迪蠟尼

過年前, 帶左我表弟表妹去迪蠟尼玩...

一直都好想入去影相, 原本生日時想同大少去, 可惜一病就病左成個禮拜... 未去大少都已經返左杜拜!  難得表弟表妹考完試早放學, 可以一齊入去玩...yeah~

多謝靚女Candy帶我地"幾仔乸"入去,, 哈哈

入到去啱啱花車巡遊, 好彩趕得切~

每次見到反斗奇兵既卡通人物特別鐘意...

我同大少講, 我見到d人跳parade好開心, 我都好想應徵做呢d... 哈! 因為平時你唔會對住咁多人又笑又跳, 但係迪士尼做就可以...好似好好玩咁!!

 

迪迪尼入面充滿新年節日氣息, 仲有好多精品賣

另外睇中左呢條圍裙,, 好想買!! 但諗諗下都係算啦... 經濟唔好,, 慳d洗~

 

巴斯光年個game仍然係最受歡迎!!!

表弟妹都開始長大,, 依家帶佢地出街都好啱玩...  係我悶既時候多得佢地倍我咋~

每次見到小朋友攞住氫氣球總會覺得佢地d父母好嘥錢..... 但其實咁可愛既氫氣球, 對於我黎講都好吸引...何況係小朋友!

見到呢d咁可愛既擺設/糖果盒真係好想買.... 但我好勁,, 忍忍忍忍忍...一樣都無買!

今次去迪迪尼我同兩個細路都好勁, 無買到野, 大家都係花左八十大元食野only, 連水都係飲佢既水機...哈!!!!!!  雖然慳...但玩得好開心 ~

恭喜發財~

恭喜發財!!!!  恭喜發財!!!!

祝大家身體健康, 心想事成, 步步高陞, 萬事如意, 牛年好運!!!!!

係香港過年真係開心好多, 雖然大少唔係身邊的確係有d 唔完美.. 但今年真係好開心...

一來因為有自己既家, 二來今年收到家姐大少奶整既蘿蔔糕 & 鄰居陳小姐連日黎既年糕, 芋頭糕, 蛋散等食物提供, 令我覺得自己好幸福啊!!!! 多謝你地~ (你地既食物全部都好正, 令我覺得過年一D都唔孤單啊!)

另外就係今年係我一次出手煮團年飯俾DADDY & 親戚食, 八餸一湯.. 飽到癲!!!

我真係好希望今年家人同朋友都開開心心, 平平安安, 身體健康最緊要~

YEAH!!!!

嘔心瀝血

香噴噴新鮮出爐既黑芝麻麵包!!!!!

呢堆包包係我嘔心瀝血做到半夜三點先出爐... 原因就係 ---

我今日約左阿茄食LUNCH, 好怕唔知醒做唔切, 但又好想整包包俾佢試下, 所以唔理幾夜, 本左條老命我都要整啊!!!!!

另外仲送左一條俾堂家姐, 鄰居陳小姐 & 好友ANISE...

又係獨角仙既食譜.. 但自己亂咁做型!

呢款黑芝麻包包,, 加左黑芝麻粉搓成個麵團, 最後再擦黑芝麻醬卷起!

似乎超軟熟... 我一口氣做左五個包包..但自己仲未有機會試!

朋友們.. 你地覺得如何呢?

忙裡偷閒

前兩日家姐(大少奶)係百忙之中都抽時間同我去打獵,, 今次係自Toppings 搬新鋪後第一次光顧 ~

環境當然比起之前好好多, 至少唔洗再拋頭露面, 有室內坐啊.. 而我最鐘意佢地美式既裝修, 好有型呢!

食物方面都係熱狗, 熱狗同熱狗... 下次我地要轉轉口味, 試下佢地既burger, 相信味道應該都會好好!

我既雞肉腸熱狗 + 磨菇湯~

佢地轉左鋪頭後, 配料放得更整潔, 更齊全... 我d配料多到連條熱狗腸都唔見埋!

