與BB Yee & Brad仔相聚一刻

上星期二約左BB Yee & Brad仔食lunch, 我同BB Yee依家都係大肚媽媽, 陀一個, 湊一個, 真係唔容易

加上因為我星期二上午要返教會, BB Yee仲好好咁突登帶埋Brad仔黎同我地食晏, 真係辛苦晒佢地啊!!!

太古區lunch time 時到處都堆滿人, 要舒舒服服食餐晏都唔容易, 仲要我地拖住兩隻小鬼, 真係地方淺窄啲都唔方便

所以我又揀選左East Hotel - Feast, 話晒酒店, 點都好啲!


Brad 仔同承熹一人一張畫紙, 小朋友最鐘意畫畫畫

Brad仔同承熹都算係易湊BB, 佢地可以好乖咁坐定定一至兩個鐘唔扭計, 只要有野食, 有野玩, 我地大人就可以好安心咁食野, 俾個叻叻佢地!


Brad仔又高大左, 依家成個小男孩咁, 承熹同佢對比下就變得細個仔左

Feast 既Lunch & dinner都有Semi-buffet, 我比較鐘意呢類型既組合, 因為buffet實有包包, 又有生果, 啱承熹一齊食

我食左兩碟頭盤 & 兩碟甜品

因為承熹都要食, 所以主菜揀左菠菜龍脷柳 (可能比較油, 承熹夜晚即疴菠菜poo poo), 其實我想食咖喱

有得食承熹就最開心, 古靈精怪

依家呢代既小朋友, 我諗屋企有iphone/ipad既, 都一定抵擋唔到佢地既魔力, 承熹同Brad仔都係佢地既粉絲, 成日都嚷著要玩

玩得好專心! 哈~
我個人覺得iphone/ipad呢啲產品, 真係教識佢地多好多生字/歌仔, 適可而止咁玩係的確有用!

Brad仔啲皮膚好靚, 佢仲要好叻仔識表示要vivi, 次次都無呃媽咪架! 承喜戒左成個月都未識講

承熹幫Brad仔影的!

食完晏, 兩隻小鬼落地自由活動, 承熹明顯無Brad仔咁定性, 越叫越走... 真係甩繩馬騮咁!

依家仲細, 兩個未識一齊玩

佢兩個好好笑, 叫佢地握手, Brad仔伸手時承熹又唔肯握, 到承熹肯伸手握時, Brad仔又唔肯, 哈哈!

Brad仔好乖

馬騮熹

入到商場, 承熹又係狂奔... Brad仔好似大哥哥咁追住佢尾


仲有一個月到BB Yee就生得啦, 我係到祝你同細路都母子平安, 健健康康, 細佬同哥哥一樣咁乖咁錫媽媽! 

下次再見面時應該大家都生左啦, 到時再出黎聚一聚呀!