係承熹兩個月大既時候, 我地帶左佢去FACE by Sogo影全家福.
初初我地都擔心佢太細, 唔識俾反應, 甚至可能全程會訓覺, 扭計唔合作, 咁早影好似好嘥錢! 但後來諗諗下都係覺得趁佢仲咁BB既時候影下靚靚全家福都係值得, 因為咁baby既時刻好快眨下眼就飛逝, 到時想再捕捉返佢呢 d 咁baby既感覺就無架啦~
不過好感恩, 當日承熹全個過程都好合作, 一去到叫醒佢, 佢都無扭計, 但可能因為啱啱訓醒, 就無乜笑容! 中間又換衫, 又除衫, 又將佢舞黎舞去佢都無喊, 我地都算執到!!!
估唔到兩個月人仔既承熹條頸可以咁有力! 我地都係第一次咁樣俾佢扒係到, 好攪笑~
八八卦卦樣
兩父子情深對望
影到臨尾終於忍唔到扭眼訓, 但原來佢扭計個樣都幾得意, 值得紀念!
雖然FACE既價錢唔平, 但每次睇到呢D相都覺得好SWEET, 等到佢半歲或識坐時我會再帶佢去影, 哈!
家中既小魔怪終於改左名啦!!!! 小弟叫承熹, 英文叫 Lincoln, 係爸爸諗左好耐幫我改架, 希望我做人有擔帶, 應承左人既野會做到, 唔會口響響, 不過最重要都係開心快樂!
就快兩個月既承熹依家好乖仔 (雖然我知BB唔應該讚, 但問心, 真係要讚下呢隻仔
)
承熹之前都係一隻扭計B, 一有咩唔高興就放聲大哭, 換片又喊, 換衫又喊, 唔抱又喊, 有時抱都喊, 眼訓唔肯訓先煩, 總之就好鬼惡死, 乜都喊一餐, 喊到我同大少心都煩埋, 唔知佢想點?
不過唔知係咪真係越大個仔會越懂性, 又或者係我同大少睇完一本書"由零歲開始"教既方法湊效, 真係治到佢!! (但實行個幾日真係人都癲, 同佢死過咁制! 唔可以心軟)
依家承喜無再咁扭計. 至少, 食飽或未訓前放佢自己一個落床仔, 佢都可以自己一個玩, 好安靜.. 就算有時''咦咦哦哦", 佢都唔會放聲大喊, 只會細細聲喊! 時運高個日, 佢仲可以自己玩玩下, 無扭計情況下自己訓添!
另外最得人鐘意既就係佢識得聽我地講野, 訓醒見到人就會笑, 有時仲會發下d聲好似同你傾計咁, 真係好鬼得意!!!! 哈~ (自己個仔緊係得意啦!!)
同埋依家隻嗅豬仔識得分日與夜, 日頭佢食完奶, 玩一陣就會訓, 但每一覺都大約個幾兩個鐘就會醒; 不過到左夜晚最後一餐奶, 承熹就識得訓到第二朝六七點先起身! 當然, 有時佢都會失手, 五六點就會醒, 但一般都可以一覺訓到五個鐘. 好感恩~
或者bb本應就係好易湊, 只係承熹特別扭計... 無計啦, 第一粒仔初時就係肉緊d, 又成日抱, 竉壞晒, 依家調正返佢既態度, 大家都舒服晒~ (初時以為bb唔識野, 乜都就晒佢, 但原來bb真係'精甩尾', 所以有時真係要狠心d, 唔係就真係辛苦自己, 又竉壞佢! )
傻豬仔唔知諗緊乜, 成日都鐘意望實大人講野.
初初出院時醫生教過我地咁樣包住bb, bb會覺得好有安全感, 會訓得好定. 但我地覺得好似扎住好慘咁, 所以無跟到醫生既說法. 後來發覺阿仔訓覺成日扎醒, 原因就係成日俾自己雙手郁一郁嚇醒, 所以近呢兩個星期我地又用返呢個方法包住佢訓, 佢真係訓得好'林'! (但當佢清醒時, 佢係會反抗的!)
又係到扮大人托下巴!
承熹好鐘意紅色既野, 夠Sharp掛! 開始識得望公仔, 聽音樂, 眼仔會跟住公仔轉..好得意!
訓飽食飽心情就最好, 最鐘意我地同佢傾計... 佢笑一笑就令我地忘記晒之前湊佢既辛 苦
開始識得食手指.. 唉! 佢仲係一隻口水佬, 勁多口水~
如果你再乖d, 媽咪就會多d帶你出街...YEAH~
嗅b既頭髮, 好似牛角咁有兩執豎起, 整極都唔識貼服. 激屎~
