早前有幸被邀請參加為期1個月的"碧濤洗衣球試用計畫"
佢地知道我家中有BB, 所以就俾左一個專for BB用既 "防敏洗衣球",
呢個洗衣球聲稱可以防敏, 防濕疹....
對於洗衣球呢d產品, 我自己本身都無乜研究, 亦唔多清楚佢既原理
但聽到係對bb好, 可以防敏&無化學成份, 就係呢兩個Point都值得一試!
呢個款只係for BB 用, 如果洗大人衫就有另一隻款, 係有兩個球的.
用左幾次, 發覺都無乜特別好/唔好!
可能BB衫始終都唔係好污糟, 所以效果唔係話好明顯~
但係呢個洗衣球聲稱唔需要落任何洗衣液&柔順劑, 試過一次後...
大少就有意見, 因為我地屋企無露台掠衫, 好多時d衫係掛係窗邊晒乾, 所以如果唔落柔順劑, d衫著落無左陣香味, 佢就唔鐘意囉!
所以依家我用呢個洗衣球都會加返bb專用既柔順劑, 咁樣抱起承熹上黎都覺得香噴噴!
如果大家對呢個洗衣球有興趣或想知更多詳細資料, 可參考官方網址:www.biocera.com.hk 或致客戶電熱線 : 2915 9664
承熹呢個時候開始好好玩, 佢可以無啦啦都笑一餐
我同大少都覺得, BB仔最天真無邪既笑聲係好好聽... 咔咔咔, 大人係點扮都扮唔到!
以前承熹成舊飯咁, 有時見佢訓著識得微笑已經甜到爆!
再大少少, 開始識得清醒時同人開口笑, 但仍然未有聲...
依家, 除左會係咁ee ur ur 講野外, 笑既時候都會咔咔咔, 真係好得意!
我要記低承熹成長既點滴, 呢d都係我將來老左既美好回憶啊!!!!!!!
每次見到承熹, 有時自己都會好肉緊, 覺得自己個仔真係好得意
(相信每個媽媽都會有此想法)
見到佢一日一日咁大, 個身一日一日咁拉長, 體重一日一日咁增磅,
真係會有少少唔想佢大得咁快! 尤其睇返之前d相, 佢真係好細粒, 一pat豆腐咁!
記得以前媽媽經常會無啦啦望實我 (可能因為我地少見), 媽媽會話: 點解你大得咁快, 我好想你返去以前BB既時候, 你BB時個樣真係好得意, 就好似尋日發生咁,
但依家你已經牛高馬大! (就算我已經廿幾歲, 媽媽仍然經常懷念嬰兒時期的我!)
以前我會覺得媽媽好煩, 成日望實我(我有少少唔自在),
又提住我細個時呢樣個樣, 好似真係好想我唔大咁!
到左依家我做左人阿媽, 我深深感受到媽媽既感受!!!!!
由承熹day 1出世到依家, 每日既點滴, 我自己一靜落黎既時候都不停回味,
尤其睇返d相, 真係覺得佢大得好快! 有時我仲會同大少講笑,
可唔可以將阿仔窒返入我個肚到啊? 哈哈
我相信將來有一日承熹大個左, 成家立室或有自己一番既事業,
已經唔再係我手抱既小BABY時, 我都會十分十分十分懷念今日既一切!
依家d小朋友真係好幸福, 相信大部份父母都必定會買較好既相機/攝錄機不停為自己既仔女影相, 錄影, 恨不得將佢地每分每秒既成長過程都一一紀錄
我自己都唔例外, 尤其有左facebook呢樣野, 更加會影得多左,
好多無聊野都會影一大爛餐即時用iPhone upload上網同親戚朋友分享~
我好多親戚雖然唔係成日見, 但大家都會知道承熹既近況,
時不時就打黎話: 你個仔好攪笑, 咁快識撩人講野啦?
或者 : 做乜佢塊面抓損左架? 你無幫佢剪指甲?
又或者 : 做乜你個仔大得咁快, 好似唔見佢一排又唔同樣等等等等....
