第十六週

話咁快就到第十六週...

依家既我狀態唔錯呢, 同未有bb之前無乜大分別, 只係仍然唔可以食太飽, 唔可以行太耐, 腰骨有少少赤痛, 同埋唔可以乜都放入口食!  不過已經好感恩,, 可能比起好多人已經陀得舒服好多....  (托賴托賴)

十六週既小魔怪, 唔知係到做緊乜?  我同大少都好心急想小魔怪快d出世同我地見面啊!! (當然係係足月既情況下啦~)

日子過得好快, 眨下眼大少今日又走左lu, 前後返左四日, 不停忙於攪埋結婚既事,

不過話忙話忙, 但實際又唔係真係太多野攪,  只係我地兩個好怕攪呢D野姐, 所以覺得好麻煩.... (係到要多謝身邊既朋友, 你地既資料幫左我好大忙..)

仲有不足一個月"大日子"就來臨, 除左地方係confrimed, 其他乜都未攪好, 睇怕我呢個禮拜都要加快腳步, 唔好再懶懶行

聽日俾資料朋友幫忙印帖; 後日約左試妝, 順道睇埋衫; 星期五睇花球; 仲有場地怖置未confirm搵邊間 (有冇好介紹?)

希望一切順利啦..........................................................................

 

香港電台播出有關深圳恐怖故事

咁啱係facebook見到有人post左呢個電台節目

我唔知呢個節目出左街幾耐, 亦都唔知可信性係幾高...

但點都好, 知多d好過出左事先後悔,

我自己本身好少返大陸玩, 但我相信呢個世界咁大, 唔會得大陸一個地方先有呢d事發生, 所以希望大家都會事事小心, 唔好有事啊!

 

無能為力

今日心情好差, 自腸胃炎後, 好返一日又勁嘔, 嘔到個喉嚨同心口俾胃酸'那'到好痛, 完全訓唔到, 食唔到, 身體虛弱加上可能用力過度(嘔), 攪到下體有少少流啡血現象... 不過今日睇左醫生, 醫生話問題不大, 唔好太操勞就OK...

但我心情唔好唔係因為以上既事... 而係我一直好疼愛既表弟妹越大越反叛, 今日為左爭玩電腦而嗌交..

雖然兩姊弟嗌交係好正常既事... 但令我最唔開心係我一心想大家平息呢件事, 做中間人既我, 對事唔對人... 卻得到表妹一句又一句傷害我既說話.  可能真係好似佢話齋, 大家立場唔同, 你唔會明!  

由細到大我都好錫佢地, 尤其近幾年佢地家庭發生問題, 我更加會多關心小朋友.. 而佢地兩個一直都好聽我話, 會好尊重我.. 我仲以為, 我既愛真係可以感染佢地..

但到左今日, 我深深體會到平時姑姐向我申訴個女點激氣, 講野有幾hurt 佢... 

原來當你關心一個人, 佢唔識得接受之餘, 仲要覺得你唔啱, 真係會令人好傷心

雖然我唔係俾自己親生女激, 但我都已經感受到個種難受... 何況如果係自己最愛既女/仔咁樣同我講野?!

以前我同daddy嗌交, 我講野都係好mean, daddy以前講過一句, 如果第時你d仔女咁樣同你講野, 你就知道會有咩感受?!

到左依家, 我已經感受到.........真係好難受好難受!

對住佢地, 唔想放棄, 但好似無能為力,, 可以點做? 細路仔真係好難教........唉

祈禱... 唯一可以做既就係祈禱!

腸胃炎

今次真係'乃'野啦...

尋晚半夜四五點個胃開始痛, 仲以為自己肚餓所以唔舒服, 一直忍忍忍,,,, 痛下訓下咁捱到天光, 越忍越唔妥, 感覺似係腸胃炎既痛, 而並非胃痛喎!

其間真係好驚, 因為一直以黎醫生都話唔好食生冷/海產野, 主要原因為怕食左不潔食物會引致腸胃炎... 所以我真係好驚自己係腸胃炎啊!  

我不斷祈禱, 求神保守小魔怪既, 有咩事, 有咩痛楚我自己受好啦, 千祈唔好影響到小魔怪!!  最後好似無咁痛, 又半訓半痛咁捱到十點.

起身仍然覺得唔舒服, 仲開始肚疴, daddy見我咁樣都好擔心, 原本想去跟開我既婦科醫生到睇病, 點知咁啱得咁橋醫生放大假, 要十八號先返,  頭尾疴左三次, 最後都決定去附近疹所就醫~

奔波完一輪, 返屋企食少少米粉就食藥, 然後大昏迷...

屋企人同大少都好擔心我, 其實我都好擔心... 不過都無辦法, 唯有下次再小心d啦!  (腸胃炎原因不明, 可能係尋日食果份"牛油果雞肉三文治" 入面d料唔新鮮掛?! 但同行者都有食又無野, sigh)

今次係第一次有左小魔怪後生病去睇醫生, 雖然醫生話藥物唔會影響bb, 但我都好唔願意食, 希望食埋今晚藥後, 聽日會好返晒啦!

