七週

不知不覺BB己經有七週大, 記得第一次去照陰道超聲波時, 仍然未有聽到BB心跳, 甚至好似乜都睇唔到, 只有一粒水撲仔.

啱啱30.6.09 老公倍我一齊去覆疹, 我地大家都好期待呢一日, 我就更加緊張, 好怕BB唔識大, 無心跳... 幸好感謝主, BB好健康地成長緊, 當老公同我聽到BB心跳 "卜卜 卜卜 卜卜"好快咁跳緊個刻, 大家都不其然咁笑出黎, 感覺真係好奇妙?!

呢段時間對於我黎講都真係幾辛苦, 食又食唔落, 訓又訓唔好, 疴又疴得唔順.... 有時心情都會好矛盾, 心諗以後有左bb, 就真係乜野自由都無.... 究竟我係ready 未?!

不過話說回頭, 雖然知呢段路並唔易行, 好彩有老公經常係旁邊安慰我, 俾信心我, 我都相信我地將來既BB一定會好乖好好教 (希望啦)!

我自己份人比較忌人憂天, 好多時不自覺就會將件事諗得無咁好.. 我都知唔應該係咁, 因為有可能會影響BB將來都有呢種性格.  我自己本身唔係一個樂天既人, 我都希望bb係一個開心果!

最近越黎越多人知道我有左bb, 雖然話未夠三個月唔好講出黎會小氣, 但我覺得一件咁值得開心既事真係好難隱瞞, 而且每當朋友約我出街或問我近況時, 我都唔想講大話去作藉口, 倒不如大大方方咁講, 令大家都清楚明白我既狀況!

有左之後先發覺老公原來真係好好, 係呢一刻我先知佢原來諗野唔係只係顧自己, 當去到某一個時候, 佢仍然將我放係第一位!  我唔知將來佢對我會唔會變?  但係我人生另一個重要既階段, 我已經選擇同佢一齊過, 我好希望可以永永遠遠, 希望佢身體健康, 長命百歲, 唔好丟低我一個人!

bb, 我同爸爸都好愛你, 好期待你既來臨, 希望黎緊既日子你會健健康康, 平平安安咁出面同我地見面!

求主保守!