幸福小女人- Diana: 承熹的....

顯示具有 承熹的.... 標籤的文章。顯示所有文章

2012年12月20日星期四

承熹聖誕表演日2012

遲來的............. 聖誕快樂!!!!!!!!!!!!!!!!!!!!

上星期三係承熹學校既聖誕表演日

相信好多家長都十分期等呢一日

因為平時送左小朋友返學, 好少有機會見到佢地係學校既點滴, 只係靠老師偶然既提及, 當然唔夠喉啦!!

所以, 今次係第一次親眼睇到佢地參與學校群體表演, 真係十分難得及珍貴

未開始前, 學校播放小朋友們平時練舞既片段, 好可愛! 睇得出佢地都好enjoy, 好乖巧~ 但可惜搵唔到承熹, 可能前排成日病, 請左假, 所以影唔到

當我知道有聖誕表演時, 我就問承熹: XA, 你學校遲啲有表演, 你知唔知自己扮咩呀? XA答: 唔知喎!

跟住我從另一位媽媽到得知佢個女話自己扮聖誕花後, 我又問XA: XA, 小瑜扮聖誕花, 咁你扮咩? 聖誕樹? 定聖誕老人?

XA依然一臉懵然咁答我: 唔知呀!

到左當日返到學校見到貼左張節目表出黎時先知, 原來佢地分左三組, 分別表演三首歌

小瑜表演"聖誕花" 承熹表演"大家快樂唱歌", 唔怪之得問親佢扮乜都話唔知!

佢地係第一組出黎表演既小朋友, 全部都未夠三歲, 細細粒, 可愛到不得了!

最意想不到係, 咁細個小朋友竟然可以乖乖聽老師指示企係正確位置, 唔會亂走, 唔會大叫失控, 大家好合作咁表演晒成首歌

雖然呢首歌無承熹份, 但見到佢地咁細個人仔咁乖, 我都好有感觸, 睇到眼濕濕, 拍爛手掌!

小朋友們真係好可愛

到承熹出場啦!!!!!!!!! 好好彩我個媽媽朋友留左個靚位俾我, 我先可以咁緊距離睇住承熹表演

承熹好攪笑, 佢跟足動作, 但無笑容, 哈哈!

唱到最後完結時, 承熹突然踎低, 我同大少都奇怪佢做乜咁快走人?

但原來承熹係負責踎低攞個鈴鈴敲一下作結尾, 我同大少都好surprise佢竟然擔上如此"重任", 哈哈....

事後睇返段片, 臨尾快結束音樂時承熹係自己o係無老師提示下攞起鈴鈴上黎'叮'一下, 我地真係好驚訝佢竟然知道自己有重任, 而且能夠順利完成, 爸爸媽媽好為你感恩自豪呢!

最後另一組N班既小朋友都好可愛, 好叻叻

P.S. 希望其他家長們唔好介意以上照片及影片有影到貴子女, 本人只作紀念, 沒有惡意! ^_^

2012年10月19日星期五

承熹十月記錄 (32M)

承熹睇完曹醫生, 食左四日抗生素已經好轉, 無再發燒

但可能之前又燒又退(狂出汗), 所以依家變左鼻塞有少少咳

今日又去覆疹, 曹醫生話佢既扁桃腺炎表面已好返, 但怕仲有菌未斷尾, 所以都要再食多四日抗生素

可憐既承熹好怕食藥, 一聽到食藥就即刻自己攞水飲, 邊飲邊講: 我飲多啲水, 唔會再病, 唔好食藥得唔得? (好可憐既語氣)

不過承熹比起以前食藥都已經叻左 (食得多迫於無奈要習慣...唉!)

@養和 9/F 覆疹

睇完醫生順便去上環搵契媽食lunch

西港城有間專賣玩具模型車既店鋪, 承熹見到勁開心, 發晒癲~

最後買左架佢好鐘意既車 ---- 混凝土車 (唔好問我點解佢會咁鐘意呢架車, 我都唔知?! 有一次坐巴士佢係街見到, 問我係咩車, 自此佢就記住)

承熹十月回記錄 (32個月大)

早排佢高燒個幾日, 每隔一個鐘就探熱一次, 個傻豬又學我, 自己走去用玩具砌左個"假探熱針"出黎, 哈~

承熹依家好多要求, 就算叫我畫圖畫, 都會有要求叫我畫指定既車 --- 消防車, 車要有倒後鏡, 要用黑色車轆同埋黑色雲梯

另外要我畫巴士, 但佢話: 架巴士要有承熹個廣告架! (真係俾佢激死, 你知咩叫廣告咩!)

