停不了的啜----手指

係時候講下5m2w既承熹生長狀況

唔知做乜鬼, 近呢兩個禮拜, 承熹明顯開始唔肯個個都跟

好多時奶奶或有d親戚過黎探佢, 一o黎到想抱佢, 佢就喊, 喊到扁晒咀好似好慘咁!

但佢又唔算怕生保, 平時推佢行商場, 行過d人撩佢, 佢又會同人笑, 同人玩, 真係要睇佢心情

不過最麻煩係, 依家有時連大少都攪佢唔掂, 好似當我煮緊飯時, 大少係廳到同佢玩, 佢都嘈嘈閉, 一抱佢去廚房門口見到我就即刻收聲仲會笑

無可口非, 做阿媽既我見到個仔咁痴我 我都開心既, 證明我係佢心目中係最重要/最鍾意既人, 我既付出(辛苦)係無白費!!!

但另一方面睇, 我其實好怕小朋友咁痴身, 最怕佢再大d會痴到一見我唔到就喊, 死都要我倍實咁我就屎得! 

大少都有同承熹講: 媽咪成日鬧你(都唔係鬧, 不過有時佢唔食奶又扭計我會語氣重少少話佢), 又唔抱你, 你仲乜仲咁痴媽咪????

哈, 可能呢啲真係天性... 鍾意聞到我陣'除', 哈哈! 

承熹食手已經食到忘我境界, 無時無刻都係咁食, 而且勁多口水. 啲人話成日食手, 多口水又疴豆腐嗅嗅就係出牙仔徵兆, 雖然承熹都中左九成, 但我暫時都未發現有出牙仔.

佢啲口水多到一日要換成八至十條口水肩, 紗巾又係十條八條走唔甩, 好彩依個年代有尿片, 否則除左要洗紗巾, 口水肩外, 仲要洗埋尿布, 真係成間屋俾埋佢都得 (依家掠衫都己經掠到成房係)

有人問我 : 佢係咁食手唔好架喎, 不如俾奶咀佢食!  但我心諗.. 我好難先同佢戒左奶咀, 依家又俾返佢食, 無野啊?  同埋我個人認為外觀黎睇, 食手無食奶咀咁醜怪, 哈!   同埋我諗食奶咀/食手都係佢呢個時期既生理&心理需要, 再大個啲應該會有改善! (再唔得先試擦白花油啦!)

食到津津有味, 最抵死係一食完奶佢更手就會以九秒九放隻手入口再食, 但佢唔係未飽, 只係心理需要!

曾經睇過一篇報導話:

食人奶既bb由於埋身食既次數多過食奶粉的bb(因為奶粉襟飽啲), 相對佢地做吸啜呢個動作既次數&時間都係多過食奶粉既bb, 所以佢地食手指既需要會較食奶粉既bb少.

而食奶食得慢既bb由於吸啜奶咀既時間較耐, 所以食奶食得慢既bb比起食奶食得快既bb對啜手指既需要又會較少

咁即係話, 吸啜呢個動作係bb天生既需要, 給予越多, 佢既需求就會越少...

但好可惜既係............. 承熹一直都係食奶樽 (人奶+奶粉), 所以埋身食既次數較少; 另外呢隻衰仔好似前世無食過飯咁, 係佢肯食既情況下黎計, 佢一般七分鐘可以KO一枝180-200ml既奶...

所以種種跡象黎睇.... 佢係極度缺乏吸啜呢個動作, 所以引致佢依家手不離口! 唉~

我唯一可以做既係, 密密同佢抺手, 換口水肩, 換紗巾... that's all!  

另外呢兩日承熹食奶又係唔穩定, 好多時後勁不計唔肯食, 跟住我就試下用spoon餵佢食奶, 初初佢個樣好似好怪咁, 唔想要.... 但試多兩啖, 佢就開始識得吞, 唔再吐出黎... 後來佢仲係咁追食, 未隊到埋去個口邊, 佢已經開定個口好似好想食咁.

唉, 呢個仔都係貪新鮮架啦 (似我),, 不過當係俾佢試下用spoon餵係應該點吞, 下個月開始餵糊仔時麻煩你多多合作啊!

