堅強的媽媽

作為一位媽媽, 最怕就係見到兒女生病受苦

相對, 亦都好怕自己生病, 唔能夠照顧年紀尚小既兒女

 

尋日我得知一位唔係識左好耐既blog友, 佢患上末期肺癌

呢位blog友雖然大家素未謀面,  但因為大家都係基督徒, 而且又係在同一天生BB(佢女兒同承熹同一日出世), 漸漸大家就了解多左, 經常分享湊B心得, 久而久之會覺得大家都有一份"情"!

但當我尋日去睇佢個blog時, 發現佢話自己患上末期肺癌, 我睇到後好震驚!!! 有一刻係接受唔到點解會係呢個時候有, 點解佢咁後生, 又無不良嗜好, 點解都會有???  大家都為人父母, 我好自然第一個反應, 點解會咁.. 佢啲小朋友仲咁細, 點算 (佢有兩個女)?

我眼淚不其然湧上心頭, 雖然唔係話識左好耐既朋友, 亦都無見過面.. 但我個心真係替佢好難過.. 我即時入房為佢祈禱!

但最令我覺得佢了不起既係, 知道左一件咁大既打擊後, 佢仍然可以好依靠神, 仍然懂得感恩, 心裡有平安, 真係好唔容易...  好多時人遇上不幸既事, 都會問個天/神, 點解會係我? 點解要咁對我? 必定怨氣很重, 但呢位媽媽不單止無, 而且仲覺得神無對佢唔公平, 因為佢知自己有機會信主, 有永生救恩, 佢已經覺得自己有賺.

雖然我仍然為呢位媽媽擔心, 但另一方面我覺得佢真係好堅強, 好有信德, 我好有信心神一定會看顧佢地.

從前我地既blog都係私有化, 所以如果唔係佢blog友係睇唔到佢既網誌.. 但我見佢依家將患病中既過程都公開左, 所以我都好想係到同大家分享下, 希望各位無論係咪基督徒既朋友/媽媽, 都可以為呢位媽媽及佢既家人深切禱告, 求主份外看顧, 帶領佢地.

 

上海世博精華遊 Day 2 Part I

我地今次去上海主要係參與下世博會, 另一個目的就係食食食食食!!!!!

承熹契媽係我地未去上海前已經幫我地book定地方食飯, 因為好多好食既餐廳都需要預早book位, 否則好難有位 或者要等好耐~

第二日既行程:

去福1088食lunch --> 返酒店 --> 去世博會場內食飯 --> 係世博隨便逛逛

十點起身, 急急腳落酒店食個簡單早餐再返房執下野, 辦下大事就出門口! (哈... 我地既行程係超hea, 如果有朋友去上海想參考我既行程, 一定會好失望, sorry!!!)

今日第一餐係上海食既lunch, 我安排左去'福1088'. 好多朋友&上網見到人地都極力推介, 皆因食物, 環境, 服務都一流, 所以係必去食肆之一!

好鐘意上海啲街道好多都兩邊種滿樹, 感覺好舒服!

餐廳外貌係一個唔起眼既建築, 以大宅多過餐廳

餐廳既格局比較特別, 佢唔似一般餐廳咁一張張密麻麻既枱放埋一齊, 每張枱都佔一個角落, 有好大既私人空間, 絶對唔會見到隔離枱既人

我地間房唔係好大, 但都幾骨子

每位最低消費二百蚊人民幣, 我地叫服務員幫我地砌個餐單, 全部都係招牌菜, 價錢又啱啱好, 不過我地自己又加多兩樣餸

呢到既野食真係好好味, 我地最鐘意既係芝麻蝦, 醉雞, 薰魚同埋煨麵!!! 超好味~

承熹坐得幾衰! 唉, 人仔細細咁招積, 點攪?

其實佢地啲野一啲都唔貴, 大部份都係幾十蚊餸, 但又做到色香味俱全!

上海依家既天氣都幾熱, 我去個幾日都有落雨, 但就唔係話勁大! 食飽後就返酒店休息一陣, 等埋契媽放工就一齊去世博

饅頭手, 肥嘟嘟, 好得意!

