大大大大大大大大閘蟹

又到食大閘蟹既季節..

大家有冇狂食呢?

我本身唔係十分勁愛蟹, 但近年都會捧下場, 食返一兩隻

依家啲團購又咁盛行, 買蟹又平又方便!!!!!!

所以上星期約埋三五知己一齊"拆蟹"

今次我地買Group buyer既老三陽, $148 (5.9-6.3兩) & $79 (4.9-5.3兩)黎試.... (依家仲做緊架)

好彩有Miele Steamer, 可以一次蒸到13隻, 勁方便 

(入爐蒸25MINS即可, 如果數量較少, 20MINS都已經可以了!)

另外再簡單煮左個炆牛肋條配義粉, 煲左個蕃茄粟米薯仔湯

主角出場... (溫馨提示: 蒸前記得反轉蟹肚向天, 放紫蘇葉係面先放入爐蒸啊!!!)

下次要買多一兩隻預埋俾承熹同采霖食, 佢兩個都好鐘意食蟹!!

$148的... 係大隻少少, 啲膏都OK多, 最鐘意"漿口"既感覺!!!!!!!!

$79的.. 個size細少少, 但綜合大家既意見覺得 - $79/隻係抵食過$148/隻!

  相對個size & 價錢, $79/隻仲好似較多膏, 所以黎緊如果再食, 我地都就揀$79/隻~

最後仲有黑糖薑茶湯丸, 大家食到好滿足!!!!

依家天氣開始涼, 聚埋一班好友一齊食下大閘蟹, 打下便爐, 燒下野食, 真係人生一大快事 ^_^

秋季湯水- 無花果燉瘦肉湯 by Miele Steamer

最近天氣明顯變得乾燥左

承熹上星期食食下飯打左個"乞痴", 成枱都係鼻血... 嚇到我地呆晒!!!

每逢到左秋季一定要煮啲滋潤湯水黎補補去, 依家除左為自己, 更加要顧及埋啲小朋友~

今朝俾我搵到個又簡單又好飲既湯譜, 即刻去街市買料試試

材料十分十分簡便:

無花果 4粒 (如大size可2粒), 蜜棗1粒, 薑1片, 20蚊瘦肉

做法:

瘦肉出水, 然後將以上材料放入燉盅, 加大約750ml 水, 燉1.5小時即可 (我用蒸爐燉, 一樣時間)

自從有左Miele Steamer 後, 屋企好多野都俾左人, 例如BB奶樽烚, 燉盅, 蒸架等 (其實個飯煲都可以退休..哈哈)...

因為一部機已經可以做晒, 慳返好多位

蒸到最後8分鐘仲可以放埋條魚入去一齊蒸, 慳電慳時間, 勁方便!!!

味道唔濃, 好清甜! 呢款湯水健脾益氣, 潤肺生津, 大家不妨試下~

杏汁木瓜燉雪耳

眨眨眼, 原來已經兩個月無寫過yblog了~

有add我fans page既朋友就會好清楚我們一家每日既狀況, heeee

因為手機既方便程度加上我部電腦壞左既原因下, 我大部份時間都用左手機去upload相或近況, 實在有點懶惰去開機寫blog

今日心血來潮想整杏汁木瓜，所以借左大少部電腦黎寫呢篇blog, 同大家分享下呢個簡易食譜～

跟手將呢條link post返去我個fans page俾我啲朋友知道下點整!!!

Step 1 : 先將南北杏加1-1.5 杯水打成汁

blend完過篩2次

Step 2 : 將適量冰糖，一杯牛奶加入杏汁內一起煮滾（冰糖份量我係一邊煮溶，一邊試味，夠甜就將舊冰糖撈起。另外我加左無花果一齊煲）

煮滾後熄火攤凍就可以倒入木瓜裡

step 3 : 洗淨木瓜，切開頂部（留起），刮囊備用。我揀左放入Mug 到，fit size 又入到蒸爐蒸，仲啱晒一人攞住一杯，方便進食:-D

之前浸左啲雪耳，每隻放少少入去

Step 4 : 將杏汁倒入木瓜至九成滿，蓋上木瓜頂

用Miele 蒸爐細木瓜仔其實20～25分鐘已經可以。我今次燉左30mins (上網睇啲食譜教燉1小時，但Miele 個爐可以短啲時間完成，所以我較左45mins.. 點知30mins攞出黎check 下發現已經ok., 仲偏向淋左少少）

