只愛homemade bread!

以前既我唔鐘意食菠蘿包, 覺得包質好鞋口, 個脆皮面又會整損個咀 (可能我被屋企樓下間麵包店令到我有咁既陰影) 至於腸仔包, 一樣唔愛!!! 因為一般街賣既腸仔包, 包大腸細, 而且好多時個包都係好實, 一d都唔好食!

但偏偏我人生獨獨一次出外學包既課堂, 竟然就係腸仔包&菠蘿包!! 原因好簡單, 唔洗講大家都估到啦~

當我識做菠蘿包後, 發現原來新鮮出爐既菠蘿包係超級美味!!!! 仲要係一出爐, 要即食喔~

菠蘿包個皮以前無諗過係乜? 到學個時先知內含"嗅粉"此物體, 嗅粉一係樣超級嗅既物料, 但焗出黎又唔見晒d嗅味, 只有香香的菠蘿脆皮!

今次一盤做左十五隻, 分左大半俾大少同事食, 個個都讚無得頂啊!!!!!!  我覺得, 除左朱古力會令人食左開心, 新鮮軟熟既麵包原來一樣會令人感到開心架!

自家制既腸仔包比例永遠最適中, 唔會包大 腸細, 軟熟非常!  我夠膽講, 想食咁美味既包包, 真係一d要homemade先至會享用到啊!!  呵呵~

菠蘿包做法只係用普通甜麵團加一塊菠蘿皮便成, 菠蘿皮做法:

材料: (約可做6-7個60g麵包)
高粉... 75g; 牛油... 38g; 糖... 57g; 全蛋... 7g; 臭粉... 1g; 梳打粉... 1g; 水.... 7g

1) 除粉類混合, 倒入蛋漿及牛油搓合, 再慢慢倒入水攪拌成團無粉狀便可, 未用時要用保鮮紙包好
2) 待麵團最後發酵完成後, 取出小份量, 擀薄至2mm厚鋪上麵包面上
3) 同麵包一齊焗15mins即可!