不達意, 而且之前都聽到好多關於書既內容,, 變左有好多位都已經有心理準備本書係點, 我仲會唔會有驚喜??
但當我快速睇完本書後, 我原來都有好多野想講.... 因為我真係親身感受到佢地所講既感動位, 而且一樣會邊睇邊笑! (笑係因為佢真係癲架!)
認真講下我既讀後感 : (我會好直接, 唔係做宣傳咁講)
~ 一開始睇個content, 見到有咁多食譜, 我都嚇左一跳!! 原來大少奶收收埋埋放左咁多野落去, 我之前仲以為係散文多, 食譜少!!!!! (因為之前見佢準備呢本書既時候, 又唔覺佢為準備食譜而煩惱)
最開心係見到看似簡單既食譜, 對於我呢d唔算係入廚新手既人黎講, 都學到好多新配搭.. 而且仲要係製作簡易, 色香味俱全~ (無得頂!)
仲有仲有,, 就係本書細心到教埋點樣盡量將D剩餘物資消滅佢, 呢D真係一般煮婦都會遇到既問題啊!!!!
~ 第二, 當我睇到關於佢自己既野時, 我覺得原來呢條友真係有D料到喎!!!!
平時語出驚人, 癲癲得得(平時我係唔會咁直接話佢,, 哈!), 但寫起書上黎竟然有文有路?! 最令我敬佩既係佢竟然可以將癲既神韻帶入書中, 足以令到讀者越睇越有趣, 好想追落去 (幾呷韻)
~ 第三, 當然同好多姊妹既感覺一樣, 感性既大少奶, 令人睇完有窩心, 有溫暖既感覺... 呢種感覺, 係普通既食譜又點可能搵到?!
總括黎講, 呢一本書真係做得好好,, 因為書中既大少奶就係一個真真正正既佢, 完全無掩飾, 零保留! 簡真係老少咸宜, 就算男人都一樣啱睇 (相處之道個part 好有喚醒作用)
唔係做宣傳, 好書就係好書, 買唔買適隨專便!
*********************************************************************
提外話:
To 家姐,
其實最初都有擔心過本書唔會賣得好好,, 始終市面上既食譜書種類實在太多太多, 而且你呢本係散文 + 食譜, 試問除左有睇開你既blog既人知你係乜水外, 坊間又會有幾多人有興趣知道你既事績呢? (但出書係俾自己作為一個好好既回憶, 就算結果係點我都會撐你, 支持你, 叫你放心去做!!)
但老實講, 當我睇完呢本書後, 我完完全全100%放心晒! 因為當我睇既時候, 我不斷remind自己用局外人角度睇(即係當自己唔識你).. 我想睇下會唔會無共嗚, 覺得你亂寫一通?!
當我睇完, 我只有一個諗法 : 得啊! 你同書商都無投資錯誤, 呢本書真係好正~ (我腦內既詞彙有既字唔多, 當我想表達真係好正既時, 我就真係得好正呢個字!!! 敬請見諒!!)
好既說話你應該聽得太多太多,, 所以我都唔再copy!
見到你出到一本咁好既書, 就算無加印, 無大賣, 我都覺得已經係無悔, 只係佢地唔識貨! (當然, 我見到好多人留言話你本書好好賣, 我更加戥你開心!!)
永遠支持你既妹上
2008年10月19日 星期日
快樂不知時日過!
上星期做左呢款牛奶餐包, 貪佢細細隻, 容易食!
原本一心諗住做完可以送俾大少同事一齊享用, 點知做到一半先發現原來呢個麵團係需要放係雪櫃到發酵一晚, 至少18小時!!!
等到佢發酵完成, 大少已經坐緊飛機, 加上五六係假期, 就算拎到返公司都無人吼lu~
呢兩日, 佢就成為左我既午餐同晚餐! 黎用夾蕃茄煙三文魚加芝士, 味道一流~
依家個麵包箱仲有六七隻,, 但放左咁多日, 我又唔想再俾人食, 唯有聽日作最後沖廁同大少一齊食埋佢啦! (不過我諗都好難食得晒~)
********************************************************************************
轉眼間大少今晚就會返黎, 快樂不知時日過!! 好多朋友都好關心我呢兩日做過d乜?
