9m3w

自從承熹出牙仔後, 我都會盡量每餐食完後幫佢清潔牙齒, 但成日都會唔記得! 哈~

之前試過用濕毛巾幫佢抹牙仔, 但承熹唔係次次都肯俾我塞隻手入口, 同埋佢都唔鐘意我掂佢個咀!

所以我就買左隻牙擦仔俾佢用, 隻牙擦仔個擦頭當然唔係大人有毛個款啦, 只係膠狀既牙擦, 所以承熹就會好鐘意, 當牙膠咁咬!  純粹俾佢摔下口腔, 等啲奶唔好痴住係啲牙肉到

一路擦牙, 一路玩瑜伽

玩到忘我境界, 哈!

係承熹剛足兩個月大時同佢去Face影相, 因為一啲小誤會攪到依家先攞到相薄!! 眨下眼承熹依家已經九個月大了...

睇返承熹兩個月人仔既樣, 其實同依家比, 變化唔算太大, 但行為同思想當然就大個左好多啦! 不過我好鐘意佢呢輯相個樣, 對眼真係好大好圓, 成粒龍眼核咁, 依家無左以前個種好BB既感覺, 我好懷念呢~

話時話, 我有冇post過佢六個月大係台灣影個輯啊?? 我自己都唔記得添~ 

現階段既承熹應該唔知相入面呢個係佢, 只係好好奇咁摸!

但佢照鏡時會好開心, 係咁向前衝想摸塊鏡, 可能佢以為係第二個BB同佢玩

阿仔, 你將來結婚時唔怕無童年相做video, 大把相你揀, 真幸福!!!

話時話, 我覺得Face既套餐都幾貴, 唔係太值!!!! (我初時係買佢$988個package, 包20張相+8"相架, 但後來我地都係買晒佢全套相約二百張, 盛惠 $4xxx 包8"水晶相簿連掛牆長相架

水晶相簿

長相架

8"相架

雖然係唔太值, 但好衰唔衰佢影出黎既效果係我想要的.  因為我同大少都唔係太鐘意影BB造型照, 感覺好一式一樣, 我鐘意捕捉BB自然樣, 好簡潔個種!  黎緊我會再去另一間影, 希望個間影出黎既效果會唔錯啦~

到時再為大家介紹下

摸多兩摸又黎一貫既作風, 又放入口咬!!!!

阿仔, 呢本唔食得架! 唉~

9ms 點滴

噢, 呢排好忙, 但又唔知忙咩, 好耐無update下承熹既逸事添 ~

感恩感恩, 非常感恩!!!!

承熹自踏入九個月大, 除左有三晚醒過外, 其餘日子都可以一覺訓天光 (點解我咁好記性, 因為我日日都有寫關於承熹的日記, 哈!)

之前講過承熹有飲七星茶, 飲左個排去便便係好左, 日日都有 (之前唔知係咪轉3奶2粥, 所以有時兩日一次poo poo), 但由於七星茶呢啲都係附助食品, 所以我都唔敢飲太多, 一盒有二十包, 我俾承熹飲左一星期就停飲.  好彩佢飲完都繼續日日有便便

但其實我唔知七星茶同開奶茶有乜分別, 我初初以為開奶茶係令BB提高食慾, 但七星茶都有寫有開胃作用, 所以我都唔?知! 

九個月既承熹, 究竟有乜大變化????

其實都無乜特別, 唯獨係第五隻牙仔都開始出緊, 係上面大牙既右邊, 真係睇住佢啲牙出, 就覺得佢個樣越黎越唔同..   仲有我自己覺得佢塊面無之前咁肥, 但好多人仍然話佢好肥????

其實我唔鐘意BB太肥, 但見到佢以前啲相塊面圓啲, 覺得好攪笑, 所以有時都唔想佢太瘦!  Anyway, 健康就得, 肥瘦都唔係大問題

承熹依家既生理時鐘健康左少少, 之前佢好懶訓, 每日都訓到九點幾十點先起身, 所以一日食得四餐! 但後來同佢調教返早起, 依家可以食五餐, 好似會勻衡啲~

7:30- 8:00a.m ----  起身食奶
8:30-11:00a.m ---- 俾工人姐姐同佢玩, 我再繼續訓一陣 (但工人姐姐話佢好乖, 朝早放佢係highchair俾啲玩具佢自己玩, 然後工人姐姐係廳到執屋打掃, 佢都無咋型! 到工人姐姐攪掂先抱佢落playmat玩.  我試過偷望承熹係咪真係咁乖? 原來係真的, 不過我唔敢俾佢見到我, 因為佢一見到我就會扭我抱)
11:00/11:30a.m --- 食粥, 飲水
12:00pm --- 訓晏覺
2:00pm / 3:00pm --- 起身, 飲下午茶奶奶
3:30pm-6:30pm --- 同佢係playmat玩, 但有時五點又可以再訓, 訓到六點幾
6:30pm --- 食粥, 飲水
7:30pm --- 沖涼
之後繼續玩, 到我地大人食飯時佢會坐highchair, 坐係我地隔離, 俾少少生果佢食 (其實係塞住佢把口唔好嘈), 玩到九點半飲奶, 大約同佢磨到十點幾訓!

