小魔怪兩週大

~~~多謝大家既留言同祝福, 真係好多謝大家~~~

小魔怪不知不覺都兩個禮拜大

我同大少感覺好似湊左好耐咁... (真係好辛苦!)

未湊過BB真係唔會知湊一個BB係幾咁辛苦, 唔怪之得依家咁多人都唔願生,

因為如果體驗過湊BB既辛苦 (真係貼身湊, 連埋晚更, 唔係係咁二倍玩一陣個隻湊喎!), 要踏出呢一步都唔容易, 要放棄好多野, 無晒自由!!!!

我同大少到依家都無覺好訓, 因為我地無請工人, 大少就做大工人呢個角色 (呢個時候做老公既, 真係好重要, 如果唔係大少不停係身邊支持我, 幫我手, 我諗產後抑屈真係好易有!), 而我就更加訓得少, 因為餵人奶關係, 每兩個幾三個鐘就要起身一次, 好攞命呢! 

不過對我黎講最痛苦除左無得訓外, 就係我個奶頭俾小魔怪開頭吸到損左, 跟住一直都keep住食人奶, 所以遲遲都唔好, 每次一吸損左個邊既乳房, 我就真係痛不欲生, 流住眼淚忍痛俾佢食, 食完都仲係痛, 痛到入心個隻!!!!!!!  (但好感恩, 我不斷禱告, 今日個乳頭有明顯既好轉, 無咁痛楚啦~)

但話雖如此, 每當見到小魔怪眼仔碌碌或者訓得好'林', 好乖巧個樣時, 真係乜野辛苦都抵返晒!

第四日大 - 仲未完全收晒水, 成舊飯咁!

五日大 - 上星期好凍, 諗住俾小魔怪戴下帽仔, 點知頂頂都太大... 唉! 出年又唔啱戴, 又嘥晒我D錢錢!!

大約一個星期大 - 個樣開始收水, 輪廓慢慢出黎, 成日都古古惑惑咁!

每次見到佢呢個眼神, 我同大少都俾佢'電'死左...哈!

小魔怪不愧係小魔怪, 平時醒既時候呆呆滯滯, 無乜笑容, 但一訓著左就成日不停笑, 唔知係咪同天上既婆婆玩緊呢?

原來自己生既BB係自己心目中真係幾醜樣都覺得好可愛,, 小魔怪簡直係我既心肝掟!!!

有左數碼相機真係好方便, 依家機不離手, 一見到有乜動靜就係咁影影影.....

15日大 - 越黎越好力, 唔知係咪我陀緊時食得乳酪多, 佢D骨骼好硬淨, 仲要好好力啊! (如果有左既朋友想BB實淨D, 記得食多D乳酪, 係我既陪月姨姨教架)

小魔怪, 你要健健康康, 開開心心咁成長啊!!!

其實小魔怪好似我老豆, 對眼簡直一樣!!!