麵包超人@Flavors

上星期六同餓底某幾個成員, 阿茄, 阿吱, 事頭同繼姐一齊去學依家好流行既公仔馬卡龍


我地今次選擇左Flavors, 夾埋阿茄既同事我地一行八人, 啱啱好夠開一班私人課程!



7:00pm - 10:00pm



Flavors 環境都OK, 感覺幾整潔

 

一去到, 糖霜同杏仁粉, 蛋白已經準備好~


由於時間都差不多, 洗洗手後就即刻開始

先黎打打打打打, 不停打蛋白, 初時用一度打至起泡, 分次加入糖後用五度繼續打

阿sir話打蛋白係好重要, 太唔夠就失敗, 至於點先為知夠? 我唔識形容... 有啲類似做戚風既蛋白

打完打蛋再倒入杏仁粉&糖霜入去撈勻!   撈勻既技巧同埋點先為知撈得夠就係最考功夫, 大家都唔敢掉以輕心

感覺要有光滑但又唔可以撈太耐, 要杰得黎又有少少流動感, 係咪好抽象呢!

我地一堂八人可以選擇做三款公仔, 最後揀左麵包超人, 鬆馳熊同埋Melody

初初以為每人都可以做呢三款, 但原來每人只可以揀一款黎做, 想集齊三款公仔, 唯有最後自己同朋友交換!

好失望.....

其實我本身唔係太鐘意食卡馬龍, 不過見到啲公仔好得意, 難得又有朋友一齊學, 所以就算學費貴少少都無所謂啦~

我揀左麵包超人圖案, 因為承熹鐘意 (應該話呢三款公仔入面, 承熹只係識麵包超人) 哈!

阿Sir按各人所做既公仔, 每人派一張公仔紙, 方便大家跟住黎唧個型出黎

麵包超人款係最易做, 只要唧個圓型即可!



鬆馳熊都唔太難



最難就係Melody, 要分兩次唧!



唧完要用風筒吹下啲麵糊, 等到用手摸落有少少硬左既感覺就可以攞去焗!

阿Sir話用風筒吹既原因為防止焗既時候龜裂 (但我記得兩年幾前我同阿茄&阿吱出去學馬卡龍, 個次係唔洗用呢個方法的)

焗完待冷卻一陣就可以用呢啲調左色既蛋白糖幫佢地畫返啲公仔啦! 

但原來除左個馬卡龍本身要焗得成功外, 畫畫呢part都好緊要, 一畫得唔似其實就等於浪費心機了~

我既製成品

 

 

哈, 我啲畫功真係要再多多練習!!  我覺得畫畫呢part 好考耐性同埋隻手一定要夠"定"



阿茄啲朋友做既鬆馳熊都好可愛呀!!!!!

每人大約可以整到9-10件

返到屋企承熹仲未訓, 立即送一塊俾佢安撫下佢啦.   因為大少話承熹成晚係咁話要搵媽媽, 好掛住媽媽!


其實當晚學習過程好開心, 因為係私人包堂, 大家都係相識, 感覺比較無咁拘緊, 而且好耐無一齊聚下, 大家邊做邊傾下計, 好開心..

但唯一美中不足既係我地學完都一致覺得當日教我地既導師真係有點...................  強差人意!

事後係FB睇返其他人啲製成品同埋問返學過既朋友, 佢地上堂原來係另一位阿sir教的, 佢地所做所學所感受既同我地有好大出入

至少, 人地做出黎既效果好明顯係有導師悉心教導下而成! (我明白每個人既天份或領悟力都唔同, 但我地大家都一致覺得其實有好多地方, 我地事後先知應該要咁咁咁先係靚啲, 但阿Sir無提過我地, 而出黎效果唔理想佢又唔會糾正講返你知問題出係邊?!)

攪到整Melody既朋友們好慘 (因為Melody係最難整), 個位阿Sir完全無仔細提點過應該要留意邊啲位會容易出問題, 只係好快咁講完一次就算, 我地做緊時又唔會睇住我地有冇出錯, 成日走左去, 隔一兩分鐘走入黎望兩眼又走左去! 我眼見佢地既Melody 越睇越唔似樣都覺得好唔對路 (因為錯不在佢地, 佢地本身都有做甜品經驗, 如果阿Sir 肯講多少少point , 一定唔會做到咁樣)

最離譜係佢示範時竟然話: 你地留心啲睇, 我只係示範一次咋!(講野無尾音)  跟住示範完又走左去由得我地自生自滅.  到左發現有唔妥時問佢有冇補救方法? 佢諗到唔諗就答無, 依家好難救! (我地俾錢出黎學, 當然唔識先學, 你唔講要留意啲乜都算, 仲要咁不負責任咁答無得救!  嬲~)

其實我都唔想公開話呢位阿Sir, 但我地事後真係越諗越激氣! 眼見人地學得好開心, 啲製成品好靚, 但同一間學校, 我地遇著個咁既阿Sir, 實在倒霉~ 
(依家我地唔係參加團購買平價課程, 每人都要$360, 但呢位阿Sir既態度真係一啲都唔值呢個價囉~)

另外就係一般出去學整蛋糕或甜品, 導師都會佢做一份作示範, 學生做一份, 最後大家可以一齊品嚐老師個份, 傾下心得, 問下問題, 分享下! 但佢地連基本示範既材料都唔預備, 仲要用埋學生個份黎做, 剝奪人地練習既機會!  臨尾畫圖案時由得我地自生自滅, 又唔會問下我地有冇問題, 趕收工咁)

我唔係叫大家唔會去呢到學, 我相信另外一位阿Sir會係好好多, 如果唔係都唔會有咁多人去呢間到學. 

今次寫咁多不滿出黎都係發洩下, 希望想去呢到學既朋友小心選擇導師!! (不過我唔會公開呢位導師姓名, 想學既朋友如果怕中招先PM問我啦!)

Anyway, 雖然唔完美, 但今晚仍然好開心!