親親妹妹

尋日又同家姐(大少奶) 成班人上去烏吱屋企探芝士餅!

除左芝士餅係主角外, 承熹都係受囑目既一位小朋友 (哈, 芝士餅係小baby, 所以成日訓訓訓, 承熹就成為大家既玩弄對象)

芝士餅好好訓, 我地成班係到傾計嘈到好似街市咁都唔醒... hahaaaa

小baby即係小baby, 初生BB最乖就係訓飽就食, 食飽就訓 

承熹唔知點解見到芝士餅訓係床仔到就不停眼金金咁望住佢, 佢係望到眼都唔眨, 直程想衝埋佢咁. 唔知佢眼中既芝士餅係啲乜呢? 一個公仔? 定佢認得出係自己friend, 好想同佢溝通溝通? 哈

全晚高潮位, 趁芝士餅醒左食奶, 好想安排佢同承熹影張相. 而且承熹好肉緊, 一見到芝士餅就想伸手摸佢, 就算捉住佢雙手, 佢都好大力反抗, 誓要摸到芝士餅為止 (係混亂過程中唔小心都打到芝士餅妹妹一下, 真係唔好意思啊!!!!)

佢唔止好想摸妹妹, 我一抱承熹埋芝士餅身邊講: 親親妹妹啦! 承熹個頭仔就會立即挨埋落芝士餅到... 咁難得既場面, 各位auntie即時好驚訝地想影低呢一幕

如是者, 我再叫承熹親親妹妹啊!(叫左三四次) 承熹都一樣好溫柔咁挨落妹妹到, 真係好似知自己係哥哥, 要錫妹妹咁..  場面真係好溫馨!

佢最抵錫就係我食住個勢叫佢親親姨媽 (大少奶), 佢居然都會將個頭挨埋去! 冧到姨媽話條老命都肯俾埋你.. 哈哈!

但之後再叫佢親親媽咪佢就彩我都傻! 如果承熹真係咁生性, 咁識得愛錫細佬妹就好啦, 我真係老懷安慰~

承熹訓好左兩晚後, 最近呢兩日半夜又有喊醒既現象!! 都唔明點解?? 牙仔都爆左出黎, 又唔係太熱太凍, 又唔係肚餓 (因為我一起身拍下佢, 佢又即刻訓返), 咁究竟點解成日都要喊呢????