養尊處優福岡trip - Day 4 (a.m.)

Day 4 - 黑川 --> 草千里 --> 阿蘇火山 --> 高森田樂保存會 --> 黑川

終於講到一半啦!!!  其實都幾怕寫遊記, 因為實在太多相要整理, 好費時啊.. 但唔寫又驚將來無得回味...總之就好矛盾~

係黑川第一間溫泉吃過豐富既早餐後, 今日行程係向阿蘇山進發! 好彩既係無落雨, 但天色都唔算太好...

初初上到草千里既時候, 天色仍然有少少灰灰暗暗; 之前睇人地既遊記發現好多人上阿蘇上都會撞啱大霧, 陰天落雨等而攪到睇唔到阿蘇山既壯觀.. 話雖如此, 都要黎碰一碰運氣!

福岡除左出名士多啤梨外, 牛奶都好有名氣架... 真係好香奶味!

草千里其實無乜特別, 只係一大片擬似草源既地方(我諗夏天會靚d), 有得騎馬行個圈, 附近食下野, 買下手信, 仲有一間阿蘇火山博物館, 可以係話上阿蘇火山前既中點休閒站!

一場去到, 當然入埋博物館睇下先走... 內容大多數都係講呢個火山點形成, 仲有最得意係佢地原來set左個Camera係阿蘇火山口, 遊客可以自己將個鏡頭zoom 前zoom 後左右去睇清楚火山口最近最近既真面目!

係呢到買左好多手信, 食左好多唔同既野 (有好多試食架,,hahaah) 就繼續上火山口~

如果無揸車既遊人可以坐呢d 吊車上阿蘇火山口, 而揸車既就行另一條路! (當然兩樣做法都要俾錢啦~)

Wooooo...終於上到山啦!!! 最開心係天氣突然放晴, 有藍天白雲啊, 感謝主!!!!!

呢d聽人講係in case個火山有乜事, 俾人係呢到暫避!

終於親眼見到世界一大火山口 -- 阿蘇火山!!!! 

其實呢個火山仲係活躍緊架, 對上個次活動係08年12月底, 不過我相信佢地俾得遊人參觀都應該做左好多安全既research 確保無事先俾人上去, 真係好壯觀, 睇到我又驚又興奮啊!

其實突然多左好多白煙噴出黎, d煙其實都有幾重既硫磺味, 在場既遊客包括我自己都感覺呼吸有少少困難, 不停咳,, 所以如果氣管有問題既朋友, 自己就要小心d!

好開心..終於上左黎啦! YEAH~

其實阿蘇火山唔止一樣野睇, 仲有四個景點的, 不過其他就可能無咁吸引.  呢到有直升機服務可以乘坐遊晒五個景點, 同埋可以係上空直望阿蘇火山口... 不過d直升機望落都幾細架, 而且好殘舊, 我地唔敢坐!

太多相啦.. 有興趣可以去相薄到睇!

懷念

最近係呢邊成功教識一d朋友打台灣麻雀, 最好笑係打完一次後竟然令佢地上左癮..依家每日都"撩打"啊...哈哈! 

好耐都無開爐做包包... 之前做左一隻北海道包包, 用新既長模做, 出黎既效果好靚呢!

見到好耐無食既home-made bread, 好懷念呢!  唔得, 我要的起心肝努力d再做包包, 唔可以再咁懶散啊!!!

養尊處優福岡trip - Day 3 (p.m.)

Day 3 (p.m.) - 由九重夢大橋 --->  くじゅう花公園 ---> 黑川溫泉

由九重夢大橋去くじゅう花公園只需開大約半小時車程已經可以到達.  可能因為當日落雨, 加上四月頭未係時候睇花, 所以成個花園只有幾個遊客, 有少少孤寂既感覺!

大家見唔見到d雨落得幾咁密, 其實呢一日去邊都唔方便, 雖然知落雨睇花應該都幾無癮, 但總算完成一個自己想去既地方, 睇下有咩睇都好!

好鐘意呢張相, 個focus 正正落於謝左個朵花到, 感覺好outstanding...但有少少孤單既感覺!

雖然都有少少花海睇, 但相比北海道個d, 真係差好遠... 可能未係時候掛?! (搵唔搵到我啊?)

花園內極力推介既香腸'屎'餅!

好好味!!

行完公園, 由於天雨路滑, 提早往黑川入住當晚酒店!

