Part of my new house!

不知不覺我已經入住左新屋都有三星期啦!! 到目前為主, 仍然有一些地方未完全完工, 我諗應該要等多一排, 先會一次過要師父執收尾...

但大部份既野, 已經攪掂得八八九九... 至少, 我至愛既微型擺設, 終於有一個安樂窩重見天日!!!!

之前買買埋埋既擺設, 好多都因為無位放而連盒都未拆一直收埋, 依家.. 終於可以放晒出黎...

不過N年前係老麥換既"哈佬咪咪公仔"仲未有機會放出黎... 個d我諗真係要等再搬大間d既屋時, 先有機會露面呢~

呢個飾櫃執左我三日三夜, 由抺乾淨至擺位... 真係花左我唔少心機!

今日心血來潮, 攞部大機出黎影低佢地俾大家睇...

超市系列... 越出越多, 買唔晒啊!!!!

超可愛既邪流丸,, 要多謝好友杰杰!!! 當我唔係香港既時候, 佢好好咁自動自覺去食老麥幫我玩齊晒!!!  錫晒你~

我至愛既咪咪擺設,,收理左你咁耐, 唔好意思啊!

好靚既傢俬系列&其他公仔!

IQ博士系列.. 呢套都跟左我好多年.. 但每次見到仍然令我覺得好開心, 好興奮!!!  (多謝送俾我既人!)

小丸子都係我好鐘意既公仔...但佢d Figure好貴啊, 唔捨得再買...

各款既食物微型... 我真係好鐘意!!

以下就係我自己親手做既麵粉花作品(當然係出去學, 唔係自創啦!)... 我愛做微型食物,, 因為我為食麻!!! 哈~

餃子店

砵仔糕檔口

炒粟子檔 (我老豆個名有個榕字, 所以呢檔叫榕記! 哈~)

魚蛋&煎讓三寶檔

舊式糕點檔

仲有好多.. 不過post唔晒, 有興趣去相簿睇啦~

報告完畢! 多謝收看~

孖B啊!

上星期五同烏G相約鄭太去佢屋企玩BBs.  第一眼見鄭太, 好後生啊,, 橫睇掂睇佢都唔似係兩子之母呢! (好羨慕鄭太咁後生就做人媽咪,, 仲要生完都KEEP得咁fit!!! 羨慕死我啊!) 

終於可以抱下佢對活寶貝啦.... 係孖仔啊, 超可愛呢!!!!見到Manson & Chester, 真係好鬼肉緊啊, 尤其佢地仲未識得跟人, 邊個同佢地玩都唔會反抗, 更加無扭計! 對於我同烏G黎講, 簡直開心死啊~~

BBs 食完粥仔後, 細佬(Chester)訓左覺,, 得返哥哥(Manson)同我地玩, 見到佢真係好鬼肉緊....

呢張雖然out focus, 但Manson個様伸脷仔好得意!

流口水啊..哈~

我最鐘意同BB玩, 雖然佢地有時無乜反應, 有時又唔知佢想點,, 但BB既反應好可愛, 完全係白紙一張, 最直接, 望住佢地, 真係咩煩惱都無, 剩係想攬住佢錫..

BB既手手腳腳最可愛, 細細隻, 但又同大人一樣,, 總之就係好得意... 神既大能真係好奇妙!

bb 既皮膚真係滑到不得了...

Manson 有蘋果水飲, 就自己揸住奶樽好快咁飲晒! 好叻仔呢~

腳子仔一粒粒, 好鬼得意啊!! (我發仔瘟啊..哈!)

照顧BB真係一件好吃力既事, 一個都已經好困身, 何況兩個?!  但見到bb咁可愛, 個種滿足感我諗真係要做過父母既人先會感受到!

BBs, 希望你地快高長大, 健健康康, 相親相愛啊!

To Cindy

To Cindy,

希望你安息, 他日有機會我地會係天國中相見...

同你既點滴, 我永遠都唔會忘記!

感謝主俾我認識到你, 你將樂觀、積極既人生觀帶俾身邊每一個人...

你既聲線, 笑容一直都會係我心深處!

放心啦, 我會繼續為你家人祈禱, 相信佢地係神既帶領下都會活得平安

 

澤田小廚@天后

返黎香港咁耐, 真係食左好多野... 成個人都漲左唔少啊!  前幾日睇返D相, 先發現漏post以下呢餐~

去開銅鑼灣既朋友, 如果食厭左個區既食肆, 不妨行多幾步或坐車落天后! 其實天后都有好多唔同種類既食肆, 而且水準都唔差架!

唔記得幾耐之前同朋友去澤田食小炒.... 個到地方細細, 又係迫爆滿人啊!!!! (天后好多市肆既面積都唔大, 如果想一班人去, 最好訂定位啊!)

我最愛既胡椒豬肚咸菜湯.... 之前天氣成日落雨, 飲碗熱辣辣既豬肚湯, 好正啊!!!! 呢間既豬肚湯仲會加粉絲.... my 飛拂 too~

另一款朋友極力推介既係木桶水蟹粥.. 咁樣上菜好似特別有風味! 哈~ (屎忽痕!!)

d 粥睇就知煲得有幾綿啦!

