曼谷四天團 - Day 2 (Part 2 - Chocolate Ville)

Day 2 - Part 2 Chocolate Ville

講個秘密大家知, 我好低能囉.....

由於今次個旅程我係完全無睇任何資料, 全權交俾契媽負責安排, 我只係知有一日係會去Chocolate Ville, 人地話好靚, 有野食, 值得去, etc.....

既然個名叫得"Chocolate Ville", 我一心以為係朱古力做主題既樂園, 就算無乜野玩, 點都有啲關於朱古力既食物買掛???  

所以每當承熹問去邊, 有咩玩既時候, 我就話有好多朱古力賣架, 可以買朱古力食, 只要你乖就有得食.... 直至去到門口, 我都仲係咁以為...................

但原來, "Chocolate Ville" 只係呢到既名, 同朱古力完全無關, 呢個地方只係一個好多歐陸建築 & 一啲好靚既怖景俾遊客影相, 同埋有好多餐廳可以係到食野...that's ALL! -___-

當日全日都天陰陰, 毛毛雨, 真可惜!

承熹一訓醒就見到咁大架消防車, 但仍然呆滯

 

好彩帶兩架BB車, 如果唔係就麻煩, 兩個訓起覺上黎要抱都幾係野

哥哥仍然未訓醒, 有少少發脾氣, 當我地唔理佢 (諗住由佢自己呆下先) , 我地係到影相, 佢竟然同我講: 媽媽, 我唔開心, 你都唔錫我既!! 

細問下, 原來佢覺得我地掛住影相, 當佢透明, 佢覺得我唔錫佢!! 

我心諗, 真係冤枉呀, 我知你未訓醒, 有少少脾氣, 所以咪唔嘈你住囉, 由你自己放空一下, 

點知你又怪我無理你, 話我唔錫你, 唉~

後尾我花左啲時間去安慰返佢, 佢先開心返!  如果承熹唔同我講, 

我都唔知原來咁細個小朋友都會咁敏感

呢到有好多間餐廳, 環境好靚, 好彩我地去既個幾日都唔算熱, 所以行得好舒服

 

 

最後我地揀左最多人去既一間 - Homestead

 

食物都唔錯, 價錢唔貴

 

承熹同妹妹玩到好似飲醉酒, 猜緊枚咁, 哈哈

食完又周圍影下相, 就算夜晚都好靚

 

由於Chocolate Ville離市區唔近, 我地租的士去都要45分鐘車程 (的士司機係個到等埋我地回程, 約1800b), 所以一般都會係埋個到食餐晏或晚飯, 同埋我覺得個地方都幾啱影結婚相, 佢有啲建築都好似教堂咁, 真係好靚~

**********************************************************

去完Chocolate Ville 就直接去China Town 買手信 & 買宵夜!!

途經見到好多人排隊買包食, 唔知係乜, 即管試下... 但原來無乜特別, 只係好似奶醬多咁, 但有好多唔同味道, 個包厚身啲~

 

泰國街邊粉面係最好食... 細細碗, 晚晚都食!

黎到泰國, 點都要買啲手信, 右手邊乾脆蝦辣醬超讚, 好辣, 嗜辣者可以買多幾罐!!!

原本我以為整個旅程中妹妹會成日俾麻煩我, 但其實除左上半日係較痴身外, 妹妹都算好合作, 每日一到八點幾佢就會訓覺, 一訓就訓天光, 就算返到酒店, 上車落車, 上船落船, 抱黎抱去, 佢都可以轉個身又訓過, 呢樣真係好抵錫!!!!!

我們的宵夜..... 泰國人鐘意食硬身榴槤, 所以大家如果鐘意食淋身, 千祈唔好叫佢地揀俾你, 要自己睇清楚先好買~

如果大家需要租的士既contact或其他資料, 可以留言, 謝謝!