承熹第一次溜冰

上星期六約左淇淇一家去太古城溜冰

我地原意想俾小朋友學溜冰, 但又怕佢地驚, 俾左錢先話唔學就浪費

所以我同淇淇媽捨命陪細路, 率先親身帶佢地先溜一次睇下反應如何?! (淇淇媽仲要係人生第一次玩溜冰, 為左個女, 佢都夠膽落場玩, 呢個媽媽真偉大!)

其實我細個(小學年代)學過兩年, 但之後一直都無再玩, 所以今次要我再踏足冰場, 其實我好驚!!!!!


承熹同淇淇剛好相反, 佢地十分期待~

小朋友溜冰鞋最細應該係23碼, 承熹腳長大約14cm, 著23碼佢話太緊, 24/5就啱

 

承熹初初唔太識行, 但佢都無抗拒去試, 仲好心急想出去溜

反而我好緊張, 咁耐無溜, 真係有啲怯!!!!! 我跌唔緊要, 最怕累埋個仔麻~

我自己出去溜左兩三個圈, 真係不復當年, 直程好似初學者咁! 可能人越大真係會越細膽, 成日好驚跌

所以最後我都係同承熹係旁邊玩算啦, 唔好走咁遠!

中途休息一下!

我地同淇淇一家係o係playgroup認識的, 淇淇係一個好聰明, 好懂事既小女孩, 係同班中明顯成熟過其他小朋友

但我都係最近先知, 原來佢係同承熹同年同月同日出世!

以前未好認識佢地之前, 我同大少講過, 淇淇好醒目, 係同班入面既女版承熹 (哈, 讚人地個女之餘又讚埋自己個仔, 哈哈!)

因為當時同班中, 我記得淇淇又係會坐定定, 肯跟老師指示, 唔會亂喊亂叫, 就算第一次無父母在旁上堂, 都好似得佢同承熹無喊過!

所以我對佢印象好深刻, 但無諗過原來佢地咁有緣, 連生日都係同一日~

叫承熹笑下, 佢又做埋啲咁既樣, 激死!

承熹見到淇淇做古靈精怪動作, 佢又不甘示弱做埋一份!

佢兩個真係好攪笑!

休息完我教佢地打開雙手攞平衡, 估唔到佢地一學就識, 都幾大膽去嘗試!

承熹仲越行越快

細路學野真係快

 

第二次出去溜, 承熹明顯平衡好過第一次, 但始終都係唔識將上身重心向前傾, 好容易向後跌

玩左唔夠五分鐘, 承熹又話要去VV, 又話腳痛, 跟住就話唔肯玩! (同時間淇淇又係突然話唔肯玩, 勁攪笑, 兩個真係好似)

anyway, 第一次試玩都OK, 起碼大家都無跌低, 無損傷已經好感恩~ 哈!!!