另一考阿媽創意

某日無啦啦走黎同我講, 我要砌"混凝土車", 我聽完打發佢叫佢老豆砌, 點知老豆砌完走去沖涼, 留低個爛攤子俾我

攪到承熹不停係我側邊咦咦哦哦咦咦哦哦.....

我要混凝土車, 混凝土車... x 20 - 30次

我: 爸爸咪砌左俾你囉 (用lego)
承熹: 但後面都轉唔到 (混凝土車個肚)
我: ..... 唉, 怕左你

醒起之前承熹係學校做左個花燈, 用返同一概念, 整左架'混凝土車'俾佢

即時開心晒!!!! (好彩過關, 否則我都唔知點死架混凝土車俾你呀, 大帝!!!)

之前諗住開始教承熹認下中文字, 但其實我好懶咁教, 記得就教,唔記得又無教幾日

有一日佢無啦啦去CD到搵碟時, 佢好興奮咁走黎同我講: 媽媽, 你睇下, 呢到有個"小"字!!!!

嘩, 我聽到後好感動! 因為前一日問佢, 佢仲成舊飯咁唔識答, 但依家突然識之餘, 仲會係第二到見到然後話我知... 哈哈!

學烏吱媽話齌, 當小朋友有良好既反應, 係一個好好既推動力令媽媽再教落去, 就算嘔多十擔血都值!

某一日.... 當我係到用緊係Fei E到買既超聲波機導入緊....

承熹: 媽媽, 媽媽, 你睇下... 我好似你咁 (原來佢又用啲玩具扮我! 佢仲將個釘反轉,圓形個邊扮超聲波頭碌面, 同之前探熱針係有唔同架!)

我同大少原本傾緊計, 一見到即時笑爆咀, 因為承熹真係好有創意, 笑死我地!

其實佢仲有好多呢啲創作, 但我未post.. 遲啲一定要分享!

2012年10月16日星期二

承熹病倒了

承熹上星期去完溜冰後, 當晚半夜突然發高燒, 燒到39.x

我地屋企無晒高燒藥, 只有普通退燒藥, 啦啦聲食左一次睇睇情況如何

大約去到零晨四五點發現依然高燒, 最後都係決定帶佢去養和急症睇睇

感恩係我老豆剛好係香港, 可以叫佢過黎幫忙睇住妹妹, 否則又要帶埋妹妹去 >_< (係呢啲時候, 家人真係好緊要)

承熹燒到39.5, 但感恩佢無乜扭計, 只係喊左一陣話肚痛... 初時以為佢又腸胃炎 (因為食手指原因, 承熹由細到大病親多數係腸胃炎, 所以我覺得佢既腸胃係比較弱)

以前睇開屋企附近個位兒科葉醫生, 承熹有少少怕佢, 因為葉醫生個樣較惡同埋講野無咁溫柔, 所以佢一掂承熹, 承熹就反抗

相反今之第一次去睇急症, 養和啲醫生姑娘都比較溫柔, 承熹出奇地肯俾醫生掂, 仲自動自覺打開口俾醫生睇口腔, 病緊既佢咁合作, 我真係好感恩!

最後醫生話佢喉嚨有少少紅, 未係好嚴重, 所以唔開抗生素住.

我聽完都安心晒~

打後返屋企食左高低燒藥即時退燒~

不過好景不常, 訓醒覺後又燒過, 又係一燒就39.x

今次再食藥都無用了!!

留意左一整天, 都係一樣無乜退燒現象, 同佢著少衫, 又起雞皮, 明顯發冷, 攪到我同大少都手足無措!

如是者, 我地夜晚十點幾十一點又去睇急症 (因為今次最高燒到成40.x)

其實承熹都算好合作, 佢都肯飲好多水, 已經不停去廁所, 但唔知點解依然唔退燒

今次睇完, 醫生話一般過濾性病毒會燒三四日, 如果食得訓得好精神都唔洗驚...

