四日三夜台灣之旅

上星期五承熹第一次坐飛機!!!!!!

今次又係決定得好突然, 我星期一同大少講不如去台灣囉, 佢一句話好, 我就打俾agent book 星期三出發, 但回程無位, 所以最後安排星期五飛!  同我地以前一樣, 好似著草咁話走就走... 不過台灣咁近, 飛機又多班次, 要準備機票酒店就容易得多!

自從媽媽離世後, 我都無返過台灣, 而台灣既家人都好想見下承熹, 所以趁住係大少返新工之前, 我好想一家人去一去台灣探探親戚, 否則到大少返工後都唔知幾時先有假可以同我地去.

因為事情黎得太急, 我都無諗太多, 只係覺得去台灣好近, 承熹坐飛機應該無問題, 而且台灣都係我熟識既地方, touchwood有咩事, 要買野, 要睇醫生, 要呢樣個樣都好易解決, 帶阿仔去應該無難度, easy job~

不過到我開始執行李時先發現, 原來要執承熹既日常用品都幾 ------------ 大陣象!

首先, 我要解決飲奶既問題! 所以去左豐澤買左個迷你kettle (酒店個啲點敢用!!!!)

另外就係買大量消毒濕紙巾 (因為帶佢出去任何地方等同要幫個到做埋清潔, 承熹依家手多多, 去到邊都要抹乾淨, 以防佢雙手周圍摸又放入口而生病!)

跟住就係要執衫褲睡衣, 去四日, 執左七日既衫. 以防萬一!

然後最恐怖既就係紗巾同口水肩.. 因為佢實在太多太多口水, 所以我都無計帶左幾多條去, 我將屋企所有紗巾同bids都帶晒去, 費事煩! (但呢兩樣野係最佔位)

跟住碎濕濕既尿片, 濕紙巾, 奶樽, 奶粉, 探耳器, 指甲夾, 沖涼液, 毛巾, 枕頭仔, 退燒貼等等等等等好多唔知有冇用, 但又要帶既野都要執落喼!

好彩去四日咋, 否則要帶多個喼先夠!

星期五坐中午機去, 我地八點就起身, 執野餵奶後十點出門口

係飛機上承熹玩左大半程機 (係我俾佢玩左左半程機), 臨尾訓左一陣

飛機起飛時承熹無扭計, 全程機都算好合作, 不過臨落機訓訓下唔知係咪氣壓令佢唔舒服, 突然喊醒, 不過好快又冷靜返 (全靠我條褲啲閃石閃下閃下分左..哈)

落機時仲好精神, 心情好好咁!

終於到左台灣啦... 感謝主!!!!! 第一關成功過左~

因為落機時承熹夠鐘飲奶, 所以我地就係機場飲埋先坐車, 就係咁大少係機場嗌左個套餐食. 當承熹食完奶大少抱住佢, 我已經提醒大少: 小心佢隻手會周圍wer野! 個頭講, 個頭就一手撥落碗湯到(好彩碗湯已凍晒), 但就攪到大少一腳都濕晒, 連老底都濕埋!!!!! 哈 (好彩唔係我乃野)

呢四日三夜主要都係同親戚食飯, 探入左老人院既舅父同埋去影左一輯'家庭相'

承熹呢幾日就發達啦, 可以同我地同床訓, 訓得不知幾林... 一覺訓十個鐘, 每日十點起身, 有時仲係我地趕住出發, 被迫要叫醒佢..

不過每晚最麻煩既係同承熹沖涼, 因為無膠盤, 唯有係酒店個洗手盤沖!! 佢初初都唔慣, 有少少掙扎, 不過沖多兩日就OK~

至於沖奶方面, 我地每日都會去便利店買一枝'純水' (台灣親戚介紹話呢隻唔係礦泉水, 比較啱BB飲喎), 然後每晚煲定放涼做凍水, 一早就煲定放入暖水壺 for 個日出街沖奶!

酒店方面我就揀左間好少少既 -- 王朝大飯店!  如果係以前就會住啲平酒店 (台灣好多又平又靚, 不過細), 但帶埋承熹去就要搵間乾淨&大

過往幾年去親台灣都好邪... 每次都遇大颱風(真係次次都係!)