承熹訓得好林, 自從識反身後, 個百厭星成日都反身, 依家無可能再好似以前咁放佢係床仔自己乖乖訓, 要睇到佢實一實, 唉.. 我之前train佢自己一個訓既心血白費晒~

BB啲腳趾真係好得意, 一粒粒, 圓碌碌, 漲卜卜

隻衰豬幾爛訓

訓到濛濛瀧瀧, 可以出發啦!

台灣紅到過黎大陸既85度C係我同大少既至愛,, 點解香港無架???   好飲過starbucks一百倍!!!!!

由於太多相, 要分兩篇post~

待續....

上海世博精華遊 Day 1

啱啱上星期我地一家又著草去....

適逢daddy今個月六十大壽 (雖然佢十萬個唔願意承認自己年屆六十) + 大少今個星期就返新工, 所以我地又急急腳咁計劃去旅行!

一心以為暑假完左, 去邊都應該容易訂! 點知... 想去既地方都無機位 , 所以最後係揀無可揀既情況下, 我地轉去上海六日五夜.  但原來去上海既機票都超爆, 我地咁忟先訂除左無package訂外, 仲要買貴機票, 晚機去, 早機返, 等於玩得四日!

不過無所謂啦, 自在同老豆慶生日&了左大少既心願 --- 去世博

原本坐下午五點機, 但delay到六點三, 唯有去T2飲個下午茶! 承熹去上海個幾日, 每當我地開餐, 佢就自己乖乖坐係車仔到食手指/咬牙膠... 佢食完左手, 食右手, 幾招積!

承熹今次坐飛機同上次去台灣差不多, 無話大喊大叫, 但就不停要同佢玩.. 佢呢啲精力旺盛既豆丁, 玩少陣都好似俾蟻咬咁, 坐唔定!

到達上海已經八點, 攪得黎都八點幾.. 大少話去上海一定要坐磁浮喎!

雖則話係全世界最快既列車, 但我真係接受唔到佢地既大堂, 應該係成個車站.. 無冷氣囉, 等車時又熱又焗, 完全唔掂!!! 我唔明點解大陸啲野成日都係咁, 明明個頭做得幾好, 但硬係有啲好荒謬既配搭?! (可能佢地諗住環保慳電, 但我覺得一係你通風系統做好啲, 否則唔好又焗又熱咁, 想焗死人咩!) 

真係好快, 幾分鐘就由機場到市區! 記得keep 低boarding pass飛尾買票, 有九折

去到酒店支支左左攪完一輪同承熹飲埋奶就出發去搵承熹契媽食飯! (撞啱承熹契媽係上海工幹, 佢提供左好多好味&值得去既餐廳俾我地, 令到我地呢趟旅程食得招積, 住得舒適! Cherry, Thank you~)

呢間吉士酒家同新吉士係同一集團, 呢間係老店, 入面環境比較古舊&窄.. 好聽啲係'有特色', 哈~ 但契媽話呢間比起新吉士較好味, 而且價錢亦都比較平!

地址: 徐汇区天平路41号(近淮海中路) , 電話: 62829260
http://www.dianping.com/shop/500702
 

上海菜不嬲都係受歡迎的, 加上係上海食既正宗上海菜, 每碟賣相都唔差, 味道亦非常好, 最吸引既係價錢好平, 叫幾多都唔肉赤!!

大家最愛 : 第一排左一, 海淅頭, 超爽!!!! 成個trip最好食既海淅就係呢間~
大少最愛 : 第一排右二, 清炒河蝦, 我第一次食, 細細隻, 好爽~
我既最愛 : 第三排左一, 炸腐皮嗅豆腐, 我唔識講, 總之好好味!!!!

其他既菜式其實都好正, 最慘係我地好夜先去到, 已經完左last order, 只可以叫冷盤, 好彩契媽好醒地一早幫我地order左咁多野, 大家都食得好滿足!!!!!!

當日食埋飯大約十一點幾, 可憐既承熹成日無乜點訓, 但全程都無發脾氣, 依然係好八卦咁四圍望!!  我又要好唔知醜咁讚下佢

承熹當晚十二點幾先訓, 一覺訓到第二日十點! 乖仔~