佢話發燒係唔會燒壞腦, 除非有菌上腦, 但如果有菌上腦, 佢既反應一定唔會咁精靈, 同埋啲燒係就算食藥都唔會退的

聽完之後都放心啲, 因為做媽媽既最怕就係小朋友"燒壞腦"

所以, 我地今次攞埋抗生素作後備, 如果再燒我地就要食抗生素了!

呢張單張係養和攞, 俾大家參考下

可憐既承熹, 個頭熱到辣手, 但個身就不停起雞皮發冷

但感恩既係, 雖然承熹發高燒, 但平日佢都好生猛, 好似無事咁, 食得訓得玩得

八卦妹妹依家好鐘意扶住野自己企起身

哥哥都好好, 見到妹妹起身, 即時扶住妹妹

有乜可以令到佢地睇得咁入神? 咪YOUTUBE是也!

妹妹呢個星期好勁, 無啦啦七點就眼訓, 初時諗住佢訓一陣九點再起身食奶, 點知佢可以一訓訓到第二日八點幾, 試左三日都係咁! 正一懶訓豬

最後, 承熹尋日都係持續發高燒, 我今次帶佢去吱媽介紹既醫生 -- 曹延州到睇, 希望承熹睇埋今次真係會好返晒!

點知睇完曹醫生, 曹醫生話承熹成個喉嚨含晒濃喎, 淋巴發炎, 要打針, 食抗生素, 星期六仲要返去覆疹!

OMG... 原來咁嚴重!! 醫生問我, 佢無其他唔舒服咩? 我話佢除左發燒, 乜異樣都無, 食得玩得訓得, 所以以為佢無乜大礙 >_<

醫生同姑娘都好驚訝? 佢個喉嚨應該好痛, 仲可以咁生猛?

我心裡只可以話"感謝主" ^_^

臨尾打針時, 承熹喊到劏豬咁 (因為打大脾, 姑娘都話呢針係會比較痛), 但姑娘一打完攞樽糖出黎, 承熹就喊住話: 我要兩粒!!!!

佢仲識咁講, 證明佢仲未病得好勁, 可以放心! 哈哈~

希望承熹快啲好啦!

2012年10月14日星期日

承熹第一次溜冰

上星期六約左淇淇一家去太古城溜冰

我地原意想俾小朋友學溜冰, 但又怕佢地驚, 俾左錢先話唔學就浪費

所以我同淇淇媽捨命陪細路, 率先親身帶佢地先溜一次睇下反應如何?! (淇淇媽仲要係人生第一次玩溜冰, 為左個女, 佢都夠膽落場玩, 呢個媽媽真偉大!)

其實我細個(小學年代)學過兩年, 但之後一直都無再玩, 所以今次要我再踏足冰場, 其實我好驚!!!!!

承熹同淇淇剛好相反, 佢地十分期待~

小朋友溜冰鞋最細應該係23碼, 承熹腳長大約14cm, 著23碼佢話太緊, 24/5就啱

承熹初初唔太識行, 但佢都無抗拒去試, 仲好心急想出去溜

反而我好緊張, 咁耐無溜, 真係有啲怯!!!!! 我跌唔緊要, 最怕累埋個仔麻~

我自己出去溜左兩三個圈, 真係不復當年, 直程好似初學者咁! 可能人越大真係會越細膽, 成日好驚跌

所以最後我都係同承熹係旁邊玩算啦, 唔好走咁遠!

中途休息一下!

我地同淇淇一家係o係playgroup認識的, 淇淇係一個好聰明, 好懂事既小女孩, 係同班中明顯成熟過其他小朋友

但我都係最近先知, 原來佢係同承熹同年同月同日出世!

以前未好認識佢地之前, 我同大少講過, 淇淇好醒目, 係同班入面既女版承熹 (哈, 讚人地個女之餘又讚埋自己個仔, 哈哈!)

因為當時同班中, 我記得淇淇又係會坐定定, 肯跟老師指示, 唔會亂喊亂叫, 就算第一次無父母在旁上堂, 都好似得佢同承熹無喊過!

所以我對佢印象好深刻, 但無諗過原來佢地咁有緣, 連生日都係同一日~