一歲家庭照

呢輯相想post左兩次, 點知兩次都係打完突然襟錯制無晒啲野...

攪到我無晒心機再打! 激屎~

呢輯相係承熹踏正一歲大時影的. 之前係團購網站買左呢個$2XX package, 就係為左留黎一歲大時去影, 一歲大既承熹識行識走識撩人玩, 同以前影既真係有好大分別!

唔講咁多, 睇相.. (我怕打完幾百字後又無晒! 哈~)

特登買左件'My First Birthday' 既衫俾承熹影一歲生日相, 第一年乜都懶係特別啲麻!

好感恩, 承熹當日好似襟著左個笑制咁, 心情靚爆, 攝影師(楊生)個助手求其引下佢, 佢就笑到卡卡聲!

承熹, 媽咪永遠都咁愛你!

好多謝楊生幫我到捕捉到咁多開心笑笑相, 因為平時多數係大少幫我同承熹影, 承熹好少有同爸爸一齊笑得咁開心既相, 今次影左好多.. 好有紀念價值!

眨下眼就一歲... 時間真係過得好快!

見到承熹笑得咁開心, 我每次睇親都好Sweet

楊生仲好識攞角度, 將我個巨籮同肥腿CUT晒, 哈哈哈!

原本無諗過同承熹影露點相, 因為佢個樣實在太老積, 無乜bb feel... 但楊生提醒一句, 依家唔影, 以後更加唔洗旨意影喎!

最後我都聽佢建意同承熹脫一脫...

效果又唔錯喎, 都仲有少少bb feel喎!

最難得係承熹識行識走都仲肯俾我任舞, 要佢訓低扮bb, 佢都肯, 哈!!!

楊生叫個助手吹下承熹塊面, 就捕捉到呢個樣, 好似好冧咁!

最後一個Batman造型, 原本好型, 但點解攞住個橙架!!!???

開始攰啦... 影左成個幾鐘, 都算係咁!

呢張笑得好似大少... 好可愛! (但老豆唔可愛)

http://www.babyhousestudio.com/

第一次幫襯呢間Studio, 感覺唔錯呢, 最好既係佢地唔會好hardsell要你買晒啲相, 又唔會有大相薄或呢樣個樣水晶磨砂加厚反UV等乜乜物物相架既package迫你揀, 真係名碼實價, 鐘意先揀!

玩玩玩@Quarry Bay Park

上星期見天氣回暖, 又無天陰陰, 就的起心肝帶承熹去'鰂魚涌公園'玩

承熹係第一次落去呢個公園玩, 佢彷佛去左世外桃源咁

一去到, 放佢自己落地行, 佢已經一枝箭咁標左去執樹葉

雖然地下唔乾淨, 但聽朋友講依家有啲幼稚園都會帶小朋友去公園, 佢地既活動都會一齊執下樹葉, 哈! 我聽完覺得都唔錯, 小朋友係應該多啲親親大自然, 俾佢地接觸下神創造既事物, 好過下下只係玩玩具或睇乜乜美語教學 ~ (不過就真係要睇實佢, 一見佢想放手入口就一定要抺手!)

見到佢自己踎低執樹葉, 對所有野都好好奇, 睇得我幾開心!

佢執完一塊有時會俾我, 有時會俾工人姐姐, 然後再執.. 好有媽媽心呢!

平時佢起身要用兩隻手'禁實'個地, 撓起pat pat先起到身. 但因為兩隻手都攞住心愛既樹葉, 佢又唔捨得放低, 唯有只靠自己既腰力&腳力去起身

得左! 又學識一樣新野, 識得唔扶任何野去平衡自己.. 叻叻

見到搖搖馬, 又好新奇, 但抱佢上去玩, 佢有啲驚!!!!!!!

好彩有另一款, 感覺上安全啲, 即時笑返!

我得閒要教下工人姐姐點樣影到靚相, 咁可以叫佢幫我地影相, 唔洗成日自拍!

傻豬好開心!

鰂魚涌公園好大, 而且設備都幾好, 有好多唔同款式既設備俾小朋友玩, 唔錯呢!

一如以往, 見到乜都唔執輸掂下, 雖然佢唔識玩, 但我發覺承熹都幾主動

原來承熹都唔係太怕醜, 見到有哥哥玩緊個樣, 佢會自己走埋去想玩埋一份, 好彩佢啲態度又唔算好霸道, 佢會行埋去睇人玩一陣, 跟住伸手去玩, 好似好乖咁! (希望佢可以keep住呢啲良好行為)

我係呢塊板後面叫佢, 佢識踎低搵我, 然後爬過黎, 笑死!

同佢玩'捉姨欣', 佢就最開心

見到承熹一日一日咁健康地成長, 真係好感恩! 除左感恩, 真係唔知可以講乜?!

古惑仔! 哈~

走鬼啊!!!!!

承熹已經一歲三週啦!!!!!

呢一個月承熹明顯行得穩左好多好多, 又識踎低執野, 手指靈活左好多.

