HK Disneyland 一日遊

眨下眼暑假又完結了.... 

今年係我第一年做人阿媽放既暑假!!  老實講, 我好鐘意暑假 (其實個個假期我都好愛..哈哈)

我好享受帶住仔女去街既感覺, 雖然吃力, 但見到佢地玩得開心, 乜都抵返

加上香港生活咁大壓力, 細細個已經要十八般武藝(感恩我自問唔係怪獸家長), 所以係佢地未正式入地獄時(小學), 我都想盡量俾個快樂既童年佢地~




放暑假既例行節目之一-------- 點少得去迪士尼呢?!

尤其今年"怪獸大學"咁hit, 承熹係戲院睇笑到卡卡聲, 所以就算要排隊, 我地都好想入去睇睇, 影張相!!!

 

小朋友啲記性特別好, 而且無定向, 承熹成日考我記憶, 問我呢個叫咩名, 個隻又叫咩名?  

問到我口啞啞, 除左主角加幾個特別啲既角色我係記得外, 其他真係唔記得晒!

 

承熹仲成日問住戲入面攞左大眼仔頂帽周圍走個隻豬叫咩名?  有冇人知?  問迪士尼啲職員都無人知 >_<

原本排既時候係大眼仔, 點知排到一半轉左毛毛... 毛毛好高大, 好得意啊!!!!!



我們的怪獸大學學生証~

當日天氣超超超超熱.....  

承熹熱到面都紅埋

有媽的孩子像個竇~ 

去得迪士尼既人, 大部份都係幸福小寶竇, 係呢啲酷熱天氣, 啲大人仍然'冒死'入去乾煎, 為既就係想小朋友開心, 你話父母係咪好偉大呢! 哈哈

 
小小世界係大人最愛既遊戲, 因為唔洗排好耐隊, 入面又靚又有冷氣嘆..哈哈!

承熹睇到好入神





入左迪士尼幾次, 都未有機會正式睇下全球香港獨有既"迷離莊園"

個building 好靚啊~

可惜當日我地個個都拖住小朋友, 佢地仲細唔啱玩 >_<

希望係不久既將來有機會再試...



一場黎到, 安排埋去酒店食dinner buffet...  

依家做緊優惠, 星期一至四可以係香港迪士尼個網址Download coupon, 大人每位減$80, 小童減$50

食物唔算太豐富, 但味道唔錯, 最好係啲食物都好啱小朋友食

食完晚飯再返園內等睇煙花~

夜晚唔洗點排隊, 正!!

開心既一日!!