其實, 係FB分享真係有好有唔好, 好既就好似可以同親人close d, 知道大家既近況;
唔好既... 就係有機會俾唔識/唔熟既人知道自己好多事!
所以我既FB盡量只會add返自己真係識既朋友, 唔識既人, 唔好意思...
真係可能拒絶左大家!
最近承熹啱啱打完第二支5合1 , 醫生話承熹個size係中size, 生長速度無之前標得咁行, 可能因為佢近呢個月有時唔肯食晒枝奶掛?!
唉, 我都唔知... 迫佢又迫唔到, 希望下次再去見醫生時唔好話佢唔達標啦!
另外, 醫生之前都話過承熹個身體發展係o係中間線, 正常的!
唯獨係個頭圍就細左少少, 唔到中間線... 噢, 唔通承熹遺傳左我D細頭基因?! (大家都知我個身好肥, 但相對塊面就係無咁肥)
點都好, 都唔驚得咁多, 等佢大D再睇下點?!
做阿媽就係咁, 養兒一百歲, 長憂九十九.
我唔想自己變成一個神經質的媽媽, 所以好多野我都會叫自己放鬆d, 唔好過份緊張! 將一切交俾神, 神自有佢最完美既安排~
呢個傻豬以為姑娘同佢傾計同佢玩, 點知俾人吉左針都唔知, 笑死我!
哎吔, 又好懶添, 成日想keep住兩日一誌, 誓要記低承熹成長既點滴, 但無奈...
都係敵不過條懶根, 唉! 
有時都諗起, 係時候檢討下自己既壞習慣, 因為承熹好快好快就會開始懂事,
如果我做唔到一個好榜樣俾佢睇, 又點可以期望佢會有好既生活習慣?!
承熹終於四個月大啦, 時間過得好快好快, 學大少話齋 : 我都未Save得切之前既記憶, 但個仔已經四個月大啦!
見到呢隻豬仔, 由初生只係識'食訓疴', 對住佢等同對住條魚咁, 你有你指有畫腳, 佢有佢係自己既世界話之你!
到依家呢隻豬仔不再豬, 佢彷彿大個左好多咁, 除左都係食訓疴外, 仲識得俾多好多反應.
~見到人就識笑 (尤其對住我同大少)
~識得扭要人同佢玩/傾計
~開始識得想學人坐係到, 俾手佢捉住自己個頭會用力想抬起起身
~識得見到陌生人會有疑惑既感覺
~識得搵我同大少
~識得睇人眉頭眼額 (有次佢望住我想同我笑, 但我扮喊, 佢即刻唔笑望住我, 跟住我同佢笑返, 佢先笑)
~識得模仿人, e.g. 伸脷, 講野
~識得唔鐘意就擰歪面, 等等等等等等
但就係未識轉身! 我都唔知點教佢?
BB d皮膚真係靚到無得頂, 又白滑又嬌嫩, 最啱影黑白相, 真係好羨慕呢~
前幾日適逢承熹四個月大, 契爺同契媽都係個日正式同承熹攪左個上契宴, 承熹真係好幸福啊, 咁多人錫!!!!
作為媽媽既我都動起來做左個蛋糕慶祝一下!
承熹, 你大個仔都要錫契爺契媽架~
做左人阿媽後, 睇返以前d相, 個樣真係差好遠... 師奶左! 
雖然, 行為上唔係相差好大, 但是.... 殘酷的荷爾蒙變化 + 歲月飛逝 , 真係令到個人唔多唔少多左一分'成熟美'
變型金剛般既身型已經唔想再多提(長期戰鬥), 但其他方面我真係唔想自己再繼續沉淪下去!
我想keep住自己唔好因為做左人老婆, 做左人阿媽就變得脫節, 變得師奶, 所以我對自己鐘意做既事我仍然會盡量保持, 唔會因為有左阿仔乜都放棄! 例如: 返教會, 行街shopping, 整野食, 同朋友hightea相聚, 扮靚, 玩FB等等等等
最近, 終於實行左一件想做好耐既事, 就係 ----- 激光脫斑(雀斑)
感恩自己既皮膚性質尚算OK, 雀斑係由小學開始已經有(是遺傳的), 由細到大都唔鐘意自己有雀斑, 見到人地塊面又白又滑, 點解我就有咁多粒粒呢? 好心的朋友們好多時都話, 都唔係好覺姐! 有d仲善良到話: 有d斑斑似鬼妹, 好可愛!!!! 
