回顧返呢段懷孕期間, 真係好多好多事都要將榮耀歸神, 大大聲咁感謝主
神對我地一家既保守真係太多太多, 恩典滿載!!!!!
大至我同小魔怪既健康平安
小至雞毛蒜皮既事, 神都一一看顧.
最令我感到神係實實在在, 係充滿大能既, 相信我呢次既生仔經驗, 真係無得走..
首先好感謝主俾我搵到一位好好既倍月姨姨, 呢位倍月姨姨係堂家姐既朋友(做姑娘) 介紹的, 佢地圍內好多姑娘都僱用佢, 皆因呢位姨姨專業不特止, 仲要份人唔計較, 好多時除左照顧小魔怪以外既野, 做到佢都會做, 八小時既工作時間, 佢日日都做到過晒鐘先走, 絶對唔會求求其其. 遇到好幫手, 真係可遇不可求, 感謝神!
生仔過程中, 雖然好痛好痛.. 但因為我一直都相信神會看顧我, 令我可以順利生小魔怪, 所以就算好多人同我講順產好痛, 不如開刀啦! 但我仍然堅持要自己生.. 仲要一口拒絶打'無痛分娩針'; 果然, 神真係無撇下我, 好感恩地實際痛左兩小時到就順利生左小魔怪! 感謝神~
未生小魔怪之前我都擔心過醫院費用會out of budget, 因為唔知小魔怪會唔會踏正假期或深夜出世 (會加錢的), 又怕出世後唔知會唔會有咩問題要留院觀察, 呢筆費用真係未到出院都唔知埋單幾錢?! 好感恩, 小魔怪係平日下午出世 (已經慳返筆), 另外健康都無大礙, 只係有少少黃, 三日大就可以同我一齊出院.
但醫生有講過BB黃疸高峰期係頭五日, 所以都分咐我地要小心觀察小魔怪, 如果一有黃到落腳仔既情況就要帶佢返醫院 (因為咁啱佢出世後就過年, 診所無開); 為呢件事, 我又係擔心左一陣, 但感恩教會一班好姊妹為呢件事幫我地祈禱, 小魔怪又過左一關, 尋日睇完醫生都confirm佢無晒黃. 感謝神!!!!!
另一件小事就係坐月期間要用薑水沖涼, 咁大個女都未試過用花灑以外既方法沖涼, 對住呢盆薑水, 真係唔知應該點沖?! 但真係好攪笑, 神連呢D咁細微既事都為我照顧到.
事緣未生得前一星期, 個熱水爐突然壞左, 無熱水沖涼, 最後大少要煲熱水俾我沖先得. 頭一日真係沖得好狼狽, 因為一盆水我覺得無可能沖到涼 (我要既係大量水), 但第二日開始就捉摸到應該點沖可以慳水&有效率! 所以我依家日日用薑水沖涼都無有怕, 仲越沖越純熟, 同一盆份量既水, 依家仲可以有多餘水剩慢慢淋身! 哈~
另外就係好彩個熱水爐係生之前壞, 如果生後先壞, 仲麻煩! 依家換左個新爐, 安心晒~ 感謝主!
其實要感恩既事真係數之不盡..... 每件事都值得感恩!
每當我氣餒或感到唔開心時, 我都會記起呢段經文, 一諗起個心就會舒服好多.
你們看那天上的飛鳥, 也不種, 也不收, 也不積蓄在倉裡, 你們的天父尚且養活他.你們不比飛鳥貴重得多麼? (馬太6:26)
依家做左人阿媽, 好多時都會擔心自己既小朋友有咩事, 但其實過份擔憂對自己心理上都唔好, 我好慶幸自己有信仰, 有神做首領看顧, 否則如果只靠自己既力量, 真係唔敢想像!
