吉士撻(附食譜)

前幾日係supermarket見到又新鮮, 又平既士多啤梨, 即刻二話不說買左兩盒, 返屋企先慢慢諗攞黎做乜好!!!! (係到買到又平又靚既士多啤梨真係唔容易啊~)

回家途中已經不停諗, 做士多啤梨果醬好啊? 定係留黎做蛋糕裝飾好呢??  又怕兩盒太多唔快d食左佢會變壞, 究竟點好呢????

返到屋企將一大叠烘焙書攤晒出黎究研, 終於俾我諗到做咩啦!!!!!   加上屋企仲有大半罐粟子蓉, 粟子蓉最啱就係用黎做吉士撻, 一於就動工做吉士撻~

曲奇撻底我好少好少做, 唔知點解, 鐘意食...但卻好少做!!!

今次我記得要用就快到期既防潮可可粉做裝飾啦~

粟子蓉加cream拌勻真係又滑又好味, 我一邊做一邊係到偷食!!!!

第一次自制吉士,, 頭一煲又係睇漏step而要整煲報銷, 第二煲先成功!!  真係超香滑,, 吉士又係我至愛食物之一啊~

由於唔夠細撻模, 餘下既撻皮就做左一個大士多啤梨撻, 我覺得好靚啊!!!

平時見人做得多, 一粒粒超吸引既士多啤梨向我揮手!  今日, 我自己都做到啊.. 好開心呢~

士多啤梨塗上果膠, 第一次用果膠, 效果真係唔同d!

大少話呢個撻一定好有水準, 一拎到返公司, 唔洗一陣就無晒, 連佢自己都無得食啊!  下次再買到新鮮士多啤梨, 我要encore呢..

食譜:

撻底材料: (可做大約十個我上面既長型番梘模)

麵粉.... 230g; 無鹽牛油..... 130g; 全蛋... 25g; 糖.... 15g

1) 將牛油及麵粉拌勻, 加入砂糖及蛋, 用手搓成麵團! 用保鮮紙包好, 放入雪櫃冷凍20mins
2) 將麵團用棍壓至3mm厚, 放入模內fix好, 將多餘既撻皮去除, 最後用叉輕力係撻皮上吉小孔
3) 180度焗大約20mins

吉士忌廉材料:

蛋黃... 20g; 糖... 50g; 吉士粉... 15g; 牛奶... 170 + 80g; 無鹽牛油... 20g; 淡忌廉.... 70g

1) 將170g既牛奶&牛油煮熱(唔要滾), 備用
2) 先拂打蛋黃, 將糖分次加入攪勻(用手攪便可), 將餘下牛奶及吉士粉倒入, 攪勻
3) 將2) 慢慢倒入 1) 的熱奶中拌勻, 繼續煮至濃稠 (其間不停攪拌, 小心太熱令蛋漿變熟!)
4) 用電動打蛋器將淡忌廉打起七成企身(帶濕性), 最後加入 3)內拌勻, 放涼即可

粟子蓉忌廉材料:

粟子蓉(罐裝).... 100g; 淡忌廉... 35g, 冧酒... 1/2茶匙

1) 將粟蓉打至軟身, 加入淡忌廉及冧酒, 打至滑身即可

最後, 好似食自助餐咁, 自己鐘意點配搭都得!  如果屋企有海綿蛋糕, 可以放一小舊入去撻內, 再用粟子蓉包圍, 效果就好似街賣既粟子山一樣!! (我覺得... 哈!)

p.s. 吉士, 粟子蓉等可放入唧袋到配以適合既唧咀唧入撻到! 亦可用可可粉/糖霜做裝飾!