唔記得係咪椒鹽蝦,, 正正~~

一口炸豆腐,,  初初我地都無為意個餸名, 但當食既時候, 朋友話終於知點解呢味叫做一口炸豆腐.  因為一粒粒新鮮炸, 外脆內熱,, 入面熱到辣咀啊, 想一次過食幾粒都唔得呢, 所以就叫做一口炸豆腐! (哈,, 我地真係好無聊)

兩個人可以食既野真係好有限啊!! 眼見人地又叫呢d, 又叫個d... 真係樣樣都想試,, 如果有機會, 再約多d朋友一齊去先.

店名 : 澤田小廚(仔仔小廚)
地點 : 天后清風街1號
電話 : 3580 0636

大熱天時去打獵

同自己較熟既親戚或朋友住得近真係好方便,, 一個電話就可以相約食飯, 行街, 買野乜都得! 

今日就係同家姐齊齊著街坊裝, 唔化粧.. 踢拖咁落去炮台山打獵啊!!!!

天氣好熱... 熱到痴線!!!! 不過有得食.. 無理由唔出街架麻~

原來對上個次同菇菇姐, 家姐黎已經係上年冬天既事啦!

七月中佢地會搬啊... 希望到時有多D座位 & 換過一部勁 d既冷氣啊, 唔該!

服務好好.... 好到我地有d唔自在..哈!

家姐既XXX熱狗

我既司華力腸熱狗

有上次既經驗, 今次叫一份薯角已經夠食, 食唔晒添!

任落既toppings...我地落得好多,, 攪到食既時候食到周圍係呢!

照舊食完急急腳去starbucks傾計,, 主要係因為頂唔順熱狗店無冷氣, 熱到溶啦!!!!

雖然好飽, 但仍然要叫杯凍飲消下暑...  呢款應該係新口味 : 石榴蜜桃味!  我叫完後有個侍應攞左一盤細細杯既呢隻味俾店內&街外既人試飲... 家姐一直好想佢會遞杯俾佢, 但個侍應可能見到我有order到, 所以無行埋我地身邊!!!   家姐, 我累左你啊!!!!

不過我地都賺左, 因為當家姐去買另一款飲品時, 等左好耐, 佢地先話out of stock... 唔知係starbucks一貫作風定係家姐氣勢迫人, 侍應送左一張免費咖啡券俾佢以表歉意啊~~~  (唔飲咖啡既佢, 呢張coupon當然落左我手啦!! haaa)

最後我地又行行行... 本應短短十五分鐘既路程, 竟然俾我買到一直睇唔啱既梳妝枱!!!  了完一件心事後繼續為新居購物,, 但我要澄清, 我無買到個人頭啊~~ 嗚...

生日派對@私竇

尋日我地一班人又去左阿蓮個私竇到攪生日派對... 今次主角係 : 人見人愛既Vanlily & 能幹賢妻笨B媽媽... 

我同阿茄一早自己衝左上去先, 上次因為部相機唔掂檔, 攪到影唔到阿蓮既靚靚私竇, 今次用部新相機影返夠本~ 

我真係好鐘意呢棧水晶燈啊!

地方好寬敞, 而且好cozy呢!!

大量書籍, CD, VCD, DVD, 卡拉OK碟, sound track任君選擇..

好多好可愛既擺設呢! 仲有好多games提供俾大家玩...

我地成班女人, 除左圍傾之外, 仲點少得食呀.... 每人要準備至少一款既食物參與, 菇菇姐, mini, 飛E等仲帶左唔止一樣食物添啊,,, 食到我地個個都飽到上心口,,, 夜晚個餐都食唔落啊!

 

未正式開始笨B媽媽已經有新鮮元朗老婆餅俾我地食啦!  仲有微溫架~

仲有仲有元朗特產既雞(過橋米線).... 呢盒雞真係超超超激讚啊!!!! 個個都食到停唔到口~

小食有以上食品....  樣樣都無得頂啊!

飽肚類食物有以上食物.... 我不得不讚下左下角菇菇整既薯蓉啊... 真係好靚好靚...味道都好正呢!

 

d食物多到呢~

正式開餐啦!!   我地真係食左好多好多野, 個個都捧住個肚!

食到中段, 大家都有d睡意, 所以各自搵個位坐低, 有的三五成群傾計, 唱K, 攤屍,, 影相...  玩到咁上下, 又有新既食物上枱, 大家又開始食食食啊..... 哈!!  好開心呢~

最後當然唔少得有甜品啦.... 家姐整既兩個蛋糕都超正啊! 另外各人準備既甜品都好吸引..... 而Vanlily都做左一d Muffin送返俾我地做回禮禮物, 個藍妹muffin成為我今日既早餐, 好好味呢!

生日蛋糕有三個咁多... 可想然之我地真係食左好多野啊!!!!

大家玩到過晒時.. 成八點幾先走! 臨尾阿蓮仲邀請我地係佢塊黑版到簽名. 哈! 好得意...

係到都要多謝阿蓮&佢個partner既悉心照顧 & 幫忙, Thank you so much!!!!!

P.S. 各位美女, 我會將大家既大合照放係某個web site 到, 請PM留email俾我等我Send條link俾大家!!!!!