因為我用既係小型木瓜，約手掌搬大，所以內籠都唔會太大，加埋少少雪耳，少少無花果，好好味！ 最驚喜係個份量啱啱好，食完唔好飽到上心口，好舒服～ ＾＿＾

不過如果大家鐘意飲多啲杏汁，可以唔放雪耳及無花果，效果更佳！！


材料：小型木瓜4個、南杏40克、北杏10克、冰糖隨自己喜好、鮮奶1杯（視乎你想杏汁濃定淡）

Tips: 南杏：北杏比例為4：1，預先浸2小時待軟身
          無花果預先浸一小時，剪開小塊備用
          雪耳要預先淨，去頂備用


有興趣add 我fb既朋友，click 右手邊條link 啦～ 

bye bye! （最後我都係要用 note 2 出blog, 大少部腦都係時候打柴了）

團拜新菜式[荷香麵包蟹蒸糯米飯]

過年時期初七個日係我同班best friends既團拜聚會

今年過年想整一啲新菜式, 所以除左過年必備既發財好事, 冬菇炆雞腳外, 我今年特別仲整左荷香麵包蟹蒸糯米飯, 燒腩仔同埋珊姐雞

燒腩仔同珊姐雞都係跟馮美基May姐本食譜

而<荷香麵包蟹蒸糯米飯>就係跟Miele之前係大閘蟹季節時係Sogo 10/F Miele counter攞既食譜咭整既

不過我就唔係用大閘蟹, 改用麵包蟹

初時都有啲擔心會失敗, 因為我本身唔太愛食蟹, 所以怕唔識整

但好感恩, 出到黎既效果十分十分好, 大家仲激讚

最開心係, 其實個做法係超簡單, 效果卻好好, 啱晒我地開party食 (好味得黎又唔阻時間去整)


今次我整左六個餸, 一個飯



發財好事同冬菇炆雞腳雞翼係前一晚整定

 

當日只係用焗爐整燒腩仔

且埋烚珊姐雞

其餘都唔洗點落獲炒, 亦都唔洗成日留係個廚房

啲西蘭花同糯米一齊蒸, 蒸3分鐘即可, 保持翠綠又唔會太淋

當日朝早買既麵包蟹, 屋企樓下個街市有間海鮮批發店, 所以可以買到好多較特別既海鮮

下次想挑戰龍蝦!! heeeee



做法非常簡單

糯米先浸3小時, 然後蒸40mins, 我煮左8 嘜米 (用獲蒸可能要耐少少)

溫聲提示: 糯米已浸軟, 所以蒸飯時唔洗落太多水, 比正常煮飯減少1/3

蟹切件洗淨, 用鹽, 糖, 豉油, 熟蒜(我用李錦記蒜蓉醬)及少許薑醃30mins

兩塊荷葉洗淨, 用熱水過一過令佢軟身 (用蒸爐蒸1分鐘亦可)

最後拼埋: 將荷葉放底, 放入糯米飯, 蟹件鋪面, 連同蒜蓉粒以100度蒸20分鐘 (視似蟹既大小再加減時間)

即可~ 


真係超級方便

啲糯米飯完全吸晒蟹既鮮味, 加埋蒜蓉吊味, 真係好好食!!!!

每次同一班好朋友聚會, 見到大家食得開心, 玩得開心, 就算幾辛苦都覺得值得... (不過今次真係好輕鬆)

蘿蔔糕 by Miele Steamer

哈哈!!!!

哈哈哈!!!!

哈哈哈哈!!!!


