八個月大

八個月八個月八個月大啦!!!!!!!!!!!!!!!!!!!!!!!!!!!!!!!!!!!!!!!!!!

好快, 真係好快... 自三個月起我覺得承熹大得好快, 眨下眼一個月, 眨下眼又一個月, 出糧又唔見咁快!

八個月大前一日同承熹入左荃灣搵契媽, 契媽新居入伙, 做契仔既緊係要去撐下場!

同承熹坐地鐵去荃灣, 佢呢張相好似周圍同人打招呼咁, 好好笑!

去到契媽屋企, 承熹幾識嘆, 即係挨係張新梳化到'海棠春睡'!

依家承熹比起以前更爛玩, 明明眼訓都唔訓, 去到邊都周圍望, 十分八掛!

契媽's bf送左幾對冬季boot仔俾承熹, 有排著! (佢屋企已經有十對鞋, 仲多過佢老豆, 真係多謝晒所有朋友慷慨解囊, 但其實佢仲咁細, 有幾對著一兩次已經唔啱了! 但我唔會浪費, 我會盡力再傳俾下一個...hehehee)

去完契媽屋企, 夜晚轉場要同契爺慶祝生日~

我之前介紹過既Tubino, 咁好食既餐廳一定要帶朋友去試下! (不過當日燈光好暗, 食物相影得唔好)

大家都好滿意呢到既食物, 預早book枱時講低有人生日, 免費送蛋糕一個!

祝契爺日日都快樂, 惡運遠離佢! 哈~

*************************************************************************

踏正十月十日八個月大既承熹, 同平時一樣, 都係咁鐘意笑~

一睇就知呢個仔好爛玩, 係咁二同佢笑下, 佢都好興奮, 成個人跳起咁滯!

古惑仔 (其實佢係到R緊耳仔), 哈! 大少奶話佢呢個樣似用緊藍牙耳機講電話~

八個月, 老豆與他有個約會!

大家估唔估到佢地係到做乜?

無錯, 就係剪頭髮! 雖然承熹頭髮唔算濃密, 但不知不覺都長左好多, 係時候修修佢!

第一次咁認真地剪, 都算好合作

有乜野可以令佢咁定? 聰明既你應該會估到

咪就係電視既魔力囉!! 有朋友送左一套迪迪尼美語教學俾承熹, 雖然我唔覺得呢啲教材真係會令我個仔成材, 但小朋友始終都鐘意聽歌仔, 呢啲VCD唔多唔少都會學到啲野, 尤其佢啲歌都好好聽, 我都好鐘意一路睇一路唱! 哈~

承熹個樣好好笑, 成個'薯仔'咁!

個樣開始有啲唔耐煩咁!

老豆, 仲有幾耐先剪完架??????

剪完頭髮訓一陣又有第二個節目! 去朋友囡囡的生日會~

初初放承熹落波波池佢都玩得好開心.. 唔怕生保

但無幾耐有人就黎'撩'佢玩....

撩撩下發現唔對路, 原來係爸爸既舊同事黎報仇(舊同事講笑咁話: 你老豆以前都蝦得我地多, 依家仲唔報仇落個仔到!!!!), 父債子還, 俾人用波波埋添~

可憐的承熹遇溺於波波池... 哈哈! 可惡既爸爸掛住食都唔救佢

最後佢唔係扮野, 真係喊了! 哈哈

煲粥仔好幫手!

今次分享一下我平時點整粥仔俾承熹食, 俾自己作記錄時, 又當係分享一下心得!

煲粥仔我係用飛利浦呢個迷理飯煲! 買呢個飯煲時我係無諗過要用黎煲粥仔, 只係貪佢夠的骰, 煮到三至四人飯, 啱晒我地兩公婆既份量 (返到香港唔似住杜拜咁有咁大地方, 所以乜都要以迷你慳位為主)

呢個飯煲公價大約港紙四百幾, 比起一般小型飯煲係貴少少, 但因為我見佢個內膽既質料好似幾靚, 所以我最後揀呢款! (好彩當時買左呢款, 依家煲粥先咁方便)

之前係bb展都見到飛利浦擺Booth, 佢地都有Sell呢個飯煲!

我鐘意呢個飯煲係佢有快速煮飯, 有時我唔記得煲飯, 襟兩下"快煮"大約等四個幾字就會煮好, 啲飯都OK, 唔會唔好食! 而且佢有timer, 你可以預較時間煲飯/粥; 又有煲粥制, 襟煲粥制大約半殼米只需半小時就OK!

我平時就會叫工人十點煲定或者自己七點起身餵第一餐奶時就煲定, 然後由得佢keep warm (因為一日食兩餐粥仔, 咁就唔洗成日翻熱咁麻煩), 煲出黎既粥就好夠綿, 又唔會太多水剩, 杰杰地啱晒餵BB食!

另一款要介紹既又係飛利浦既迷你blender(我諗好多媽咪都有用), 初初見BB展有得賣但無買到, 因為大少話我地已經有blender, 唔好再重覆買! (但佢係講緊我搓麵包個部Kenwood!!!!!!)

我地個部攪伴機大部到爆, 如果要日日都攞出黎用, 咁真係直情唔洗收埋, 一直長擺... 但依家屋企仲邊有咁多位, 所以最後我都唔理佢, 自己走去買左呢部! (買完之後佢又讚好, 話真係又幾方便, 唔阻定)

一套有五個配件: 榨汁用既樽+兩個膠杯

再配兩個刀頭: 三片刀for 乾 (nuts, 芝麻, 黑糊椒, 米等) , 四片刀for 濕 (所有肉類, 瓜類, 蒜頭薑等, 薑真係可以blend到變蓉, 攞黎炒飯最正!) 其實乜都blend得咁濟~

將個刀頭扭落個膠樽到, 扭實佢就OK

然後套落個主機到, 襟橙色個粒制, 佢無度數分, 一襟就轉, 一放手就停... 一般襟十秒內乜都爛晒!