我不斷同小魔怪講, 媽咪今日唔舒服啊... 你要怪怪地健康生長, 唔好被我影響到啊!

p.s. 小丸子交換個到我遲d再同有關人仕作回應... 唔好意思!

7-11小丸子系列

好想問大家一個問題!

請問有冇人有儲 7-11小丸子系列啊??

我仲欠野口同學 &  山田同學啊!!! (紅圈個兩隻啊~)

如果有儲開或有多既朋友, 可唔可以同我交換啊?

我手頭上依家有以下幾個多左可以換:

小丸子/ 豬太郎 / 小渚 / 永沢 / 丸尾

如有興趣既朋友, 麻煩留個言啊!

唔該晒~

********************************************************************

我不嬲都鐘意儲呢d 細細隻公仔, 尤其係小丸子卡通人物係我至愛...有少少遺憾係無爺爺呢個角色..唉!

當我開始儲既時候, 我老豆串我一句.......

都就黎做人媽咪, 仲鐘意儲埋呢d公仔, 第時俾你個仔笑你啊!!!

無奈左兩秒, 諗左一諗, 係喎.. 第時個仔/女同我一樣沈迷呢d咪屎火~

不過最後個總結都係算啦, 一齊儲咪仲開心, 邊個話做左人阿媽就要放棄自己既喜好喎!!!  有返d童真將來先唔會同個小朋友有代溝啊... 哼~

小魔怪,, 你大個左唔好將我既心頭好亂掉亂飛就得啦, 多謝合作!!

第十三週

第13週

心情: 唔錯      體重: 無變 肚腩: 大左少少       

好多謝大家既留言&祝福.... 每次見到你地既留言都會覺得好開心, 無咁寂寞呢!

呢兩日狀態唔錯呢,, 除左有少少難入睡外 (但其實唔知係咪朝早訓太多), 總算食得, 行得, 訓得, 疴得, 無嘔都唔錯, 小魔怪開始同我配合得唔錯.... hehee  朋友係街到見到我都話我見步如飛, 好精神呢..哈!

自從係中東返香港後, 頭兩個月幾過住半死又死唔去既生活, 個時真係有少少後悔有bb, 因為真係無諗過會咁辛苦, 但到依家踏入第三個月好似真係好好多 (托賴托賴~~)

依家我平日既生活訓到十二點起身, 我既"早餐"多數每日都係飲奶食芝士三文治; 下午茶有時會約親戚去附近行下食少少野, 有時無出街就係屋企食包餅/麵包again; 夜飯多數就留係屋企姑姐煮飯我食

日日如是其實真係好悶, 有時悶到真係好想乜都唔理就坐飛機返杜拜搵大少, 但依家既我唔再可以好似以前咁潚酒, 話撇就撇..... 真係老土講句: 唔顧自己都要顧個細!! 哈~

何況下個月係我同大少既大日子, 雖然我地選擇一切從簡, 只係係酒店註冊, 同親戚朋友食個飯就算 (其實我地已經係簡單得無可再簡單, 但我仍然覺得好煩, 真係好佩服擺酒既朋友, 真係好花時間同心機!!!!),  我仍然未攪印invitation card 既野, 又未開始約朋友派餅咭, 又要搵樓搬, 好多野都未做, 我又豈能話走就走?!

依家等緊大少月底返黎, 每次佢返黎就會加快我做野既速度, 始終有佢係到, 做咩都安心d!

好期待黎緊個Weekend 可以同我一班好耐無見既BLOG友聚一聚啊!! 嘻嘻~

每次見到小魔怪既超聲波相都會回心微笑, 令人更加覺得神真係好Amazing!!!! 

P.S. 小魔怪個頭同大少一樣咁大啊,, hehee

喜訊

係時候要同大家宣怖我收埋左好耐既一件喜訊 (正式黎講係兩件,, 嘻!!)

今日八月五日係我肚入面既小魔怪終於三個月大啦!!!

雖然我唔係一個迷信既人, 係幾個禮拜大既時候已經通知左好多親朋戚友, 不過基於之前實在太攰太辛苦(嘔死左), 我實在無咁多精力去寫blog, 甚至對住部電腦太耐...  所以一直都無同大家交待我既去向, 對於關心我既朋友, 實在唔好意思~

今日同家人去照超聲波, 小魔怪大個左好多, 頭型, 身型, 手仔腳仔既線條越黎越清晰, 我覺得今日先真正感覺得到佢係我身體係存在緊...哈!  而且佢百厭非常, 手仔腳仔不停又錫又上下伸展, 睇到我同媽咪都好開心, 好得意!!!

最近食慾依然唔算好好, 但總算無嘔,, 已經好好多... 希望黎緊小魔怪都會健健康康生長, 而我唔好再唔舒服就ok,, 一切交托俾神啦!

寫到呢到先,, 遲d有精神再同大家分享!