母親節快樂2011

今年係我人生中第二個屬於自己既母親節, 上年承熹得三個月大, 真係一舊飯咁... 所以第一年既母親節無乜點慶祝. (好似同奶奶食飯)

但今年對我黎講, 我覺得好有義意架, 話晒我都照顧左呢隻嗅豬成一年幾, 無功都有勞, 所以母親節喎.. 我緊係要去慶祝下, 唔好蝕麻,, 哈哈! 講笑姐, 其實都係想一家人出去食餐飯, 影下全家福作個留念先係最重要

今日一早帶承熹一齊返崇拜, 之後我要去上浸禮班... 下午帶承熹去babygym, 晚飯就book左Harbour Grand Cafe食Buffet.  時間都幾緊湊, 而且好攰, 但都開心既... 因為做乜都係一家人去, 所以特別開心!  感恩~

第一次試Harbour Grand Cafe, 之前聽人講唔錯, 最好就係今朝book都仲有位麻.. 唔洗煩! 但價錢比起平時貴左啲, 而且今日無晒任何信用咭優惠, 不過一年一次, 是但啦!

枱與枱之間都幾闊, 就算有時承熹嘈嘈閉, 應該都唔會太騷擾到隔離枱

一去到影兩幅相後, 即刻去攞野食 ------ 俾少爺仔! 承熹依家都可以食大人野, 所以我無帶飯出去 (其實係懶, 唔想煮), 我諗食buffet, 點都有野啱佢食掛!?

一出手就俾我見到個麵檔, 要一碗鮮蝦芥蘭米呀, 唔該!
廚: 我地今日啲帶子好新鮮, 要唔要試下? 金菇, 魚皮餃等要唔要? 
我: 噢, 唔洗啦, 唔該... 我俾BB食架!

嘥左佢一番好意添~

承熹都幾勁, 成碗米粉成晒咁濟... 但食完個口仍然不停食, 我地食乜, 佢又要!  如果平時係屋企食飯都係咁好胃口就好.

趁佢未扭, 即刻嘆返啲海鮮先... 佢地依家至到六月都係澳洲海鮮做主題, 啲海鮮真係好新鮮, 最好食係長腳蟹, 青口同龍蝦

唔好以為佢食緊百力枝! 其實佢係搶左我隻長腳蟹................................

我以為佢應該唔夠牙力咬爛個殼, 點知見佢好俾心機咁咬啊咬, 我最後都係搶返, 費事啃屎!

爸爸攞左個包包返黎俾承熹..

衰豬即刻成個咬, 哈! 如果我唔stop佢, 佢真係成個食晒, 佢仲要係個口未吞都不斷食, 傻架!

衝完一輪, 終於肯收口.... 俾枝筆你畫畫啦, 到你阿媽我要食野啊!

食左幾輪都係海鮮, 正!!!! 其他食物就普通, 唔難食, 但又無乜特別, 甜品就完全唔吸引, 除左........

另外我平時去食buffet好少會食雪糕, 因為我根本唔太好雪糕! 但見到係Movenpick就試下啦, 又多味揀... 點知我配窩夫食, 食左四球!!! 痴左線~

承熹尾段又繼續食燉蛋, 豆花, 西瓜等等等...

食飽飽

話晒母親節, 點都有啲表示掛????
媽咪, 送俾你架! (其實係酒店送的, 每位媽媽都有)

再黎個情深一吻...  初時以為係情深一吻, 但原來個衰豬想咬我個下巴!

尾聲開始扭落地, 一放佢落地就好似甩繩馬騮咁..

好鐘意佢地個Lobby, 樓底超高不特止, 啲水晶燈仲好靚添呀!!!! 黎緊十月有個朋友會係到結婚, 承熹亦都會做佢既花仔, 十月既承熹就20個月大, 感覺好似好大個咁, 唔知到時會變成點? 會唔會好難攪呢?

 

祝各位母親節快樂!!!!!!!!!!!!!!!