日日大概如是, 暫時都OK, 唔算好辛苦! 哈~ 因為有工人姐姐幫手真係好好多 

不過我覺得最難攪既係承熹仍然係好多口水, 而且超鐘意食手指同埋放野入口咬, 真係乜都咬, 好似小吉咁! 好煩~

之前朋友介紹過一隻手指水, 話擦係手指或奶咀到, 當BB食既時候會食到好苦, 苦到佢地唔敢再食! 無錯, 呢隻野的確好苦, 我自己都試過...

承熹初時都怕左, 唔敢再食手指, 但試多幾日, 佢條友仔開始唔怕苦, 照食! sigh~

大少話如果再擦, 佢又照食, 怕佢既味覺會有問題, 所以叫我唔好再俾佢食, 遲啲再試過!!!

唉, 真係俾呢隻仔激死!!!! 都唔明點解咁苦佢都可以忍, 難道手指對佢黎講真係咁重要??

小豆丁, 媽咪愛屎你!!!!!!

May's Cookies 一口曲奇

上星期四大少奶又帶我去威, 今次去食甜野...

但大少奶一直都唔肯話我知去邊間食, 食啲乜, 攪到我心思思左幾日!

一落車就俾May's cookies既招牌吸引左, 我知道一定係去呢間到食好野!

一入到去裝修好簡潔, 俾人好舒服既感覺, 呢種顏色好特別!

個店名大大隻字寫住May's Cookies, 故明思意當然有cookies賣啦!

 

其實呢間May's cookies係馮美基小姐開既, 但我好愚昧, 唔知邊位係馮美基小姐 (枉我做左咁多年TVB 忠心粉絲!!!)

信相大家一見到佢個樣就會認得佢係邊個

由於我地識得曲奇店既負責人(Elaine), 佢透露左好多馮小姐對食既個份執著同熱愛烹調既性格, 令我對呢間名人曲奇店少左一份"名牌效應"既感覺 (由於現時太多都係名人開既餅店, 開始有少少麻木), 反而多左一份信心.

另外仲知道原來每一件曲奇同蛋糕都係佢地一伙人自己親力親為去試去不斷究研, 務求做到最好Quality先推出市面, 每日都係新鮮運到, 蛋糕絶不過夜, 所以每日只會做有訂定既存貨, 或者有時都會做多一個出黎賣, 保證日日新鮮!!!! (如果有興趣訂購既朋友, 記得一定要打電話去book啊!)

同埋佢地所用既材料都係由外國入口, 成本一啲都唔馬虎! 

講左咁耐, 要介紹一下呢個皇牌Crunch Cake

除左美心既天使蛋糕, 我未食過其他品牌既Crunch Cake, 呢個Crunch Cake食入口第一個感覺係 ---- 點解個戚風蛋糕可以焗到咁彈牙?! 係, 係用彈牙黎形容, 即係好似去試床褥咁, 你座完落去, 個床褥會彈返起身咁,, 哈哈~

佢唔似一般戚風蛋糕, 除左軟熟, 食得出有好多空氣係入面, 令蛋糕焗得好高好彈, 做得非常出色! 同埋佢既焦糖脆脆係我同大少奶既至愛, 好香口, 但又唔會太甜!!!!!

另外就係佢既Cream係用左無糖Cream去包住個蛋糕, 啱晒怕甜怕漏既人食~

另外再試既就係曲奇

我自己個人認為曲奇呢家野好難去評論好唔好食?! 因為曲奇有好多質感, 口味同配搭, 市面上有太多太多曲奇專門店, 我諗真係要你自己試過先知邊隻啱你口味!

我聽過有人話覺得最好味既曲奇係 ---- 藍罐曲奇!!
亦有人話覺得Jenny Bakery既曲奇鬆到似食沙?!
最令大少R爆頭係, Mrs. Feild又貴又甜到死既曲奇, 點解都有人買? 

哈, 真係各花入各眼!!  但對於我黎講, 我覺得曲奇食落唔漏, 唔太甜, 夠新鮮就已經好好食.  我只可以話呢間合符我要求, 值得一試! 尤其個Double Chocolate Cookies, 朱古力味好濃但唔太甜, 我至愛~

大盒裝$148/細盒裝$53

比起市面既名牌曲奇, 呢個價錢唔貴, 細盒裝用黎做小小心意最啱~

另外佢地都有結婚回禮裝, 個盒好大體, 曲奇好可愛!  $25each set 包咭包送貨

 

另外我好鐘意佢地呢啲迷你蛋糕(3寸), 好啱兩三個朋友慶生日但又想切蛋糕用, 細細隻原個蛋糕每人食少少唔會飽死荷蘭豆!