我覺得呢張相承熹好似鄭則士,, hahahahhahah 仲要係情越雙白線入面揸的士個LOOK, 好似一隻手放係車窗到, 等緊生意!! 哈

最攪笑係有一次佢係到扭計, 我無彩佢(突登眼尾都唔望佢, 但其實我坐係佢隔離上緊網), 點知過左大約十分鐘無晒聲, 我望一望佢, 原來佢訓著左!  但佢隻手放左係個玩具呔盤到, 好似揸揸下車好眼訓訓著左, 哈!!

阿仔, 大個你唔好咁, 會累人累己架!!!!!!

見到人地既BB有好多頭髮, 點解阿仔你無乜架???? 唔通遺傳左公公啲基因? 屎火~

5m1w

又要報下數, 承熹五個月大啦 (正確係5m1week)

四個月去打針時磅過有7.5kg, 屬於中size baby. 一日四餐奶, 每朝都唔定時食, 由佢訓醒先食, 大約四個至四個半鐘一餐奶, 每餐平均食180ml-200ml, 未開始食糊仔或其他食物, 因為醫生話依家醫學界證實左半歲前係唔適宜俾bb食除奶以外既野, 容易引致對食物敏感!  

日日都有poopoo去! 每晚大約十點半食最後一餐奶(開始要再較早d食&訓), 食完訓覺, 大部份時間都可以一覺訓天光, 大約訓9-10hrs, 但偶然都會喊醒一兩次, 要抱起拍下佢再訓過.  每朝食完奶玩大約半個鐘, 佢可以再訓過, 一訓又可以訓三個鐘, 有時仲訓到四五個鐘, 好鬼賴訓 (似我, 哈) 仲未識完全反身, 只可以打側身.

但呢兩日承熹突然間好似訓少左, 之前每餐食完玩大約一個鐘都可以訓一個至個半鐘, 但呢兩日訓半個鐘就醒, 甚至唔訓....(可能因為前日有人黎探我地嘈住佢, 同埋今日出左街) 訓唔到就變得有少少扭計!

依家承熹識得坐係軟墊到自己玩, 開始鐘意手多多周圍攞野, 但又未好識運用手去揸實一樣野唔放, 一攞到好快就放手!  同埋識得捉住自己隻腳玩... 我好期待佢可以捉隻腳放入口食, 哈! 我覺得呢個畫面好得意!

同埋佢依家開始知道自己係可以講野, 因為當我地耐無理佢, 佢會望住你大叫, 話你知'我係到啊, 搵人理下我啦'!!!!  真係俾佢笑死~

同以往一樣, 捉住對手仔就即刻'登'行對腳企係到, 一有得企就勁開心, 繼而不停彈下彈下 (佢就開心, 但我就攰屎!!)

之前一直都好少買玩具俾佢玩, 因為知道佢都未真係識玩, 而且對BB黎講, 乜都可以玩一餐 (尤其尿片個包裝袋, 每次換片聽到膠袋聲都用手捉住)

但自從上星期去完朋友屋企, 佢個囡囡九個月大, 屋企勁多玩具, 承熹可以自己一個乖乖地坐係軟墊到玩左兩個鐘都唔嘈, 我諗.... 係時候需要買d玩具俾佢, 激發下佢腦部發展啦!  

好多朋友&親戚都讚我地湊得承熹好好. 無可否認, 承熹依家都算係易湊, 佢好少亂喊, 又唔需要抱住'乙水'訓覺, 最乖就係唔怕生保 (除非啱啱訓醒), 見到陌生人都會對住人笑, 個個都話佢係開心寶寶.  有朋友問我, 你點教佢, 教到佢可以唔扭抱, 可以自己一個乖乖咁玩? 我答: 我都無特別教, 我唔知關唔關因為我地夠狠心, 唔會一聽到佢喊就抱?!

老實講, 身為新手媽媽既我, 好多野我都唔識, 亦都唔知咁做會唔會撞板? 所以係呢個湊仔過程中, 我更加體會到神既大能. 以我o係無工人, 無家人(除左大少)幫忙下, 承熹都算係肥肥白白, 健健康康咁成長, 真係神蹟!!!!!!!

