又緊張又期待

自從知道自己有BB後, 心情好難用言語形容.

真係既開心, 又擔心, 既期待, 又害怕好快來臨

以前未有BB既時候成日幻想如果有BB有幾好, 所有人都會好錫你, 好照顧你, 趁後生可以做媽咪係一件好型既事, 肥又無人會話你, 因為大肚婆肥係正常..哈!

但當真係知道自己個肚入面存著一位小生命時, 其實自己會係比任何人更擔心佢; 而且到呢個先會切身咁驚醒到自己係咪真係適合做媽咪?!

雖然呢一刻我既BB仍然係好細個, 大約只有一個月, 而且其實仲未聽到佢既心跳, 但我已經覺得自己由呢一刻開始已經好似無晒自由咁!

我由呢一刻開始已經要同我鐘意飲既咖啡, 綠茶, 魚生, 海鮮暫時講句再見, 另外再諗深一層, 我暫時唔可以再去旅行啦!! 嗚~~~~ 

雖然我知自己將要放棄好多野, 而且亦可能係惡夢既開始.... 但我個心始終係好期待BB既來臨, 希望BB可以健健康康咁出世.

另外我都好開心老公既反應同埋對我既關懷, 自從同佢講左我有左BB後, 佢真係對我細心好多... 每日都會打幾次電話黎問下我點. 我唔係同BB爭寵, 但見到佢咁緊張BB 同我, 我都好開心. 好窩心!

尤其知道佢自己上討論區睇關於產前產後既野, 我覺得佢好傻, 好好笑...

BB, 希望你健健康康咁生長落去, 我同爸爸都好想見到你, 抱你同埋錫你架!

求主保守!!!