美麗既謊言當然好聽, 但有時過份既美言我都真係........接受唔到囉!
所以, 今時今日既我, 既然樣衰到極點, 我都唔再顧慮太多 (以前怕做激光/彩光有後遺症, 會再生, 又呢樣又個樣), 做就做, 就算真係keep唔長久, 但都總算曾經擁有!
又因為生左承熹後已經周身唔得閒, 但我又忍受唔到自己烏烏wer wer咁出街, 化左粧後又怕抱阿仔時佢會掂到d粉, 所以加埋阿仔呢個皇牌理由, 我同大少講完後, 佢都十分支持我去做!!! 哈哈
經朋友介紹後, 選擇左Evvus (同Dermes同一集團)
我自己本身唔鐘意join任何做Facial/瘦身/脫毛/阿支阿左既course, 一來我無乜興趣, 二來我真係好怕d Sale姐姐不斷煩你煩你煩你去落搭, 所以就算收到任何免費又好/半價又好/試做價又好既coupons我都唔會去試.
但呢間因為有朋友啱啱做完, 佢同我講呢到既職員係唔會迫你join任何野, 而且服務又好好, 所以我先破例一試!
一上到去見到個reception好光猛, 感覺好舒服! 再行入去就會見到一個大露台 + 無敵大海景, 令我原本緊張既心情即時舒緩不少! 至少感覺佢地呢到好專業, 唔係一般美容院仔(我好怕去細細間的美容院, 可能因為自己做過下呢行)
坐低先會問你飲d乜, 我選擇了竹遮茅根
由於我平日下午去, 無乜人, 感覺好寧靜..
我問職員可唔可以影相, 因為我覺得好靚, 佢地都好Nice, 仲打開露台俾我出去四周圍望, 任我影 (當然, 站於佢地立場覺得有人幫佢地做下宣傳都無壞). 點都好, 好過有d公司/餐廳, 影相張都大為緊張
整個過程令我十分滿意, 無論職員既服務態度以及醫生既專業知識都令我好放心去做, 雖然做既時候我心理上都有少少怕痛, 但原來如我朋友所講, 真係一d都唔痛!!!
醫生同顧問都好好, 因為我d斑分怖範圍都幾大, 所以佢地建意唔會一次打晒d斑先, 會分兩次打, 我初時都無意見, 但佢地都會主動話: 雖然分兩次打, 但我地只會計你一次既Quota (因為我join既plan係大約10K/三次). 算佢地老實! 另外做完整個療程仲有保養期添~
我唔知呢個價錢比起一般出面做既算係貴定平! 但在我立場, 我覺得呢個價錢有咁既環境, 服務同專業醫生去提供服務俾我, 我覺得安心好多! (因為我聽朋友講過, 出面有d美容院係普通美容師幫你做, 呢樣係我最concern)
初時我怕做完會好嚇人, 要立時飛的返屋企, 仲帶備埋太陽眼鏡及口罩遮面. 但原來做完後感覺唔差, 只係帶口罩都ok, 我仲係ISQUARE行一陣先再坐地鐵返屋企.
適逢尋日係佢地新名成立日, 攪左個慶祝派對, 因此我都被邀請參與. 當中每人得到兩份小禮物&二百蚊現金券換佢地既products (唔洗買滿幾多錢, 即時就咁換就用得), 另外仲有抽獎活動, 我抽到佢地500蚊現金禮券, 但要join 佢地既package先用得! (呢個就有所保留, 即係又要我幫襯佢)
依家被激光打過既雀斑明顯紅色一點點, 好深色, 過多三日開始會甩焦, 慢慢大約一星期內就可以甩晒. 我依家好期待見自己既新面目啊!!!! 諗起以後唔洗再花時間去遮瘕化粧我就覺得好開心... 哈哈哈哈哈!
大家細心等待一星期吧... 我會upload下照片看看效果會唔會令我失望先!