如果話我叻, 不如話神真係好眷顧承熹... 由陀住到出世, 每分每秒都保守住佢既平安, 出世後又保守佢既健康 (touchwood都無乜唔舒服, 每次打針都無發燒, 無咩大問題), 最感恩係佢無咩炒百日既情況出現, 否則我實有產後抑屈!!!! 食奶方面都算好合作 (之前話佢唔肯食奶, 我仲係咁話佢唔乖, 但後來發現原來chuchu母乳奶咀個頭爛左, 個十字孔變得好大, 怪不得佢食親都好似好急咁, 但其實係吞唔切, 我同大少仲猛咁鬧個仔: 你咪鬼食咁急啦!!!!!  佢一吞唔切, 就擰歪面, 來回試左三四次佢就怕左唔肯食! 可憐既承熹有一次仲俾我打左佢大脾一下, 俾我鬧佢唔聽話!)

所以話... 我點會係一個識湊仔既好媽媽? 只係神保守承熹夠硬淨, 否則我都唔敢諗佢依家會變成點?!

之前睇電視講到依家既家長都想為仔女安排入名牌學校, 要小朋友好細個就去上乜上物去準備入學面試, 當中亦有父母要學既面試對答.  佢會問到你對小朋友將來有乜期望啊? 如果你答: 無架, 只係想佢快樂, 健康就夠!

原來呢個答案係唔OK的, 會被視為唔實在既答案!  家長應該答: 我想佢做一個有責任心, 對社會有貢獻既公民!  

其實我對佢呢個答案都認同, 但我無諗過如果答: 我想個小朋友快樂健康就夠會係令到面試扣分?! (聽完我O晒咀)  因為係我心目中, 我真係覺得健康, 快樂先係最緊要.  當然, 做一個有責任心既人都係好緊要, 但呢樣係睇家長點教, 唔係你想就得囉..

我同大少都認為, 其實要小朋友身心正常地發展得好, 最緊要都係睇家長俾幾多心機落去教導, 並非入名牌學校就為之一定好.  與其早早帶小朋友去上playgroup, 不如多d抽時間去同小朋友親子, 親自教導佢, 多d互動, 好過交俾工人日日帶佢返playgroup.   不過, 我要澄清, 我唔係反對人地去返playgroup, 我只係講如果認為越早俾小朋友去上乜上物就等於會教好個小朋友的話, 我相信父母親自既教導會比起呢d更重要

另一樣我又係極之唔認同既就係眼見有d人走去買幾萬蚊既乜乜美語世界教學材料俾個小朋友就覺得一定好, 最慘係買左返去只係叫工人/爺爺麻麻播俾佢地睇.   實質係, 你有你播, 小朋友有小朋友唔知係咪真係睇? 其實呢d教學材料應該係父母同小朋友一齊去睇, 從中去教導佢地學習, 而並非叫個工人/老人家播俾佢地睇, 個細路就會學曉晒d生字.  所以我好怕聽到d人話買左幾萬蚊野俾個仔/女, 但佢都學唔到野.... (但個父母係無參與過, 除左俾錢), 我聽完就會好激氣, 因為我覺得d家長實在太不負責任啦, 以為買肯俾錢買就大晒!!! 小朋友唔會天生就識自己讀書寫字學好行為, 呢d一切都係要靠父母去俾心機去栽培架~

唉, 可能我自己係單身家庭長大, 所以對於小朋友其實真正需要d乜我係好明白, 其實好簡單.. 真係只係父母抽多少少時間倍玩, 倍傾計, 倍教學已經夠晒, 其他野只係附助.

嘻.. 其實一家唔知一家事, 個個教細路都有自己既一套, 我都係講我個人既睇法, 所以如果大家唔啱聽可以當我發嗡瘋, 哈!!!!

獨一無二奶粉袋

自承熹出世後一直都物色緊一個合心意既奶粉袋 (其實係俾自己多一個藉口買袋, 哈!)

未生承熹之前, 一心諗住買個BV袋做奶粉袋, 但.............現實d諗, 算吧啦! 一個皮袋, 未裝野都已經重, 何況要放奶樽, 奶粉, 熱水, 尿片, spare衫褲口水肩?!

