11months

好多謝大家之前留言俾我既祝福,

好Sweet呢!!!!!

 

1月10日 = 承熹11個月大

仲有一個月就一歲! 仲記得上年既一月, 大少剛剛從杜拜返港倍我等生, 24小時貼身既照顧&倍玩倍食, 令我係臨生前既一個月突然肥左十幾磅! 就係呢十幾磅攪到我生完都肥左成個碼...(原本人地一直keep得好好, 頭九個月都係重左二十四磅到, 但到生個日, 變左三十幾磅! 嗚~~~)

不過呢啲都係小事, 最感恩係神既保守同眷顧, 俾我可以好順利咁生承熹, 而佢又健健康康, 平平安安. 感恩~

十一個月大, 突然覺得佢真係大個左好多!

承熹已經無之前咁多肉, 可能拉高左 (但依然係好重手), 唯獨手仔腳仔仲好似BB咁, 肥嘟嘟!

承熹依家完全係識聽人講野, 教佢做乜, 簡單既佢好快就會學曉! 鬧佢都會知, 大聲喝佢, 佢依家會識驚, 會識停止!

依家最新既動作:

-佢會好自動咁同人拜拜 & 飛吻 (我地一出街, 佢會好開心咁同我地拜拜)
-教左佢兩日'恭喜發財', 佢就會做'請請'動作 (呢個真係學得好快)
-仲有最新既'點蟲蟲', 佢會識得樹起一隻手指, 兩隻手點埋一齊 (呢個係公公教的)
-同埋係十個幾月已經學自己行, 不過唔穩, 到今日, 佢已經可以由廚房行入尾房, 仲可以唔洗扶自己轉彎!  不過有時叫佢行入廁所沖涼, 佢會剎唔切掣, 行過龍, 行入左尾房! 哈, 見到佢行路真係好好笑~
-仲有老公同佢玩左一陣, 發現佢原來識將膠兜(由大至小個啲) 好齊整咁放好 (不過當然係你要順次序俾佢, 佢就會一個一個叠好, 唔會亂放)
-依家沖涼開始教佢分別啲公仔, 咁啱佢好鐘意'得'呢個音, 教佢Duck, Fish, Turtle, etc.. 佢會記得鴨仔圖案既係duck duck, 佢會望住自己叫'得得'

我覺得小朋友真係好得意! 佢地個腦部發展係可以咁迅速, 而且唔好睇小佢地係Baby, 好多野佢地都明白, 多啲鼓勵同俾佢試下, 佢地係可以做到好多野! 

至於飲食方面都無乜特別, 開始俾爛飯佢食, 不過有時承熹會嫌太乾, 唔鐘意食, 我就會加少少熱水, 等佢食既時候有啲濕潤, 唔洗乾啃! (因為佢未識趙到好爛先吞) 

1月10日亦都係我班好友為我慶祝生日既日子, 去左尖咀鹿鳴春食飯

為左我自己有啖好食, 依家出街食飯都會帶定啲餅餅俾佢食, 分散下佢注意力, 唔好成日扭我抱!

承熹, mama 好愛你啊!

算你乖仔啦, 肯笑下同我影相

承熹呢張笑得好假, 好好笑

呢張大少話佢好似隻公仔咁, 成個挨係我到, 任由擺怖!

多謝各位!!!!!!!!!!