我最鐘意佢既設計有埋膠蓋, blend完啲食乜可以直接儲存係個膠樽到, 放入雪櫃! (不過如果經常要用黎blend唔同野就未必啱用)

我平時blend完啲菜蓉/南瓜蓉/魚蓉一日食唔晒我就會蓋實佢放雪櫃

到要食既時候就分別'拔'出黎, 再將熱粥撈埋落去, 兩樣撈埋一齊就啱啱好唔辣咀, 可以俾BB食!

就係咁, 一碗粥好容易就整好啦!!!!!!

你睇承熹個樣... 幾心急!! 因為我影左幾張先OK, 佢個樣話我知已經等唔切啦!!!!!

 

放一段承熹之前食粥仔既video俾大家睇, 佢好鬼多動作!

七個月大

承熹依家7m2w, 時間又係過得好快, 眨下眼就八個月

雖然我懶寫blog, 但都想堅持每個月至少要寫一篇關於承熹生長進度既網誌

一來係俾自己將來睇返作回憶, 二來可以俾一啲新手媽媽作參考! (因為我自己都好鐘意睇人地寫自己BB既生長過程, 我可以從中偷師或更加了解BB每個階段大約既成展進度或飲食方面應該如何處理)

上個月六個月大時, 承熹去左台灣! 係台灣佢作出人生第一次既反身

今次七個月大去左上海!! 係上海佢都有新既常試, 就係自己揸住個奶樽飲晒成支奶!

呢個動作真係第一次, 之前都試過將佢隻手放係奶樽到, 睇下佢可唔可以自己有意識咁攞住, 但好多時唔夠一陣佢隻手亂fing就fing 甩左, 你係睇得出佢唔知自己做緊乜?!

但到依家為止, 佢每餐大部份時間都會自己攞住食, 你睇到好大分別既係佢知自己係攞住枝奶, 就算佢個頭兩面望, 佢對手仍然會緊握住枝奶, 唔俾佢跌.. 不過往往飲到尾聲, 佢開始飽飽既時候, 就會放手, 呢個時候我就要出手迫佢食埋佢!

 

另一大突破既係, 承熹依家會自己扶住sofa邊或者床仔既圍欄自己企係到, 呢個行為令到我同大少好頭痛, 因為佢識得反身, 識自己坐係到, 依家仲企埋係到, 真係睇少眼都唔得!  我地即時將床仔較到最底個格, 費事佢跌落地! 

加上佢依家開始識爬, 放佢係playmat又要睇實佢, 佢唔會再定定係到玩, 而係見到乜野想攞就會爬過去, 動作快到驚人!!!!

以前佢唔識反身就好想佢可以快啲反, 當佢識反身後其他動作就陸陸續續不斷咁增加! 我有時真係想佢去返成舊飯, 乜都唔識既時候, 只係食同訓, 易湊好多!!!

係飲食方面, 承熹自六個起就食糊仔(用奶開) - 純米糊, 水果味米糊, 香蕉米糊, 南瓜米糊等都係呢啲簡單配搭.  佢初初頭三日都唔肯食, 一遞隻羹去佢口邊就喊.. 但食到第四/五日就有改善, 開始肯主動開口.  由初初食四五匙開始到大半碗慢慢增加..食完再食四至五安奶

但去完上海返黎後, 我又轉煲粥仔佢食..  啲配搭主要都係用蔬菜, 每款蔬菜食三日, 睇下佢有冇不適, 再轉其他款!  我初初煲粥就用煲煮, 但後尾覺得唔夠綿, 就用返飯煲煮, 反而又簡單又夠綿 (多謝BB Yee教路)

初時我怕粥仔太粗(比起糊仔粗粒), 所以我會將粥仔&菜一齊blend完先俾承熹食, 但食左一個禮拜到有朋友話夠綿既粥就唔洗再blend, 因為啲粥blend完會有好多風, BB肚仔有風會扭計, 所以一個禮拜後我就無再blend粥, 只blend菜... (菜都係: 菠菜, 南瓜, 西蘭花, 紅蘿蔔或者蛋黃), 有時懶或者趕唔切煲粥, 我又會俾返香蕉糊仔佢食

一款菜食兩日(一次過整好放係密實盒), 每次食既時候撈落啲熱粥到, 咁就啱啱好唔太熱可以餵!  今日起我就試加魚俾佢撈係粥仔食.

承熹依家可以食比呢碗更大碗既粥

 

承熹由初初唔肯好接受粥仔(我發現小朋友有一個特質, 係唔鐘意試新野, 所以媽媽們初初唔洗太勞氣, 其實我講緊自己! 哈~) 到第三日佢又好肯食, 由初初半碗加四/五安奶到依家佢可以食到一大碗小山丘既份量, 但食晒後就飲唔落奶, 就俾少少水佢飲!

呢啲都係承熹係七個月發生既改變... 我工人成日話佢應該十個月大會識行, 我好頭痛! 諗緊好唔好買學行車? 但好多人話學行車會令到佢對腳唔好, 但大少又話, 以前個個都係坐學行車大架啦, 又唔見我地對腳有問題??

我都唔知, 大家有冇意見分享下呢?

我又用iphone 啲apps攞個仔黎玩, 我一邊玩一邊笑, 真係好好笑! 原來承熹個樣可以襯到好多唔同造型..wakkakakakaa