但今次好好啊, 雖然都有落下雨, 但每次都係我地係室內或車上先落, 所以都無乜好狠狽既事發生! 感謝主~

有一晚同完親戚食飯, 我同大少都偷少少時間去誠品行一轉, 去到台灣點都要買下書... 不過今次帶埋承熹, 當然急急腳行完就要撇

我又要'鬧'下個仔, 佢真係好'唔'合作, 去到邊都自己靜靜週圍望, 無扭計, 可能覺得好新奇! 同埋佢好鐘意坐車, 一上車就訓, 一落車就醒, 完全無發脾四, even只係啱啱訓著就要落車, 佢都好似叉一叉都足夠咁, 即笑!  

最抵打既係.. 佢係香港見到奶奶或者其他人, 都會有少少怕生保, 唔係次次都肯俾人抱.  但去到台灣, 佢好俾面啲親戚, 真係任抱任攬任玩任錫, 就連唔識既人行過望住佢, 佢都同人笑... 所以去到台灣都有好多唔識既人走黎同我地傾計, 最記得有一個人同我講: "你這個當媽媽的一定很開心, 因為每天看著這個開心寶寶, 怎麼會不開心呢?"

我聽完細心諗下, 無錯... 自從承熹出世後, 我真係好開心... 雖然有時係好攰, 無晒自由.. 但每次一見到承熹, 我咩煩惱都無晒!!!!

依家承熹可以好得心應手咁攞住佢想攞既野, 每次坐低食飯, 只要俾舊牙膠佢咬, 我地就可以安安靜靜食餐飯 (當然, 唔係次次都成功..但都可以止下咳, 哈!)

傻豬依家坐得好穩... 仲有仲有, 好開心既係, 承熹終於識轉身啦!!!! 因為我地經常放佢自己係張床到自己玩, 我地要忙住執野, 洗奶樽, 整奶粉等... 跟住無意間俾我係鏡到反射見到承熹為左攞某樣野玩而轉到身啦!

之後我即時要佢重覆做多次, 果然真係成功!!!!! 好開心, 可以親眼見到自己個仔第一次成功轉身, 興奮到爆~

傻仔..哈!

好快就四日lu... 要同台灣講拜拜!

雖然媽咪走左, 但我同自己講, 我仍然要每年都返台灣探媽媽既親人, 因為佢地都係我最親既人, 我亦都要俾承熹知道.. 佢仍然有好多好重要既親人係台灣, 我地不可間斷架!

經過今次既旅程, 我諗........帶承熹一齊去日本應該係問題不大的! 但一定要自駕遊, 咁佢就可以好夠訓~

回程坐六點機, 但因為落大雨, 所以班機delay....

當日係中國情人節, 去starbucks買咖啡買一送一. 大少買左杯咖啡, 送多一杯俾我.. 點知我唔小心 --------- 倒瀉落佢條褲到, 但好彩無濕到底!  大少爆左句: 俾你兩仔乸玩死, 黎個日個仔倒湯落我到, 走呢日到個阿媽倒咖啡落我到!!! hahahha

台灣過境有到好, 有設特別櫃台俾嬰兒車行, 所以好快就可以過關! (香港反而無~)

同埋台灣機場有個免費叉電機, 入面放左好多牌子既叉機俾你叉, 放個電話入去叉, 然後鎖上, 行完一陣商店再返去攞, 好方便! (見到我部吉蒂嗎? iphone既電好快無, 好彩有得叉, 唔係上機就播唔到兒歌俾承熹聽)

又要坐飛機, 承熹今轉無第一轉咁定, 應該係因為眼訓, 但又訓唔到 (佢眼訓但又八卦周圍望)

有乜野放係佢手攞到以內既範圍, 佢都可以兩秒內放入口

班機delay, 攪到成九點半先到香港, 我地飛的返到屋企都十點半, 沖埋涼承熹十一點幾先訓!

呢個旅程好開心, 一來承熹好合作, 二來見到姨媽表哥舅父嬸嬸等親戚, 好溫暖哦! 我知道媽媽在天都會好開心, 因為佢呢一生人最愛錫既家姐(我姨媽) 終於見到承熹, 雖然媽媽唔可以親自抱抱承熹, 但我一定會教導承熹視姨媽為婆婆, 好好愛錫佢.

 

p.s. 全程相由iphone影, 所以質素麻麻!

如果有朋友都想帶BB去旅行, 可以話我知, 我可以post個list出黎俾大家參考下要執啲乜野BB用品.

P.S. 仲有少少野無寫到, 突然記起... 我仲有帶洗BB奶樽既洗潔精同埋一個盆仔 (for 洗奶樽用)

未係最完善, 只供參考^_^