好介紹

自從學識做煨蕃薯後, 去到supermarket都會留意有冇靚蕃薯賣...

自從買左家姐大少奶本書後, 去到supermarket都會留意有冇新鮮啡磨菇賣

自從越黎越沈迷做蛋糕麵包後, 屋企必定長備牛油, 忌廉, 雞蛋同埋高低麵粉...

仲有仲有數之不盡既附屬品..(e.g. baking powder, yeast, custard powder, coco powder etc. 多得不能盡錄)

好鐘意屋企備有充足食材, 對於我呢d經常性"紙筆痕"既人黎講, 可以隨心即興想做乜都得, 呢D真係好緊要!!!!! 當然, 我亦都要承擔一定既風險 ---  就係d野經常放到過晒期都唔記得用,, 確係好浪費要不得~

有時大少都會問我, 你做乜一日裡面攪咁多野咁辛苦自己啊??

其實除左因為我想做外,, 另一個主要原因係..... 再唔整D野會過期啦!!!!!

尋日,, 終於的起心肝去整買左成個禮拜既栗子

之前上網睇到自家烤栗子既食譜, 所以又買左包栗子返黎試下, 效果又唔錯喎, 趁熱食, 勁正啊!

最好笑既係, 當家姐知道我整栗子時, 佢第一個反應係: 下, 你自己炒啊????

哈,, 當然唔係啦, 呢d栗子只需用片糖水煮10分, 再放入焗爐250度焗20mins就ok架啦!!!

但有個小秘訣, 就係當栗子煮10分鐘後, 用刀仔係卜出個面"界"一下先好攞去焗, 咁做係防止栗子過熱而爆開 (我可能有幾粒"界"得唔夠, 爆左!!)

秋風起, 雖然無蛇羹食,, 但有煨蕃薯同烤栗子都唔錯啊!

我仲留左d栗子今晚做左栗子炆雞, 一味兩食, 係咪好介紹呢?!