最近我見我啲朋友好放膽俾佢地既小朋友試好多唔同款既食物, 一向都唔俾雜糧承熹食既我, 都開始會俾啲星星餅, 唔同種類既包包, 有時大人食既米粉, 飯, 湯等.. 我都會俾啲佢食

不過, 佢飲奶方面就比以前少左, 以前早晚各八安, 下午茶六安... 依家早晚都係六/七安, 下午茶有時五安!  有時六日出街去夜左, 十一點幾先返屋企, 佢會眼訓到連奶都唔肯飲就訓, 但中間又唔會喊醒, 直踩到八點

我一向都覺得飲奶重要過食飯仔, 依家承熹飲咁少奶, 但又迫唔到, 唔知會唔會唔好呢?

之前係芝士餅既百日宴, 烏G姨姨俾左兩個氫氣球承熹玩攞返屋企玩, 承熹初初都好驚, 抱佢行近啲個波都驚, 但大約三日後, 佢就日日都不停係咁望住個波波, 要我地攞俾佢玩!

直到依家, 同個波Friend到打band, 日日一起身就要搵波, 仲要揸住通屋走, 唔肯放...

你睇佢個樣幾得戚!

日日都不厭其煩咁揸住個波...

招招積積, 好似揸住個波好巴閉咁! 俾佢激死

Carrie姐姐買俾承熹既工人褲係18M, 好明顯條褲太長, 但個肚腩位啱啱好咋! 唉~

走啊!!!!!

走鬼啊!!!! (好似孖寶兄弟食左磨菇變大中... 哈哈)

我諗好快佢真係會識跑..

Happy Boy!

多謝Carrie姐姐送既工人褲, 媽媽好鐘意, 著到承熹好攪笑!

承熹生日大晒晒晒晒冷!

呢排我條懶筋又出返黎...

雖然我唔洗返工, 但每當大少放假既日子, 我就當係自己都有假放, 所以每當假期完畢前夕或過後, 我都有少少失落, 一諗起要返工, 就好moody! 哈~

過年時, 大少由年三十放到年初六, 呢一個禮拜不停周圍去拜年, 又有朋友黎我地屋企玩, 真係玩創晒個心! (我講我自己)

年初四

我班由細玩到大既好朋友黎我屋企拜年+同承熹攪個生日會!

新年拜年點少得麻雀耍樂! 承熹掛住玩籌碼, 原本唔鐘意帶帽既佢, 都玩到忘晒型俾我帶上頂生日帽! 但影完呢張相後就即刻自己除左頂帽~

多謝契媽, 各位叔叔姨姨 & 哥哥姐姐嘗面黎同承熹提早賀生日~

契媽買的生日蛋糕, 好靚啊!!!!!

承熹人生第一個生日蛋糕, 仲有寫@兔年初四, 好有記念價值, 哈~

依家啲小朋友真幸福, 雖然我無同承熹攪大型生日會, 但我覺得佢都好幸福, 有咁多人錫佢, 又有禮物收... 將來佢睇返自己細個啲相, 一定會甜在心頭! (仔啊仔, 媽媽都係小學先有生日會咋... 仲要相片唔多, 你要好好珍惜自己所擁有的, 常常感恩)

俾佢自己親手切蛋糕! 佢當然唔夠力切, 影左張相就當係啦..哈~ (切完即刻入房訓, 因為好夜了!)

不過食完呢日餐飯後, 半夜我同大少都又疴又嘔, 攪到我地打後幾日都無晒力, 日日都食白粥米粉...

生日正日 (2月10)

腸胃其實未完全好返, 但我唔想再食白粥, 又好想出去抖抖新鮮空氣, 所以未好返晒都要出街~ (我呢個媽咪好百厭, 仲偷偷去Yo Mama到買左杯朱古力Yogurt食, 哈)

想再試下同佢帶生日帽影張相, 點知一帶就喊!

一除底頂帽就開心晒~

承熹依家行得好快, 仲識得踎低執野, hold住玩, 後面睇真係好似幾歲大既o靚仔!

夜晚去附近日本餐廳食飯...

食完行一陣商場... 估下有咩令承熹睇得咁入神?!

嘩... 究竟有咩咁特別?!

咪就係升降機囉, 不停上上落落, 佢好似發現新大陸, 好興奮!

依家放係自己行, 真係越叫越走... 不過到我真係話: 承熹, 媽咪走啦, 88!! 佢都知機, 識得返轉頭跟返我地尾..  但唔知幾時佢會真係天不怕地不怕話知你!?

 

餓底成員賀承熹 (2月12日)

承熹一見到陌生人第一個反應係呆左, 跟住叫佢同人恭喜發財, 佢係例必唔做!  不過當人地一攞封利是出黎, 佢就會第一時間伸手去攞, 哈!

多謝Vanlily姨姨做既麵包超人蛋糕, 好可愛啊!! 而且味道真係一級棒呢~

承熹人生第二個生日蛋糕...

個傻豬好想伸手去掂

一定要捉實佢, 否則個蛋糕肯定變'屎餅'!

最後俾佢既神速手掂到少少Cream, 唔知點解佢知係食得, 即時放隻手入口, 正呀正呀咁既樣~

 

好多謝各位朋友既利是, 禮物, 祝福 & 時間黎同承熹賀生日, 令我地一家都過得好開心啊! Thank  you all of uuuuuuuuuu