 

家姐既芝士腸 + 熱辣辣超好味既洋蔥圈....

閒時無野做去個到嘆返個下午茶都幾好,, 店內仲附設一部濛到七彩既電視, 可以俾我睇到我至愛既"真情"..哈~

繼續... (咖啡吐司)

大家可能睇到有d悶... 日日都係包包!

真係唔好意思... 為左個包鮮酵母 + 團火仍在, 我不得不每日keep住有包包作品出爐~

今次呢款係咖啡麵包, 食譜一樣係參照獨角仙既新書

發酵其間已經聞到好濃既咖啡香.. 咖啡粉o係係sweetie買, 超出味, 好啱用黎做蛋糕/甜點!

包包一如以往, 軟熟非常!!!!!  即使唔返熱, 第二日就咁食都好好味.

daddy今次有投訴啦, 佢嫌咖啡味太濃, 有少少苦喎!!! 我自己都覺得係濃左少少, 或許對一d喜愛咖啡既朋友黎講, 應該會好鐘意~

做完包又攪第二樣野 ---- 木糠布甸(兩款味 - 可可粉 & 綠茶)

白痴既我未做過木糠布甸, 亦無食過,,, 完成後我只係放係雪櫃下層!! 第二日品嚐後感覺怪怪的, 後來先知原來要放係冰格

希望收到既朋友唔會覺得難食...

好吊詭!

一直以來都好想一嚐鮮酵母既威力, 以前無焗爐就話試唔到姐, 今時今日仲等咩? 哼~

但有做開包包既人都知道鮮酵母又大磚但食用期有限, 所以我要係最短既時間內用盡佢啊!!!

呢幾日不停係屋企焗啊焗啊焗啊~

原先呢款包包係跟獨角仙新出個本書既食譜, 佢係用紫心蕃薯做..靚好多! 可惜我買錯蕃薯, 買左黃心... 所以成個款唔同晒, 第一次用蛋糕模做麵包, 效果好得意!!!

獨角仙所教既發酵係用低溫發酵法, 好處係唔需要一氣過做包包, 部份麵團先放雪櫃發酵 (最耐可以放72小時), 到要做既時候再用, 係中種既做法! 出黎包包既效果非常軟熟, 而且煙勒有口感,, 好正!  (不過我暫時未分到軟熟既原因係因為鮮酵母定係呢種中種法?!)

一出爐就俾屋企人你一舊我一舊食晒, 哈!  最鐘意d野好快食晒, 咁我又可以再做過~

做完包包即時又做吉士撻... 

由於當日表弟妹過黎我屋企食飯, 知道佢地一定會鐘意食吉士撻, 一早搓定撻皮作準備! 但估唔到係當我做緊撻底時, 表弟表妹都有興趣玩埋一份, 教完佢地一次, 就由得佢地自由發揮, 效果都唔錯!  有D天份喎~

但最最最吊詭既都係............. 我老豆一個人竟然食左三件! (不過係分開兩日食!)  成日話我整既野甜唔啱佢食... 當我無預佢會食既時候, 又失驚無神食咁多, 真係難捉摸過女人~

Bingo~

BIngo....

終於成功做到一個令Daddy滿意既蛋糕

佢要既原來真係一個比普通更普通既清蛋糕

前兩日買左本書專教做海綿/戚風蛋糕, 最特別既係呢本書另外有寫埋用代糖做既份量, 啱晒有糖尿病既人食!

係到要多謝Clara之前幫我係日本買既綠茶粉, 果然好上色, 而且食落都好有綠茶香味, 我daddy最愛綠茶味!!!!!  (唔該晒Clara~)

話說呢個戚風蛋糕係夜晚十一點先整, 完成後等放涼daddy已經熟睡中.....