今年我整既蘿蔔糕終於出爐啦~

話說兩年前係家姐(大少奶)親自教導下整左幾底蘿蔔糕係超正的, 但自從個次之後, 我自己再整左一次就係失敗的, 水太多, 濕到切唔到一件件黎煎

但經過上次失敗既教訓, 今年我終於成功啦~

除左有成功感, 我最開心同覺得好爽既係, 今年有Miele Steamer 既幫手, 我可以一口氣蒸八底糕

原來一次過咁蒸, 唔洗分開幾次蒸, 又唔洗睇火係咁爽的

真係又要讚下自己今次無投資錯誤買左呢個爐返黎, 因為實在太好用啦!!!!


等我分享下我今次整既細節啦... 哈哈  (我個食譜都係跟大少奶的, 大力推介!!)



首先, 記得買大少奶既""大少奶的快樂廚房"", 跟住做! 哈~

今年有伴一齊整, 因為朋友仔都好想試下用Miele 蒸爐係咪真係咁勁, 所以一早已經約定我今年一齊整蘿蔔糕

我地總共整左12斤蘿蔔, 我刨6斤蘿蔔絲, 佢切6斤蘿蔔條, 雖然刨刨切切既過程真係好攰, 但係有朋友一齊傾下計, 笑下講下, 啲時間又易過好多

以上用料除左蘿蔔可以好肯定咁講用左12斤外, 其餘都係按自己喜好而預備!  (當然, 多料啲會口感豐富啲~)


蝦米, 瑤柱及冬菇用水浸軟, 啲浸泡過既水唔好掉, 留黎溝粘米粉漿



先將蝦米, 瑤柱, 臘腸及冬菇用豉油, 酒及白蔥爆香, 撈起備用!

然後開始炒蘿蔔大約5分鐘, 炒完有少少收軟 (刨完蘿蔔會有好多蘿蔔水, 如太多我會倒走少少, 咁樣我覺得容易啲控制水份, 唔會太濕)

炒5分鐘後加入粘米粉漿 (300g粉+ 2匙羮粟粉 + 12安水/360ML(水可用多餘的蘿蔔水及之前浸泡過既冬菇瑤柱水混合) + 生油 + 雞粉+ 胡椒粉 + 麻油)


加左漿後不停炒, 好快會感覺越炒越重身, 然後再加入備用既配料, 再一齊炒至均勻



炒到感覺千斤重咁, 好難再翻起就差不多



炒到枝獲剷可以"動L"係啲蘿蔔糕中, 可以想像係幾咁實同黏 



今次枝獲剷又孿左!



入爐前

最後12斤蘿蔔做到12底中size錫紙兜既份量, 呢個份量送禮最適合!!!!  (二德惠有售, 連蓋)



承熹放學返黎見到都嚇左一跳

 

 

到左全個過程最令人期待既時刻 ------  就係入爐蒸啦, 一層可以放4底, 兩層就蒸到8底, 勁呀~

100度, 45-50MINS 即可!  (中途唔洗加水)

 

上下兩層, 上層用普通鋼架, 唔會阻住下面; 下層用鋼兜, 又唔會頂住上面, 最佳拍擋!

登登登登!!!!!!    終於攪掂晒... 飯後大少忍唔住煎左一底黎食, 味道好唔錯, 唔會太咸...  最估唔到既係, 承熹勁捧場, 不停追食!!!


有Miele蒸爐咁方便, 又有大少奶既食譜, 整蘿蔔糕對我黎講已經唔再係恐懼, 黎緊都會再繼續整多幾底送俾親朋好友, yeah~  


食譜 & tips (copy from 大少奶)

材料：(兩底)
粘米粉    300g
粟粉 2湯匙
鹽 半湯匙 ~1湯匙
麻油    少許
胡椒粉   少許
臘腸  、 蝦米、瑤柱   隨意
白蘿蔔   3斤 =1815g (我做法係分成兩份，一半刨絲，一半切幼條，呢種質感較好)
水    12安士

*倒入糕盤時要分幾次，每次倒入時要輕輕壓實，完成品就唔會鬆散