仲有其他口味!

臨走時Elaine好好人咁送左個Banoffee Pie俾我攞返去同大少食, 大少向來唔好甜品, 佢都話正!!!!!!!!!!

多謝Elaine既熱情招待, 好期待你地12月係LCX開店, 到時街完街都可以買個迷你蛋糕返去同老公sweet sweet~

 

 

餅店位置係星街對落一條橫街

地址：灣仔進教園6號地下
電話：82291111

十一月廿四至三十日may's cookies在銅鑼灣sogo有售.

而12月開始LCX都會設有小鋪，如果九龍區人士都可以去LCX睇下丫

聖誕會推出古力同聖誕版既曲奇呢

 

9 months mini Birthday Party

上星期三係承熹九個月大了!

今次好特別, 有姨媽(大少奶) 同佢舉行一個迷你生日會, 真係迷你到得三丁友 (唔計工人同承熹)

其實我地本身一早諗住約星期三係屋企整野食, 食完去行街, 但撞啱星期三係10號承熹滿九個月大, 大少奶最鐘意無啦啦都慶祝一番 (haaa...), 所以就叫埋阿茄一齊出席!

姨媽對呢個生日會仲好認真, 買埋生日禮物... (多謝埋姨丈大少爺)

承熹既九個月生日禮物!!

姨媽由承熹未出世個日已經開始話(恐嚇)要送波波池, 石師子, 一套鼓同乜乜物物俾你, 佢誓要質爆我間屋為止.  依家佢好好心地咁送左個迷你屋企連波波, 算有良心架啦, 同埋呢間屋係收得埋的, 咁我都無咁驚!

承熹仲同姨媽玩得好開心, 呢間屋仔可以俾佢爬出爬入, 屋頂有分數牌掟波波, 玩到歲幾兩歲都應該啱玩, 如果有小朋友黎我地到, 仲可以一齊玩添!

承熹個日無訓到晏訓, 有少少呆濟, 但都OK, 有得玩, 幾眼訓都笑得出!

間屋佢未識玩住, 唔係好敢自己爬入去, 除非我都係入面佢先肯爬入黎, 但啲波波佢就好鐘意, 又攞黎食!

做BB真係好, 無憂無慮但又萬千竉愛... 承熹, 我老左你會唔會一樣對我咁好? (好難啦!)

是日迷你生日會食物有.......

我既撚手海鮮意粉!!!!!!! 我炒義粉的確係幾好食 (唔知醜... hahahaa)

仲有既係大少奶的烤雞 (可惜我個爐唔生性, 發熱線唔平均, 攪到隻雞黑左!)

呢隻雞真係百吃不厭, 連雞胸都好滑, 好味到癲~

仲有我好耐無整既'日本綿花芝士蛋糕' (呢張相係後補, 因為正日個張影得超衰, 我尋日又焗過, 今次焗得好靚...)

好開心, 連家姐同姐夫都讚好味! 呢個蛋糕真係好無敵, 尋日整返奶奶到又整左個攞返去食, 佢地都好鐘意!

仲有仲有嗚謝阿茄係咁衝忙既短短lunch time都抽空上黎參加呢個派對, 仲有佢買的日本乜乜乜提子!

開完生日會就到我同家姐去尖沙咀 Shopping, 行到咁上下坐低食哈根DIE (肥死!)

途經海港城見到個天色勁靚, 真係好鐘意依家既天氣, 希望停留長啲啦, 唔想咁快好凍好凍!

夜晚收埋間屋仔都花左我一段時間, 摺極都摺唔好 (有摺過車擋既朋友應該明白我講乜!) , 我心裡不斷同神救求 , 主啊! 希望你賜我智慧快啲摺好間屋啦!! (因為當時我勁眼訓)

感恩好快就摺好左, 終於搵到個秘訣!!! 哈~  我覺得好開心既係, 主連咁小既事都會為我解決... 愛死祢!

LG 好生活

適逢為LG寫開"好生活", 順勢上去佢地個網站睇睇呢排有咩function攪緊?

見到佢地依家有個活動, 就係可以tag 相上去, 再加上你認為好生活既字句,

之後會公開俾人投票, 最後贏取的話, 有機會得到LG產品或登上LG廣告.

我見都幾得意, 所以攞左承熹幅相參加左!

 

如果大家有時間, 麻煩去投承熹一票啊!!!

http://www.lghklifesgood.com/?pid=1920

麻煩晒!!!!

 

 

如果大家都有興趣參加, 都可以到以下網址!

http://www.lghklifesgood.com/