打完呢篇blog, 再過兩個鐘就出發坐早機去約旦玩三日兩夜
從來無諗過會去呢d地方, 直到最近confirmed會去, 我先留意下約旦有咩玩! 原來呢個地方係十大世界文化遺產之一, 亦係耶穌為約翰洗禮既地方!
雖然今次未必會去到約旦河, 但可以去到耶穌曾經到過既地方, 個心唔多唔少都有點兒感觸, 好似同神既距離又拉近左! hee....
今次同行有六人, 我地會自己租車暢遊約旦..
對於呢d唔算文明既地方, 唔知會有咩好食.. 所以今日突登做左兩款"乾糧" for 不時之需. 一款係Raspberry Muffin, 另一款就係呢個"栗子包"! 正~
第一次做栗子包, 包底既做法係跟獨角仙(仙姐)既白吐司麵團, 內裡就係栗子蓉+栗子粒做餡...
其實自己未試過食"栗子包", 唔知味道係點?! 但係朋友話栗子包好好味, 咁...我就不妨試下啦!
好耐無post煮飯, 甜品, 麵包既作品...
其實唔係我一直都無做以上既野, 只係依家少左煮飯係事實, 到要煮既時候, 一係就係好普通不過既餸, 費事post ; 一係就有一大堆朋友黎作客, 好難要咁多人等我慢慢影啊!
至於蛋糕麵包一樣, 一出爐已經俾人搶購一空, 根本無時間慢慢好好咁影低, 唉~
攪到我好似好鬼懶咁.. (雖然我真係好懶..哈!)
尋日做左一盤菠蘿包, 個個係到嘈話好耐無食過港式菠蘿包..
好啦好啦,, 做一爐出黎滿足班餓鬼啦! hee
P.S. 但呢位"食神"係一位小妮子,, 又瘦又靚, 係我至討厭個type女仔..哈哈哈!!!!
呢兩個星期突如期來既轉變令我有少少手忙腳亂!
首先無啦啦同朋友仔講下講下又成左團一齊去東京自由人5D4N, 由planning 到confirm晒機票酒店, 前後不足數天!
之後仲好好planning 咁諗住去完東京留係香港等大少返黎再踩去台灣探媽咪... 但尋日又收到Daddy通知要改期早d過去, 依家'o雪' 一聲又要係去東京前先去台灣!!!
咁都未夠,,, 依家變左無得同大少去台灣, 但又想去個short trip, 講講下就話去福岡啦!! (唔好問我做乜唔直接係東京去福岡, 事態突然, 混亂中!!)
Final Itinerary 依家變左 :
由杜拜返香港 ---> 台灣 ---> 香港 ---> 東京 ---> 香港 ---> 福岡 ---> 香港 ---> 杜拜
台灣同東京我唔擔心... 最煩係福岡個程,, 係國泰假期 book左package 包兩晚酒店, 但其餘乜都未攪, 今日上網睇左成日資料睇到眼都花!!!!!!
始終無本書係手, 硬係好似無乜頭緒咁!!!!! 依家要係到誠邀各位幫忙呀,, 如果有人去過福岡玩, 可唔可以提供一下遊記/重要資料俾我啊!! (我地諗住去7D6N, 會租車)
希望有熱心人事伸出援手幫忙,, 萬分感激~~
最近仍然無乜煮飯, 前日做左芝麻包包 (係跟獨角仙食譜加以少少改良)
包質依家軟熟, 唯獨係欠缺好味既黑芝麻醬做饀料, 下次返香港一定要大量入貨!!
呢個張型麵包模係對上係香港時同yy cake一齊去上海街買, 做出黎效果好靚, 我好鐘意呢!!! 勁平, 好似三四十蚊咋~
各位親朋戚友,, I'll be back soon.... 預約接受中, 哈~
原來我只係一時既錯覺, 以為自己除左對pet pet有興趣外其他都提唔起勁
但當我再次做返包包既時候, 發覺我既至愛仍然係包包, 嘻!
好耐無食白吐司, 係香港唔會做呢款包包送俾朋友, 太齋啦.. 只適合係屋企作早餐! 不過越簡單既包包卻越得到我同大少既寵愛
今次呢款白吐司係跟獨角仙既食譜, 但我無用17小時低溫發酵, 改為即時中種發酵, 效果一樣出色~
而且今次焗完出黎效果好靚, 色澤剛好, 每楷大小一致, 好有滿足感!!! ^_^
初時都有少少擔心跟獨角仙既食譜但無用鮮酵母, 效果會唔會略遜一籌?! 但大家睇到相片中包包既質感, 應該都會同我一樣感到滿意!
