又係時候報導下承熹既近況
承熹就快又九個月大, 真係....... 大家都估到我想講乜!
依家既佢好似狗仔咁, 周圍爬, 你行到邊佢行到邊, 最勁係佢既精力係永遠都用唔盡
你個頭將佢抱返去原點, 佢即時又爬過, 再捉佢返原點, 又爬過, 如是者來回五六次佢依然好樂意咁爬爬爬, 但我地做大人既已經無佢咁好氣!
有時佢爬我都唔理得咁多, 只要唔危險都OK (真係好彩有工人姐姐日日抺屋拖地, 否則要我做埋佢個份, 我會打柴!)
承熹好多時好鐘意爬去廚房搵姐姐, 所以我地終於'的起心肝'去買個圍欄返黎欄住佢, 費事有咩意外發生就唔好!
個欄係B&M買, 會員價405, 再有$80現金回贈買野!
有左個欄好好多, 起碼佢向住廚房方向爬我都唔洗即時去捉佢, 佢有時會好似啲示威人士咁狂搖個鐵欄, 我都驚有日俾佢整爛~
仲有就係, 承熹上顎兩隻門牙已經出晒黎啦, 好快就會見得好清楚,, 哈! 每次睇返承熹啲舊相, 最大分別就係佢啲頭髮, 由又少又短, 到依家濃密左 (雖然仍然唔多), 同埋佢啲牙仔, 係成長過程中最大既見証
今朝訓醒的承熹, 個樣好精靈咁!
承熹朝早起身見到我就好似執金咁開心
我一起身見到佢對住我笑, 我都好開心! 哈~
個嗅豬食手指都食到咁招積!
尋晚第一次加七星茶落啲奶到俾承熹飲, 唔知咁啱得咁橋定真係有用, 佢尋晚無醒過, 一晚訓天光, 今日又去左兩次poo poo.
今日就算訓晏覺都好合作, 無扭計, 自己玩玩下就訓著! 希望真係有啲用啦, 起碼幫佢去緊啲風, 好訓啲!
朋友好耐之前送左部'士的車'俾我地, 之前用過一次, 感覺好似好兒嬉, 用開大車仔轉用佢, 成日都驚佢會甩轆. 每次同別人既BB車迎面而撞時, 就會覺得自己好似好刻薄個仔咁, 俾架咁兒嬉既車仔佢坐. 哈哈哈 (講笑姐)
不過話說回頭, 呢個車真係超輕超方便, 我一手抱住承熹, 一手攞車都無問題, 所以都係要向現實低頭, 去屋企附近既商場都會用呢架車, 唔洗下下都咁重!
部車仔唯一唔好處係唔可以打平訓, 呢個角度已經係最低, 所以如果去長途旅行都係大車好啲, 起碼承熹會訓得舒服啲!
下次d 相應該會見到牙仔了....:D
回覆刪除[版主回覆11/03/2010 00:50:00]希望見到上面個兩隻啦, 哈!
BB既氣力真係用不完....我呢頭足完呢個....另一個又黎....真係無佢地咁好氣力....heehee
回覆刪除[版主回覆11/05/2010 00:34:00]你有兩個, 精力都要double付出,, 哈哈!
係呀...我又係有多部輕巧D既車..我一個人都可以連人帶車一齊抬上落樓梯, 如果大車, 2個人都吃力, 又係瞓覺果個問題, 我都覺咁樣令BB瞓得無咁舒服.
回覆刪除我家希又好似承熹咁, 鐘意咁樣啜手指, 真係好招積, 哈哈
[版主回覆11/05/2010 00:34:00]係啊, 你講既正係我既心聲.... 大車真係兩個人攞都重, 但BB又會訓得舒服好多, 真係難取捨!
我想同佢戒食手指, 有冇咩好方法?
BB真係好可愛好靚仔啊
回覆刪除似哂媽媽,哈哈
[版主回覆11/05/2010 00:35:00]哈, 多謝你!
哈..承熹真係夠晒活躍呀..
回覆刪除[版主回覆11/05/2010 00:35:00]佢真係無時停
承熹
回覆刪除姨媽好掛住你呀！我無見你成十幾個鐘喇
你琴日實在迷暈我啦
愛你姨媽上
P.s丫！呀妹，唔好意思4漏左同你打招呼添！哈哈
[版主回覆11/05/2010 00:35:00]承熹未識打字覆你, 你等多幾年啦!
P.S. 家姐, 唔緊要... 你仲記得我呢個妹我已經好開心! 哈哈
part time 工人?
回覆刪除[版主回覆11/05/2010 11:49:00]no, full time!
食指呀~~ 我初初都有好似你咁諗...點可以令佢戒,後來得知我個FD 個囡, 之前又係咁, 日日都食手指, 但而家大左 (1 age) 就無再點食, 我問番佢地倆公婆, 佢地話, 到咁上下佢就唔會食喎....
回覆刪除七星茶?! 同開奶茶又有咩分別架？等我睇下先，我阿囡又係瞓得唔係幾好...成日4:00幾就喊2聲，醒一醒咁...不過一抱一手就會瞓返...但日日係咁...都唔係辦法﹗
回覆刪除