十分感恩既係, 我每晚都好快入睡, 而且一覺訓到大天光, 完全無失眠狀態, 呢樣一定係神既看顧,, 因為我每晚祈禱都希望唔好中途扎醒, 連疴夜尿都唔想! 哈~
雖然我都唔知自己呢兩日做過乜(因為實在過得太快), 除左食訓疴, 就係不停睇電視, 咁啱呢兩晚電視播既movie都幾好睇; 另外就係死死氣走去做運動, 敷mask, 仲有就係出去做Thai Massage! 爽~
就係咁, 不知不覺就過左兩日 (靜靜雞同大家講, 大少唔係到呢兩日, 我有少少少少少覺得... 又幾好喎, 呢兩日唔洗煩煮乜餸, 哈!)
多謝呢兩日同我傾計既朋友, 尤其菇菇姐, Well done, I love yr videos~ haa
Yeah... 終...於... 到...手...啦!!!!!!!!!!
2008年10月17日 星期五
生日飯@JW Marriott
十月份係爸爸生日, 雖然未能夠係正日慶祝, 但臨走前都要同佢食餐好!
JW Dinner Buffet 四五年前同Daddy食過後, 一直都無再黎過, 今次多得阿茄幫我火速book位, 我先可以同家人及大少享受一頓美味晚餐!
但美中不足既係, 十月頭係黃金週, 每逢公眾假期及五六日, buffet均會分兩場, 分別六至八 & 八點半至十點半! 平時食飯都要花上兩小時以上, 何況食buffet?! 大家都無乜時間傾計, 真係係咁密密食, 好似難民咁! 陰功~
如果唔係趕住返杜拜, 唔食就無得食, 我一定唔會揀呢D日子,, 價錢一樣, 但少左兩個鐘! 唉~ (大家放心, 過左黃金週佢地既時間會回復正常!)
剛好buffet主題為"避風塘海鮮", 對於我同大少呢d海鮮迷黎講當然啱晒咀型,, 仲要係避風塘口味, 簡直係開正我地呢d唔能夠經常食到大排檔既人而設!
第一轉, 基本功!
之後就狂攻主題海鮮... 初初都擔心熱葷海鮮會因長期熱住而變得唔"un", 但食落又唔會喎, 樣樣都係非常美味!!! 尤其鮑魚仔, 蒸蟶子同個酥炸蠔(右下) 真係無得頂~ 今次都係第一次食Buffet 會食熱葷多過冷盤!
又係個句,, 唔夠喉啊!!! 得個兩個鐘, 激氣!
湯方面有中湯同西湯(兩款都好好飲), 另外仲有翅食!
食到七點半時, 侍應逐枱通知buffet會係八點完結! OMG~ 我仲未掂我至愛既甜品..
我即刻叫大少同我一齊出去掃貨啊!!! 我誓要試晒咁多款呢~
極力推介 : 個名唔知叫乜, 但應該係拿破崙之類... 超級好味!!!!! 有我至愛既吉士同酥餅,, 我食左三件!
大少獨愛NY Cheese Cake
唔錯既檸檬橽, 酸甜恰當
專為糖尿病人仕而設既無糖芝士蛋糕, DADDY都可以品嚐到甜品!
呢個係....... 唔記得, 應該麻麻!
荔枝果凍, OK 啦!
其他普通既Tiramisu, 朱古力泡夫, 朱古力撻, 西米露等我都有試, 不過無乜特別
咁大個女都係第一次食buffet食到無飽到嘔咁走, Daddy 臨走仲依依不捨望住d食物好無奈咁講 : 啊! 我唔記得飲湯啊!!!!
Daddy, 係我唔好, 下次同你再去食過,, 唔好扁咀! hee
邊走邊呻笨見到對面海夜景真係好靚,, 但手震影得唔好, 唯一影得好少少係呢張咋!
見到呢d美食, 我又好掛住香港.....
訂閱：
文章 (Atom)