BBsssssss

呢個星期, 見到好多BBs....

首先, 星期一約埋Vanlily & 家姐大少奶一齊入去探笨B媽媽的笨C

有睇笨B媽媽既blog都知佢住新界村屋, 對於我呢啲石屎森林既人黎講, 入去新界等同去長征!!!! (因為我係路痴) 原本廢事煩就諗住坐的士入去, 但大少一聽到我話要坐的士去元朗後, 就好熱心咁用iPhone MTR app 去教我坐港鐵再轉西鐵. (第二啲野唔見佢咁熱心~)

但原來坐西鐵真係好方便又快捷, 我以後唔會再有"入新界焦慮症"! 哈~

好耐無見過new born Baby (但其實只係八個月而已), 實在好惹人憐愛, BB既喊聲係好得意, 佢地既喊法係一樣, 承熹曾經都係咁喊的, 不過再過多一個月就會開始變了!

笨C個樣真係好似B爸!! 哈~ 但當然係Q版加可愛版啦

一個小生命既誔生, 又再証明主係真實的!

自從懷有承熹後, 就開始留意身邊有BB的bloggers, 發現呢段時間好似特別多人大肚或初為人父母! (當初大家初相識, 好多都仲係二人世界)

加埋我地班餓底陸陸續續都有人大肚&結婚, 真係喜事一浪接一浪...

感謝神一直既眷顧!

呵呵呵.... 我似住自己有湊仔經驗, 去到好快就忍唔住搶左B媽個女黎抱! 嘩... 好耐都無抱過咁細粒既BB, 好軟熟, 好細粒啊! 好鐘意一隻手已經可以包住佢地既感覺~

承熹依家每朝都會谷'紙', 試過有一日無啦啦企係床邊大喊, 原來谷緊舊硬紙, 當時笑死我!! 依家好多時都兩日一次/兩次, 所以要迫佢飲多啲水, 爬多啲去刺激條腸蠕動!

*****************************************************************************

第二日, 大少奶同咪咪吉黎我屋企探承熹

剛訓醒既承熹, 傻下傻下!

A豬細承熹足足兩個月, 但一樣大得好快, 眨下眼又六個月大, 黎緊仲有得去日本玩, 真係幸福啊!!!! Audrey對腳仔好肥美, 咪吉餵媽媽奶又係餵得好成功~

兩個中B(六個月以上叫中B, 我作的, 哈!) 承熹以後就會係大哥哥, 要照顧妹妹們啦!

*******************************************************************************

今朝帶承熹返教會的'媽咪小組', 又係有好多媽媽會帶小朋友一齊去, 承熹頓時又變返做最細既一個!

好感恩, 承熹第一次跟我返媽咪小組, 初初都怕佢會扭計, 但佢自己玩牙膠, 望住其他小朋友玩, 之後仲訓埋覺, 剛好訓到小組結束時先醒, 真係好合作! 咁乖仔, 下次可以再帶佢去, 俾佢見多啲, 接觸多啲陌生人!

 

 

 

除左叫媽媽外, 承熹最近都好鐘意拍手仔! 我唔知係同佢睇VCD佢學到拍手, 定佢自己無意識地拍? anyway, 依家每當佢拍手時我地都講"好野, 好野", 希望佢會明白"好野"=拍手, 哈!