采霖出牙啦!

之前大少趁我同承熹返左教會後, 花左少少時間同妹妹影相

睇返之前承熹啲相, 的確比起妹妹多好多...

其實我地唔係偏心唔幫妹妹影, 只係妹妹比起哥哥懶訓好多

加上好殘酷既事實係,,, 有個哥哥係到, 我地當然無可能好似照顧獨生女咁全部時間俾晒佢

但無論點都好, 我地都好錫呢個妹豬仔! 因為事實上妹妹真係好乖好抵錫~

 

 

妹妹依家七個月大, 今日摸到佢出左一隻牙仔, 係下面既門牙..

同哥哥一樣都係七個月出第一隻牙. 有少少唔同既係哥哥三個月起已經流好多好多口水, 但妹妹唔算多, 而且無哥哥咁鐘意放野入口咬.

見住兩隻小鬼雖然都係從我而出, 但兩個有唔同性格, 唔同表現, 感覺好得意!

希望佢地將來無論點, 都有一顆純潔既心, 做個正直既人~