如果我個膊頭承受得到, 我之前買買埋埋既袋就唔洗打入晒去冷宮!

做左人阿媽, 雖然依然貪靚愛shopping, 但都不得不向現實低頭, 做個踏實型既人

尋尋覓覓, 要搵一個見人得, 但又要輕巧方便既奶粉袋實在不易 (對我黎講)

要款色獨特, 大方得體得黎又要夠大好孭, 最好又帶點點童真感覺... 去邊到搵?!

皇天不負有心人... 終於俾我搵(等)到! 簡直係執到寶~

一向以來我都好支持自家製既野, 一來心機係無價寶, 二來貪佢夠獨一無二麻

感恩我身邊都有唔少'有天份'既朋友, 所以好多時我都會受惠呢~

今次要推介俾大家既就係'菇菇姐' 自家製既袋! (其實仲有好多其他野)

點解要推介, 因為認識菇菇姐既人都會知道佢既畫功了得, 佢畫既野往往係簡單線條/圖案, 但卻帶得出一種特別既感覺! 我真係好鐘意~

同埋我知佢真係一個好有心機, 好好耐性既人, 所以佢做出黎既野一定係'良心出品', 哈~

感謝神俾佢有機會去做自己有興趣, 有天份既野, 呢樣真係好難得呢!

可能真係有天份 + 自己鐘意 = 佢既作品好多都好靚, 好吸引!!! (恨死我, 我都想自己有咁既本事)

唔講咁多, 大家睇睇就知點解我會咁興奮!

一收到個包裹都已經令我覺得好Warm 啊!!!!! 連個envelope都有畫公仔, 好得意, 好似真係收到份禮物咁..哈

一打開, 道先發現有個好靚既牌仔, 一睇呢手字就知係出自菇菇姐手筆...

完完全全感受到"handmade with Grace & Love", 哈里路亞~

大家都係基督徒, 佢既作品好多都注入神是愛既提醒, 真係好鐘意.. 好有意思!

呢個款其實我係有俾到少少意見, 話俾菇菇姐知我大約想做一個咩style既袋, 跟住佢會照我大概既意思畫幾個草圖俾我揀, 我可以話肯定係獨一無二! 型~

話明奶粉袋, 當然為承熹而買, 所以個主題我都會想用返有BB既感覺, 同埋加左承熹個名落去, 係咪好得先!?

呢d圖案就係菇菇姐既設計, 佢好細心, 做一個To bring list 出黎, 真係有少少提醒作用. 因為我真係試過帶漏左奶粉出街, 攪到承熹無奶食! (慚愧中)

我自己本身唔鐘意太花巧既設計, 所以菇菇姐畫既圖案好啱我, 簡單得黎又有少少色彩, 唔會太單調.

Lincoln.... this bag belongs to u!!!!!!

市面上好多呢d類似既環保袋, 好多時都係無拉鏈, 但我怕有時好'論盡'會倒瀉野, 所以叫菇菇姐幫我加條拉鏈, 咁就無有怕! (又要讚一讚自家製既袋幾咁好, 你有咩要求如果可能的, 都會配合)

另外仲有仲有我特別request既墊底版, 因為我唔想個袋放左野後'墜'晒落去, 無晒個袋型, 所以我又要求菇菇姐幫我加塊軟墊係底, 咁樣放野好放好多!

細心既菇菇姐特意唔車死塊軟墊係底, 方便我隨時唔想用塊軟墊時可以攞開!

個袋仲可以正常洗滌, 唔需要話點樣特別護理, 啱晒我呢d懶人!

總括黎講, 我真係十分滿意呢個袋.... 我個人覺得比起任何一個名牌袋更靚, 更有意思!最重要係.. 價錢都係好合理(大約二百幾蚊到, 視乎你想要咩size, 布料, 配件等, 適隨尊便), 以後送禮物俾人又多個選擇, 唔洗買黎買去都係個d周街係既野, 信相收到呢d獨一無二既禮物既朋友, 一定好窩心!

如果大家有興趣的話, 可以去菇菇姐既FB到睇睇其他作品/查詢
http://www.facebook.com/?ref=home#!/pages/faith/125959747420916?ref=ts

 

菇菇姐, 唔該晒你!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!