八月軒

上星期有幸與剛為人母既Vanlily一齊去八月軒試新菜式

八月軒係美心集團旗下其中一間中菜館, 我個人都幾鐘意美心集團既食物, 如果真係要揀市面上大型鏈鎖較優質既品牌, 我諗美心都係我較有信心既選擇! 小至西餅月餅嫁女餅蘿蔔糕, 大至快餐店飲茶晚飯擺宴會, 我大多數都會選擇美心

因為我屋企附近最近只有美心皇宮及北京樓, 今次係我第一次試八月軒既菜式

朗豪坊呢間八月軒感覺好時尚

剩係呢個保證, 我覺得已經值回票價, 尤其呢個世代, 好多都係用味精做出黎, 連豬排都可以變牛排, 痴線架~

我地當日所試既菜式

仲有師父為我地講解食物既做法及意念

脆脆BB豬 - 我諗呢款BB豬係八仔系列 (八月花, 八月軒)都好出名, 但呢款配合清新沙律, 又有另一番感覺!

BB豬係用只有兩星期大既BB去烹調, 真係好嫩滑, 而且佢個皮真係名符其實, 脆到爆!只售$58

雀籠點心 - 呢款啱晒二人世界既朋友, 兩層既點心拼盤, 滿足眼濶肚窄既你! 佢地既點心都較特別, 底層有鮑魚酥, 燕窩水晶包, 春卷

上層有原隻鮑魚燒賣, 特大蝦餃皇 & 粉菓.  $148一籠滿足晒你所有願望! (晚市都有架)

首推菜式 : 燕窩蕃茄濃湯 - 純蕃茄, 絶無添加茄膏/茄醬, 啖啖濃濃既蕃茄, 加埋燕窩, 感覺加倍健康養顏... $48/碗

特式飲品 : 我揀左柚子梳打, 爽!

太雕玻璃蝦球 - 呢個係我同Vanlily都好鐘意既菜式之一, 因為除左隻大蝦球好爽外, 驚喜位就係底下原來係蒸蛋黎架, 好滑好滑, 加埋佢既清香花雕酒獻汁撈埋一齊食, 好味到暈!  好抵食, $38/位

首推菜式 : 生炒蜆肉 - 呢個菜式我一見到時覺得無乜特別, 普通屋企都做到啦! 只係韮菜, 蜆肉, 蠟肉 & 松子, 睇落好似好簡單, 但食落先知真功夫! 聽大廚講原來佢地啲蜆肉係養左三日, 等佢啲沙吐晒出黎先攞黎炒. 所以食落真係好鮮甜, 好彈牙, 最重要係無沙! $88/籠 (連餅)

配埋呢塊薄餅, 絶配!

首推菜式 : 砂煲中熅雞 - 其實係沙薑雞, 但用砂煲煎熟佢, 特別香口... $98/半隻雞 (每日限量發售)

首推菜式 : 別不同蛋白炒飯 - 大家都問師父, 有何不同? 哈 原來就係加左新鮮蟹肉去炒, 即時升價十倍! 好正~ $118/碟 (限量發售)

呢款係臨時推介俾我地食既甜品, 名叫'唔中唔西'?  因為一款係炸雪糕球, 一款係炸蛋, 中西合壁, 好得意! 上面彩色個啲係龍鬚糖, 都好好味

首推菜式: 101鮮菓拿破崙 - 係中餐廳食到呢款西式拿破崙, 相信唔係好多地方會有, 最受囑目既係, 佢既Size好大啊!!!!!! 啱晒一家大細一齊享用, 只售$58咋~

試完菜後, 感覺食物全部都好新穎, 帶入左唔少西式既意念, 同一般傳統酒樓好唔同. 而且睇得出師父好有heart去創作, 每樣食物都經過不停嘗試改良, 務求創新, 令食客時常有新鮮感, 更希望吸引到年青一族都會愛上中菜!

如果大家去開一般傳統既酒店, 不妨去下八月軒/八月花試下佢地既新菜式, 相信你地一定都會覺得好有驚喜!