第一次做花仔的承熹

過去兩星期承熹同我都病倒了!

但撞啱上星期有兩個婚宴, 一個幼兒園interview,

好感恩承熹狀態比我想像中好, 無扭計! 感謝神既看顧....

先睹為快, 睇睇星期日做花仔既花絮先:

由於塞車, 原本預計早一個鐘到教堂等承熹同其他小朋友warm up下都無時間, 一去到過左一陣就要開始

初初承熹都好怕醜, 唔肯同人玩, 但好彩佢係一個十分"為食"既小朋友, 當我一俾餅餅佢食後, 佢就取消晒戒備狀態, 心情大靚~

開始肯同哥哥姐姐玩, 自己仲不停走來走去

到正式開始, 承熹仍處於興奮狀態 --- 周圍走! 但我就同佢講: 承熹, 你想唔想食餅餅? (承熹答: 嗯) 咁你就乖乖地拖住姐姐, 慢慢行入去, 行完之後媽媽俾餅餅食, 好唔好? (承熹又答: 嗯)

如是者, 佢好出乎意料地好乖咁行足全程, 無扭計, 無亂走, 無怯場! (勁呀, 媽媽都好佩服你)

要佢拖住一位陌生人行真係唔容易, 因為平時就算我拖佢, 佢都未必肯行得咁好!!!

原本有另一位小女孩係同承熹一對的, 但老實講, 以佢地咁既年紀, 點會肯乖乖拖住行, 承熹肯行真係算好彩!

我無全程親眼望住佢行入黎個樣, 因為我躲係人群之中, 怕佢一見到我就唔肯再行!

總算有驚無險咁行完...



新娘子好靚好高貴.... 好鐘意佢件婚紗~


成班小朋友一齊咁影, 感覺好幸福, 如果有能力又有精力生咁多個, 都幾好! (好佩服以前生十個八個既年代既媽媽)

要安排成班細路影相, 真係唔容易, 攪得呢個另一個又走左去... 哈哈哈!

完成使命, 承熹又可以周圍走, 玩餐飽!

扭媽媽抱抱

呢套踢屎兔好抵買, 係淘寶貨, 95蚊人仔, 一套五件, 有埋煲軚同腰封! 質地仲要好靚, 唔似平價貨... 著一次都抵!

佢兩個好似影緊pre-wedding 相咁...

 

頭大身細既小傢伙! 媽媽愛屎你~