聖誕派對2010

遲晒啦.. 遲晒啦... 真係唔好意思, 咁遲先post返聖誕扒地既相

最近實在有太多functions.... 同埋天氣好凍, 凍到無乜動力去做野, 真係好凍啊!!!!

我地係25號攪聖誕派對, 一早同工人姐姐調左假, 俾佢放24, 叫佢25號返黎幫手, 有姐姐幫手執頭執尾洗碗, 真係好好多!

當日全部食物大部份都係我預備, 因為我地另一位大廚去左旅行, 上年就話大肚唔洗做, 今年無得偷懶, 一定要出手

今年特登唔整咁多野食, 唔想再好似往年咁浪費, 所以今年唔訂牛排, 改訂羊架同埋一啲刺身, 費事個個食完牛排滯晒唔食其他野!

最令人觸目既就係牡丹蝦刺身同超級大帶子刺身... 呢兩樣真係好味都暈!!!!!! (唔記得影牡丹蝦, 激氣) 帶子買左最大隻個款, 好似四百三蚊一盒, 一隻可以切開三件, 太厚身食落怕會食滯, 一開三啱啱好!

另外我就煲左南瓜湯, 越式春卷, 西芹炒雞脾菇, 芥末子雞搥, 大蝦頭肉碎炒義粉 (大蝦頭係用牡丹蝦既頭去炒, 超多膏)

食物份量啱啱好, 真係好!

開餐前影張相先!  (承熹著左朋友送的聖誕老人衫, 但佢唔肯帶聖誕帽, 所以睇唔出!)

今年聖誕派對除左麻雀外, 最多人玩既就係 ---- 承熹!

多謝晶姐姐既超人口水肩, 係承熹既聖誕禮物

佢地話承熹個造型似麵包超人, 哈哈

未來契爺同承熹玩得好開心

承熹都幾痴 Allen哥哥

我準備左好多娛樂俾佢地任君選擇, 但大部份人都掛住同承熹玩, 卡拉OK & Wii無人問津

**************************************************************************

食完飯玩到咁上下, 又到一年一度既高潮位!!!!   交換禮物~~

今年我落左order要買HK$150以上既禮物, 因為HK$150以下既選擇實在.... 黎黎去去都係個啲禮物套裝, 好無heart!!!

雖然聖誕禮物只係一份心意, 但我覺得既然買得既, 都希望收到既人真係會開心... 所以我地今年仲安排多一個獎, 就係"最無heart之禮", 我地會投票睇下邊個份禮係被喻為最無heart, 最唔實際既, 得獎者要罰一百元作大會經費

今次唔用畫鬼腳... 改用麻雀抽獎!

呢份係我買既禮物, 係外置USB頭, 幸運兒係 -- 契媽未婚夫

至於我抽到個份... 算啦, 唔好提! 哈~

有人買左個單鏡反光機做禮物

望真啲個鏡頭, 流野!! 其實係一個錢箱! 幾特別~

大家用匿名投票邊份禮物最無heart!

驗票中... 哈哈哈!!!! (大家好緊張)

最後有雙冠軍, 恭喜晒!! 希望你地下年買野俾啲heart, 唔該~kkakaa

大合照!!!!!  聖誕快樂~

最後仲有契媽欽點既Awfully Chocolate 既香蕉蛋糕, 好好味!

可憐既承熹, 眼訓但又心野唔肯訓, 玩到十一點幾對眼都細埋...陰功!

 

完左個派對... 我同大少先開始執喼, 第二日早機去台灣! 再見~