早餐係每天新開始既第一餐, 一直以來對我黎講都係非常重要!!
服食 (厚吐司 + 沙樂美 + 煎太陽蛋 + 蔬菜 + 香濃咖啡) = 得到 (充滿活力既人生 & 一篤令人舒暢既大便~) 哈!!
食譜來自 : 獨角仙 - 白吐司
啊.... 太耐無蒲頭啦, 真係唔好意思!!!!!!
今次返黎Abu Dhabi後既生活同以往真係大不同, 亦因為咁所以令我無論入廚或上網寫blog既次數都大大減少(但亦有一部份時間去左pet pet 到..heee)
大不同既主要原因係大少係到識左一班係Abu Dhabi做野既"香港人", 一來大家都係來自香港, 實係同聲同氣d; 二來呢班"香港人"當中有男有女, 年紀有老有嫩, 都幾啱傾啱玩! 依家係到既生活變得多姿多采, 每個星期至少都有兩三次聚會 --- 有飯局, 打保齡, 打golf 等...
人始於都係喜歡群體生活, 之前個兩年好多時都係同大少兩個人生活, 偶然同同事食飯, 雖然表面上無乜問題, 但學菇菇姐話齋, 咁既生活始終唔健康~
依家多左同唔同既人接觸, 人都開朗d!!! 另外感受最深都係覺得原來當大家都身處外地既時候, 大家會特別團結及會互相照顧... 我唔知係因為咁啱撞正呢班都係好人定點? 又或者可能呢到生活無香港咁緊張, 所以每個人處事既態度都輕鬆d, friendly d掛? anyway, 感謝主俾我地與到一班夾得到既朋友!
今日一口氣做左兩盤包包, 因為前一晚做過後發現效果唔錯, 可以大量生產送俾人...yeah~
腸仔包真係好好味.. 今次又試新麵粉, 效果仲好過之前個d... 超超超超軟熟!!!!!!!
oh.... 返左黎咁耐第一次整, 買啱麵粉後要大量入定貨!!!
另一盤係肉鬆包... 個面燶左少少, 但好再無影響口感,, 一樣超讚!!! 食飯前大少己經食左一隻半,, 食完飯後佢又食多一隻!!!!!
一口氣做左二十一隻包包,, 晚飯過後即刻送外買俾朋友仔... 其實尋日已經做左一盤, 但已經俾其中一班朋友殺左上黎我屋企ko晒, 所以今日就送俾第二班未試過既朋友~
其實我好開心有人欣賞我整既野食, 希望佢地會真係鐘意食啦~
有個傻人通知我今日係立春, 佢話今日先係新一年既開始, 所以提醒我今日一起身就要對住塊鏡笑, 仲要保持全日心情開朗, 切勿動怒喎~
哈.... 我當然會keep住自己心情開朗啦, 因為我又係半夜焗起我d包包!!!!!!!!
好成功啊,,, 好好味... 你話我點可以唔開心先得!
今次又係跟阿堅既書其中一款 --- 椰汁斑蘭卷
之前用斑蘭葉做過戚風效果唔理想,, 對於班蘭, 有點朿手無策既感覺... 好彩今次一切都尚算順利 (只係忘記左落鹽,, 哈!) 再加埋朋友特別係星加坡買俾我既坤記咖吔醬..呢次個包包真係無敵啊!!! (自己都覺得無得頂~)
半夜一點幾全屋都洋溢著麵包香,, 自己都覺得有d對唔住隔離屋,, 哈哈!!!!
今次個包包唔記得加鹽, 所以發酵程序好似特別快(但大家唔好學我, 因為無加鹽既包好容易過度發酵), 而且好巨型,, 個爐緊緊夠放咋...
噢, 好可愛既椰汁斑蘭卷,, 好香椰汁味, 食落超軟熟, 配埋甜甜既咖吔真係無得頂!!!!
除左要感激仙姐(獨角仙)既書, 亦都對自己既搓包技術多左一份信心...yeah!!!
每次做到成功既包包都好想送俾朋友,, 但包包有限, 朋友眾多,真係好難送晒俾每一位.... 如果屋企有個大爐就好啦!
今次既幸運兒會有專人通知你黎領包....
大家可能睇到有d悶... 日日都係包包!