今朝一早起身去廁所時見到佢啱啱攞住一件食.... 點知到我十二點幾起身想食既時候,  佢同我講 : 個綠茶蛋糕我成個食晒啦... 幾好味! (我個蛋糕有7"大)

哈, 無諗過daddy會咁捧場, 大少都未試過一口氣食晒我整既蛋糕, 估唔到老豆咁俾面,, 不枉我用成舊水買個本書呢..heeee

推介俾有興趣做低糖蛋糕既朋友~~

雞同鴨講

今日終於做daddy嘈左幾日既muffin, 仲加左藍梅減左糖, 清清地應該啱佢口味!

我真係好鐘意個焗爐, 我覺得佢焗完既野好靚, 好漲卜卜 (可能係我太耐無焗,,興奮得濟~)

等到Daddy返黎, 佢先話呢隻唔係佢想要既蛋糕! 重要唔俾面, 一隻都唔肯食... (佢話聽日早餐先食喎!)

原來尋日我同佢係雞同鴨講,, 佢有佢畫, 我有我估, sigh!!!  最後, 佢又重覆講一次佢想要d咩, 我今次估佢想要既係..... 清蛋糕掛! 

大家好!!!!!

大家好.. 好耐無見啊!!!!!!   (精神的語氣~)

估唔到一直係杜拜都身體健康既我, 係踏入09年生日後就病足七病, 好恐怖...

多謝DADDY連日來既照顧, 買粥, 煮粥, 洗碗, 洗衫,, 乜都幫我做晒, 我真係成隻大食懶咁縮係屋企, 又無出街... 天寒地凍, 唔洗返工返學, 縮係屋企真係好正,, 哈!

係到要好認真同大家講一句... 大家要小心身體,, 病真係好辛苦,, 唔係講笑!

尋日開始動身,, 焗爐買左後只係做過一次鬆餅, 都未露出我既真功夫 (哈, 懶勁咁!)
最後尋日成功焗出09年第一盤包包...

跟MC做既湯種紫菜肉鬆包

大家見唔見到d包包起晒絲?! 我唔知係麵粉靚既問題, 定係焗爐既問題, 發酵發得超靚... (我用焗爐發酵的)

肉鬆包DADDY食過話幾好味.. 但就向我投訴點解唔做蛋糕佢食, 佢仲畫埋公仔俾我睇佢想食乜, 其實係MUFFIN, 佢d 畫功好屎,, heeee

今日堂家姐過黎叫我教佢做包包, 所以又出左我09年第二盤麵包 --- 菠蘿包是也!!!!

菠蘿包用北海道吐司食譜做包底, 所以比起甜麵團淡味d, 但包質超級軟熟!!  朋友夜晚黎我屋企"聯誼", 個個食完都話正啊!

最攪笑係daddy食完菠蘿包又重覆問我 : 點解唔做蛋糕(佢指既muffin)俾我食? 你其實係咪唔識做啊?

睇黎我黎緊都快d做muffin佢食, 唔係有排俾佢'哦'!!!

腸胃炎

多謝各位朋友既祝福, 真係好窩心!!!

但唔爭氣既我係生日前一日懷疑食左泰式生蝦後兩日不停上吐下瀉, 至今仍然唔舒服, 一食少少野就肚抽筋, 所以無精力update網誌及逐一多謝各位!

大家放心, 已經睇左醫生(但好似無乜料到), 如果聽日仍然唔舒服, 會再睇多次...

遲d精力好返先再update及探望各位!!

P.S.  抱歉未能出席我們這一家&各好友為我準備既生日會,, 真係十萬分致歉!!!!!!!!!!!!

Happy Birthday to ME

Happy Birthday to meeeeeeeeeeeeeeeeeee......

好耐都無係香港過生日, 今年好開心, 收到好多既祝福, 多謝你地!

最開心係大少係我身邊倍住我, 朋友們聽日會同我食生日飯, 簡簡單單已經好滿足...

一直以為大少貴人善忘唔會有咩surprise俾到我, 但最後竟然有一浪接一浪再接多幾浪既驚喜, 哈!!!!

多謝天父, 多謝父母, 多謝大少, 多謝你地!!