初三去澳門 - 吃喝篇!

今次去澳門玩, 主要係去吃喝&去下D新賭場見識下....

係到首先要嗚謝Hellen & Vanlily 提供左好多資料俾我, 令我今個旅程都玩得好開心.. 唔該晒你地! 尤其Hellen既熱心幫忙....Thanks!!!!

我地係初三一早坐十點船到澳門... 初四晚六點船返香港,. 全程都發現澳門依家好興旺, 好多人.... 大少不斷讚嘆澳門d賭場起得真係好靚, 好有拉斯維加斯既影子.... 原來澳門, 都可以咁國際化!

由於坐早船, 以我地一貫作風, 買左九點五十分既船飛, 十點先到碼頭, 好彩都俾我地上船,,, 無食早餐'LON'住個肚坐船, 大少有D暈船浪, 一落船就嗌要食野... 一心諗住去永利--永利軒到嘆個靚茶, 點知!!!

唔好意思, 無位, 全場滿晒! 等幾耐? 唔好意思, 一路到三點都無位,,, 唔好意思! 

你地睇下幾誇張, 十一點半去, 話三點都唔會有位.... 之後即刻轉plan, 去左一間由飲食男女介紹既地方 : 火龍湯特色美食.... 唔知係咪飲食男女介紹完, 個個都去食.... 好彩我地去時仲有位, 唔洗十分鐘, 全滿, 仲要排隊!!! 我地叫左佢既招牌花蛤米線 & 膏蟹泡飯... 好彩都無令我地失望,,, 味道真係唔錯!

地點 : 澳門紅窗街136號地下, 電話 : 853-2893 9929, 營業時間 : 12noon - 12:30am.

食完個brunch, 唔知點樣行下行下又到左澳門大街... (都唔記得行去定坐車去).. 雖然黎過澳門好多次... 依然好喜歡澳門大街既建築物, 好有歐陸Feel...百看不厭!

沿途再行去大三巴,, 途中不斷有牛肉乾, 豬肉乾, 杏仁餅不斷送上,, 試食都試包晒!  但經過鉅記門口,, 聞到新鮮出爐既葡橽, 又點可以錯過呢! 真係好美味,, 但大少話KFC 既葡橽都一樣好好味, 唔洗特登係到逼喎!  不過一場黎到, 緊係食下D正宗澳門葡橽啦! 行完一輪大三巴, 澳門摶物館, 大炮台等又經過一間超多人既豬扒包鋪... 我地原本都唔想食, 因為仲未肚餓, 但又係個句... 一場黎到,, 人排我地又排,,又食左一個,,, 味道一般,, 唔知點樣為之好食... 唔難食咪係好食囉!

食飽後, 坐的士返酒店放低D行李, 休息左一陣, 又出去食過!  今次去金沙賭場入面既buffet, 以往聽過好多同事介紹話抵食又好味, Vanlily又話有超多款desserts, 我同大少講, 今朝飲唔到我要既永利軒, 金沙呢個buffet我自在必得架!!!! 出門口前大少打電話去book位, 人地已經話sorry, full晒啦! 不過你可以試下早D黎睇下有冇客訂左唔黎, 都有機會食既!  平時既我聽到呢D咁既說話, 彩你都傻, 好巴閉咩! 唔鬼食添... 但今次我同大少講, 呢個buffet我非食不可呀!!!!!

我地六點就去到金沙, 見到佢條隊已經有人排緊, 而且仲封左隊尾唔俾人再排,, 但大少知我想食, 厚住面皮問佢可唔可以照俾我地排,, 個小姐唯有好無奈咁話, 你要排都可以排, 但我地真係無晒位架啦.... 我地抱住不屈不ｘ既精神... 最後都入到去食...haaaaaa , 金沙個buffet真係無得頂, 任何一款食物都係好味, 又新鮮, 又靚...每位加埋一都係29x... 比起杜拜七百幾蚊一個buffet, 杜拜帆船酒店真係,, 唔該行埋一邊啦!!   我最鐘意食佢d蠔, 大隻又靚... 另外d湯都超好味 ,, 仲有個木槺布甸係全場至正!!!  呀, 反而大少食過一隻包,佢話唔好食囉.... 你地睇下d相就知我地食左幾多野.... 我地由六點幾食到差不多八點,,, 走個時見到出面依然有人排緊隊等入去食(佢地真係仲有毅力過我地!)

平時食朱古力噴泉多數都係生果 or 棉花糖, 今次見到有泡夫, 好開心呀!!!

呢個木槺布甸真係超超超正!!!!

食完呢餐, 真係飽到上心口... 我地一場黎到金沙, 緊係唔會咁快走啦,,,係個到拉鋸左兩個幾鐘, 再去埋漁人碼頭,,, 拖住疲乏既身軀又截唔到的士,,, 幾經波折返到酒店, 我連涼都無沖就一覺訓到大天光!

我浮返出黎啦!!!

今日係年初五啦... 應該好多人都要開工啦...

你地呢個新年過得開心嗎??  我自己就好開心, 因為大少日日都倍我, 日日都係我身邊... 今次返香港,,我地既感情又誇進一大步... (雖然今次返黎為左一件事有小小意見不合,, 但我知道我地太愛對方啦.. 經過大家坦誠傾過後... 依家仲好左... 感謝主!) 我依家更加相信, 兩人有拗撬未必一定係唔好! 但千萬唔可以成日有事無事都嘈一餐囉!

前日初三初四同大少去完澳門返黎,, 雖然無係賭場贏返一萬幾千... 但我地都玩得好開心... (遲D再update俾大家睇下澳門依家有幾咁興旺!!! 密切留意啦!)

今日終於有時間上網睇下大家既留言, 又去大家個blog到坐下... 好掛住你地呢!!! 大少23號就要走啦,, 好唔捨得呀!!!

依家係半夜五點,, 同尤妮斯傾計傾得好開心... heeeeeeeeeeee 不過我對眼好累啦..我係時候要訓啦....

大家繼續新春快樂啦!!!

呢個係沙田新城市廣場放既新年擺設,, 係一個'囍'字...好意頭呢!  入面仲靚呀....

入面都裝飾得好架.... 好有新年氣氛

D 桃花係..... 假既! 但都好靚...

好襯既一對,, 我地都係著米奇老'味'衫!

初一晚去左我大姑媽屋企拜年食飯... 碰啱大姑生日, 又有蛋糕食... 我抱住o個個係我至錫既表姪仔!

初一,初二, 拜個靚年~~

今日係年初一(&初二啦), 係到同各倍blog友拜個靚年先 ~~~~

祝大家 :

心想事成! 身體健康!

財運亨通! 出入平安!

青春常駐! 步步高陞!

日日開心! 豬年行大運!!

年三十個晚, 同大少係屋企食完飯後, 半夜十二點幾先行花市... 目的係為大少家中添置水仙,, 由於實在太逼人,,, 我地買完水仙, 係咁咦行左個圈都返屋企....雖然今年呢個新年度得近年最高暖度(約23-25度), 但因為無落雨, 所以出街都無咁麻煩! 係年宵隨便影左D相, 同身在國外既朋友們分享下啦!

今年年宵最暢銷我估係吹汽公仔, 有珍寶珠, 有磨菇, 安全島, '教'剪腳等款式.... 睇就得意.. 但我無興趣買,, 太'side'錢&位!

係杜拜恨左好耐食湯丸, 年三十晚個日係惠康臨收鋪時衝入去買左兩包黎煮.. 好好味呀!!!! 我最鐘意食芝麻..... 食左個人感覺好似真係團左圓!

最後, 再祝各位新年快樂! 心想事成!