恭喜發財!!!!!!
祝大家虎年行大運, 身體健康, 出入平安, 心想事成, 事事順利~
無錯啊! 我家既小魔怪終於好準時咁係預產期二月十日出左世啦!!!!
呢個小寶貝係我同大少最好既新年禮物 (更加係大少呢一生最愛既生日禮物, 佢十五號生日架!!)
講起小魔怪, 我地仲未同佢改名, 依家暫時都係叫住佢做BB.. 哈!
小魔怪係二月十號上午九時o係我訓訓下覺穿左羊水, 穿羊水既感覺真係好似瀨尿咁, 唔會感覺唔到. 一穿水我就彈起身, 即時去廁所沖涼洗頭, 然後打俾醫生問下應該點?!
大約十點就去到醫院, 登記檢查後, 就安排我入房等醫生..
個view唔錯咁喎, 夠光猛...
當時既我仲好行動自如, 上網, 影相, 等緊醫生到.
等左十幾分鐘醫生就黎睇我, 因為我穿左羊水, 但又未開始陣痛, 為免小魔怪受感染, 又唔知要等幾耐, 最後決定幫我打催生針! 姑娘又即時送我入產房, set晒野觀察小魔怪心跳同陣痛級數... 當時既我仲未開始陣痛, 仲order左碗通粉食, 超級肚餓呢!
小魔怪心跳好快, 每分鐘145下, 而當時既宮縮狀態仍然好微
食完通粉就開始黎料啦.... 有少少陣痛, 好似M痛咁, 好準時地每兩分鐘勁痛一次, 然後又好似無野咁.... 當時既我仲覺得自己忍到痛, 無問題既!!
大少全程係到倍我, 我痛緊既時候佢係到周圍影, 打電話, 大家都好期待小魔怪出世
再過多大約一個鐘, 姑娘見我既宮縮狀況越黎越嚴重, 開始有少少頂唔順, 所以就俾'笑氣'我聞, 但其實我覺得無乜用! 個種痛真係好似M痛 + 腸胃炎痛既20倍, 而且越痛越密, 休息既時間都無...
姑娘不時入黎幫我睇開到幾多度, 我就由初初一兩度, 好快咁開到七八度... 姑娘就即時call醫生去醫院 (因為我個醫生唔係醫院註診醫生)
我估大約三點, 姑娘就開始準備好, 等醫生到... 而當時既我已經痛到想死, 仲想大便添啊!!!! 我之前已經睇過人地既經驗分享, 想大便就等於想生仔, 所以用大便既力去出就啱, 但最後我仍然都係疴唔出阿仔, 反而大便就疴左 (真係醜死人)
助產姑娘不停幫手搓我既肚, 想推小魔怪出黎, 而醫生又不停話見到頭髮啦, 你加油啦, 出力啦... 但我可能真係唔識用力, 用極都出唔到.... 當時既我真係有諗過, 我唔得啦, 可能要開刀!
但醫生佢地不停叫我出力, 又用吸盤引產 (我唔知佢點用, 但我感覺佢好似塞D野入我下面, 個幾下痛上加痛, 真係痛到想死, 但又死唔去)
大少係則邊不停鼓勵我, 叫我再出力d, 但我真係出盡力都唔得,, 差d想鬧人! 當我好痛時大叫, 醫生佢地又叫我唔好嗌, 驚我蝕左道氣!
最後經過四小時既折磨, 小魔怪終出世, 體重有7.7磅.
我既感覺有如疴左一抽野出黎, 舒服晒.... 之後醫生幫我縫會陰, 但我已經無晒痛既感覺, 因為經歷過十級痛後, 其他既痛已經唔算係乜.
對於今次生仔既經歷, 我諗我真係一世都唔會忘記! 因為實在太............ 痛啦!
之前我仲以為自己忍到, 但原來生仔呢種痛, 真係勁痛到無法形容
不過雖然話痛, 但感謝神既眷顧, 我可以係咁短時間內生左小魔怪, 已經係好幸運! 而且順產雖然痛, 但我生完兩個鐘就可以落床去廁所, 第二日已經行動自如, 三日就可以出院.
見到小魔怪健健康康咁出世, 乜都抵返晒!!
媽咪既心肝頂啊!
不知不覺小魔怪已經八日大人仔啦... 日日大家都好似摸索緊對方, 而要照顧小BABY真係唔容易, 我同大少日日都無得訓, 但又要頂硬上, 生左b之後真係更加明白父母既偉大
第八日人仔
F
回覆刪除