第八週

今個星期踏入第八週, 最近既嘔吐情況比之前嚴重, 好多時候都係夜晚晚飯後, 一直都胃氣漲, 消化不良, 最後到十一點幾就忍唔到要嘔個痛快!

初初嘔都覺得無乜特別, 認為嘔完個人會比較舒服, 所以都唔太抗拒嘔既動作..... 但當第二日如是者又嘔, 今次係無野嘔都死要嘔, 好似想係櫃筒底反轉個胃搵野黎嘔, 最後連黃膽水都嘔埋, 胃酸都一併嘔出黎, 乸到我個喉嚨好似俾火燒咁酌熱!

自個次一嘔, 我真係怕左嘔啦! 唔敢再亂嘔, 更加唔敢亂食野, 食多少少都怕.....

今日Maggie黎探我, 話左俾佢知我有左bb後, 佢都話佢四月份時都有bb, 可惜最後小產了!  原來就算呢一刻有心跳, 都唔代表bb一定健康生長, 佢既bb係八週時證實無左心跳, 所以要食藥流產!   個刻聽到, 替佢難過之餘, 又開始擔心自己既bb會唔會好似佢咁, 唔識大或者停左心跳?!

雖然一直都覺得陀bb係一件好辛苦既事, 中間亦有好傻咁諗, 如果無左..真係唔敢再有, 咁就唔會咁辛苦.. 但是問有邊個做媽媽唔希望自己既bb能夠健康咁出生, 成長?  就算幾辛苦, 都希望bb無事.  雖然知道有好多野都係預計唔到, 做人亦應該向好既方面去諗... 但係心裡面仍然有小小小小既不安!

最後都係等唔到, 打電話去book另一個醫生, 聽日就去check一check, 除左睇下bb健唔健康外, 都想睇下呢個醫生好d定倪醫生好d.. 希望聽日我唔會太辛苦, 可以應付到!

Maggie話睇報導有講過頭三個月有嘔吐既孕婦, 生出黎既bb比一般無嘔吐孕子所生既bb較聰明, 腦部發展得會較好.  聽到呢個講法都有d開心, 希望將來個bb真係會聰明, 唔好好似我咁蠢, 但話說回來, 最緊要都係身體健康, 唔好有咩缺陷, 一家人快快樂樂最緊要!

希望主會保守我同bb, 保守所有既媽咪都能夠生到一個肥肥白白健康既bb啦!