真係唔好意思... 為左個包鮮酵母 + 團火仍在, 我不得不每日keep住有包包作品出爐~
今次呢款係咖啡麵包, 食譜一樣係參照獨角仙既新書
發酵其間已經聞到好濃既咖啡香.. 咖啡粉o係係sweetie買, 超出味, 好啱用黎做蛋糕/甜點!
包包一如以往, 軟熟非常!!!!! 即使唔返熱, 第二日就咁食都好好味.
daddy今次有投訴啦, 佢嫌咖啡味太濃, 有少少苦喎!!! 我自己都覺得係濃左少少, 或許對一d喜愛咖啡既朋友黎講, 應該會好鐘意~
做完包又攪第二樣野 ---- 木糠布甸(兩款味 - 可可粉 & 綠茶)
白痴既我未做過木糠布甸, 亦無食過,,, 完成後我只係放係雪櫃下層!! 第二日品嚐後感覺怪怪的, 後來先知原來要放係冰格
希望收到既朋友唔會覺得難食... 
一直以來都好想一嚐鮮酵母既威力, 以前無焗爐就話試唔到姐, 今時今日仲等咩? 哼~
但有做開包包既人都知道鮮酵母又大磚但食用期有限, 所以我要係最短既時間內用盡佢啊!!! 
呢幾日不停係屋企焗啊焗啊焗啊~
原先呢款包包係跟獨角仙新出個本書既食譜, 佢係用紫心蕃薯做..靚好多! 可惜我買錯蕃薯, 買左黃心... 所以成個款唔同晒, 第一次用蛋糕模做麵包, 效果好得意!!!
獨角仙所教既發酵係用低溫發酵法, 好處係唔需要一氣過做包包, 部份麵團先放雪櫃發酵 (最耐可以放72小時), 到要做既時候再用, 係中種既做法! 出黎包包既效果非常軟熟, 而且煙勒有口感,, 好正! (不過我暫時未分到軟熟既原因係因為鮮酵母定係呢種中種法?!)
一出爐就俾屋企人你一舊我一舊食晒, 哈! 最鐘意d野好快食晒, 咁我又可以再做過~
做完包包即時又做吉士撻...
由於當日表弟妹過黎我屋企食飯, 知道佢地一定會鐘意食吉士撻, 一早搓定撻皮作準備! 但估唔到係當我做緊撻底時, 表弟表妹都有興趣玩埋一份, 教完佢地一次, 就由得佢地自由發揮, 效果都唔錯! 有D天份喎~
但最最最吊詭既都係............. 我老豆一個人竟然食左三件! (不過係分開兩日食!) 成日話我整既野甜唔啱佢食... 當我無預佢會食既時候, 又失驚無神食咁多, 真係難捉摸過女人~
大家好.. 好耐無見啊!!!!!! (精神的語氣~)
估唔到一直係杜拜都身體健康既我, 係踏入09年生日後就病足七病, 好恐怖...
多謝DADDY連日來既照顧, 買粥, 煮粥, 洗碗, 洗衫,, 乜都幫我做晒, 我真係成隻大食懶咁縮係屋企, 又無出街... 天寒地凍, 唔洗返工返學, 縮係屋企真係好正,, 哈!
係到要好認真同大家講一句... 大家要小心身體,, 病真係好辛苦,, 唔係講笑!
尋日開始動身,, 焗爐買左後只係做過一次鬆餅, 都未露出我既真功夫 (哈, 懶勁咁!)
最後尋日成功焗出09年第一盤包包...
跟MC做既湯種紫菜肉鬆包
大家見唔見到d包包起晒絲?! 我唔知係麵粉靚既問題, 定係焗爐既問題, 發酵發得超靚... (我用焗爐發酵的)
肉鬆包DADDY食過話幾好味.. 但就向我投訴點解唔做蛋糕佢食, 佢仲畫埋公仔俾我睇佢想食乜, 其實係MUFFIN, 佢d 畫功好屎,, heeee
今日堂家姐過黎叫我教佢做包包, 所以又出左我09年第二盤麵包 --- 菠蘿包是也!!!!
菠蘿包用北海道吐司食譜做包底, 所以比起甜麵團淡味d, 但包質超級軟熟!! 朋友夜晚黎我屋企"聯誼", 個個食完都話正啊!
最攪笑係daddy食完菠蘿包又重覆問我 : 點解唔做蛋糕(佢指既muffin)俾我食? 你其實係咪唔識做啊?
睇黎我黎緊都快d做muffin佢食, 唔係有排俾佢'哦'!!!