黑川區有十幾間溫泉酒店, 大部份都集中埋一齊.  而黑川亦有一間黑川溫泉觀光協同組合(<--click呢到), 呢個辦事處主要係收集晒所有黑川溫泉區旅館既資料, 訂房事宜都可以係呢到幫遊客攪埋, 十分方便! 

如果遇到任何問題, 都可以以email詢問佢地既職員, 佢地有人識講英文的, 而且回覆清晰快捷, 唔怕雞同鴨講!

當日係星期六特別難訂房(又加上我好遲先book), 最後好彩得黑川協會既職員幫我訂先順便搵到心水酒店咋 --- いやしの里　樹やしき

山みず木係我地入住四間溫泉酒店內第二間最靚,, 而且規模都好大, 好別樹一格啊!
一去到先會邀請我地去飲杯熱茶攤抖下, 然後先慢慢check in

呢間酒店規模好大, 主要分開兩part, 由房行去lobby or 某d 溫泉需要行一小段路先會到,, 雖然有少少麻煩, 但佢地途中既擺設都好靚, 可以順便影下相!

見到酒店內既小路有D野生菇菇, 好得意!

房間尚算大,  而且都幾靚! 我今次住多幾間溫泉酒店先知道大部份既溫泉酒店房係無得沖涼, 得一間好細既洗手間, 而手面盤則放係房入面.  沖涼就要出浸溫泉既地方先有附設. 

每間酒店都有提供和服&外套, 就算出街好多人都會咁著住, 其實都幾方便, 而且仲好有地道感覺, 我鐘意!

當日晚餐安排係房間享用, 有太多食物, 當中覺得最好味就係九州幾出名既"馬肉刺身". 初初覺得好似好生, 應該麻麻地.. 但食落卻出奇好味! 我同大少都覺得值得一試啊~

食完飯休息一陣就去浸溫泉, 其中一個溫泉就係係我地間房隔離, 超方便!  而且呢間好似無限時間, 只係每晚九點半至十點係男女換湯時間所以唔用得, 其餘時間就幾夜浸都OK~

除左男女湯外, 仲有家庭風侶 - 所謂家庭風侶係一間溫泉房, 係俾住客私人享用, 唔洗下下分開浸!  呢種家庭風侶有d係入住時要預約時間, 有d酒店則係先到先得既方式就可以使用! (免費的)

因為私人享用, 所以我就帶埋相機影左幾幅相做紀念... 浸完溫泉暖立立, 返入房即刻五秒入睡~

養尊處優福岡trip - Day 3 (a.m.)

Day 3 - 別府 ---> 九重夢大橋 ---> くじゅう花公園 ---> 黑川溫泉

一早係別府竹井乃酒店浸過溫泉後, 食埋個早餐就出發往"九重夢大橋".

當日天氣相當麻麻, 天陰陰不特止, 仲要有幾密既細雨紛紛.  一心諗住去九重夢大橋, 阿穌山等地方 (其實我地既行程係好flexible, 都無乜點plan實..heee), 最後決定只係去九重夢大橋 & 花園行下就算!

真係好大霧啊!  一步一驚心~

九州好多地方如九重夢大橋, 阿穌山或黑川都係要上山, 而且山型'於'迴曲折, 好多髮夾彎, 如果手車唔係太得既人揸 (即係我) 真係嘔都似!

途中有一間茶屋, 可以係到買下手信或者食d野醫肚!

當日真係好凍好凍... 係咁多日最凍既一日!

經過一輪長途拔涉, 終於到啦!  由於 d 雨都落得幾密, 但行大橋係唔可以帶傘, 所以一定要買件便利雨衣, 原來膠雨衣都有d保暖作用..哈!

條橋比起想像中無咁特別, 仲諗住叫做大吊橋, 行既時候會搖黎搖去, 但原來唔係呢一回事囉! 失望~

從橋望出去既風景.. 其實係無乜風景!

來回行完一轉即走.. 好凍啊!

又凍又餓, 即時係大橋附近一間餐廳食Lunch

呢到D雞都幾出名, 佢地會炸黎食, 叫呢D做天婦羅, 但食落唔似一般既天婦羅, 只係炸雞! 但味道真係唔錯, 好滑, 好juicy 呢~

係去福岡前係東京食過一碗好好味既烏冬, 自此成日都好想食烏冬... 日本d烏冬真係好好好好味...好彈牙

食完一餐好滿足既LUNCH, 個天色仍然唔好, 所以skip左去阿蘇山, 改為去くじゅう花公園 睇花.. 哈.. 人去旅行, 我地去旅行, 我地真係去得好HEA~