9m雜炒

Playback返兩個禮拜前既事先!

兩星期前朋友帶左佢姪女上o黎探承熹, 女仔即係女仔, 好似天生母愛氾濫咁, 一見到承熹就好錫住細佬, 順應晒佢要求

初初承熹見到佢都有少少怕醜, 但好快就肯同姐姐玩, 仲肯坐係姐姐大脾一齊睇相!

妹妹得四歲, 承熹坐係佢上面好得意, 兩隻都細細粒!

好專心咁睇VCD

坐多一陣, 妹妹終於頂唔順嗌救命: 啊... 弟弟好重啊! 姑姐, 可唔可以抱走佢啊????

哈~ 細路仔最可愛既就係'真性情'!!!!

同一日, 夜晚去參加大少朋友既婚禮! 姨媽(大少奶)買俾承熹件禮服printed T又出動, 因為再唔著就唔啱架啦, 唔好嘥, 著多次!

承熹個日唔知做乜勁痴身, 可能唔夠訓, 又多人, 大少抱佢去同朋友social時 (我無跟去), 突然聽到遠處有BB嚎哭聲, 原來真係我家承熹, 哈! 失禮死人~

酒店果然設備都完善啲, 問佢攞BB櫈, 真係成張BB專用既high chair攞黎, 仲有埋前面個張枱, 勁! 如果酒樓都有呢啲較安全既BB櫈就好~ (發夢中)

 

某日, 承熹契媽帶住一大袋戰利品上黎, 全部都係契媽係大阪買返來既手信, 大部份都係承熹既衫&玩具, 我都有份, 哈哈! 多謝契媽~

承熹依家一開心就會自己拍手, 仲要拍到有聲出, 好攪笑!  見到佢雙手肥嘟嘟, 手指又肥又短, 真係好鬼肉緊~

承熹, 你想打契媽??? 唔係啊, 我見到契媽有眼屎咋..wakakkakakaka (設計對白)

契媽買左幾件GAP既衫俾承熹, 其中我最鐘意既就係呢套牛仔睡衣

著左上身真係好攪笑, 因為佢係貼身剪裁, 但有彈性, 唔會緊... 將承熹玲瓏浮突既身型表露晒出黎

 

揸住條iphone charger, 成隻胡迪咁~

細路, 你有左幾多個月啊? 做乜鬼個肚腩仔好似你阿媽咁大架?

擺多個靚pose俾你地睇, 頭大身細, 丁字腳!

又一邊食生果, 一邊玩yoga

隻衰豬有時笑笑下就會打側塊面笑, 成個女仔咁, 引死路人甲乙丙~ *

*註: 甲=媽媽(我), 乙=爸爸(大少), 丙=公公(我老豆), 哈哈!!!