2012 BB展血拼分享

一年一度大型BB展又到啦!

自從生左BB之後, 年年都有去, 但感覺BB展賣既價錢一年比一年唔抵, 有時真係唔想去

但基於'驚蝕抵'同埋要訂奶粉既緣故, 我仍然會去, 哈!

眨下眼又一年, 記得上年大住個肚, 乜都無準備, 剩係排隊買飛入場都排左成個幾鐘, 最後要大少請半日假黎接我走 >_<

乜解究咁快又一年???

今年BB展又有新攪作, 以往一搬攪星期五至日, 今年多左一日星期四, 叫做VIP日! 

何謂VIP? 好簡單, 只要俾多少少錢買VIP日門券就OK!

不過我都鐘意佢呢個安排, 可能要上網買VIP飛, 變左少左好多好多大陸客, 行得舒服好多

一行三人, 我, 烏吱同甜甜, 衝呀!!!!!!


我今年多左個target, 就係搵能恩個Booth,, 哈哈哈!


見到咁大個承熹好興奮, 我呢個阿媽又發仔瘟, 不停影影影!


由下午三點行到大概八點, 我地既戰利品!!! 仲有幾箱奶粉等送貨... 超出預算, 仲諗住無乜野買, 點知個個買到山窮水盡, 無晒Cash!


呢堆係我既成績, 有部份係幫朋友買..

其實你問係咪真係好抵? 我唔夠擔話係, 不過會平少少或者有其他野送... 一年一次, 入去當睇下有乜特別新玩意都好!

介紹下我覺得抵買既野啦~


顏色筆套裝 ($150) -- 呢隻牌子既顏色筆係用峰蠟做, 小朋友唔小心放入口都唔怕, 而且用既時候無粉沫飛出, 唔怕整污糟對手

承熹今年開始返幼稚園, 買定一套俾佢返學用


Baby Body Support - $200

兩隻小鬼要兩個Car seat, 承熹用緊個隻係9M-4Y, 未啱妹妹用, 人地俾左個0-12M既car seat我, 但對妹妹黎講又迫得滯, 所以決定買呢個body support放係哥哥依家個carseat俾妹妹坐, 另外左買個大歲數用既carseat俾承熹


Jack N' Jill 牙膏 $52
好多人都話好, 澳洲出產, 價錢合理(出面賣好似6x), 可吞食, 出面長期斷貨, 個日係會展都好多人搶購
買三枝牙膏可以半價換購BB牙擦($30, 上面個枝), 啱未出牙仔既BB用

Biolane液體爽身粉 $62
出汗防敏感cream, 擦上身推開變粉狀, 正價賣$12x, 第一次買呢個牌子, 試下好唔好用! 佢啲沖涼液2in1, 由$170減至$110, 都好抵買~


Comfi透氣枕 & BB車墊 (多買多折, 我地幾個人加埋買多過三樣有62折, 枕頭$149, 車墊$170)

呢個牌子係出面好少見有得買, 承熹頭一年出世我已經用佢, 好好用!


甜甜同烏吱介紹, 3M慳水水龍頭 ($190兩個)

返黎試左真係幾好, 除左慳水, 佢個開關係位於出水處, 你用手背按一按就得, 唔洗用手去掂個開關.  有時對手污糟, 醃完餸或成手泡就可以用手背開關水

性教育書, 一套四本$50
自承熹問過我點解媽媽無啫啫, 承熹有? 我都開始有啲擔心佢再問深入啲既問題我唔識答, 所以呢套書好好, 啲圖畫簡單但又清晰講明男女有別, 推介!

孩子100個SEX Q&A $30
未知有無用, 但買定先, 遲啲越黎越多呢啲'我係邊到黎?', '點解媽媽會流血?' 等問題都知點答

Mr. Men Little Miss 一套十本 送一本特別版 $100
朋友介紹過呢套書唔錯, 有十個唔同Mr. Emotion e.g. Mr. Happy, Miss. Angry etc.
用人物方法介紹人類常有既情感, 從中教小朋友應該點處理呢啲感覺, 唔好亂發脾氣, 唔好遲到, 要有信用等...


濕紙巾套, 有魔術貼可以掛係車或BB車上, 方便攞濕紙巾 ($50兩個)


儲奶袋, 90個250ML, 韓國製, $178
幫朋友買, 唔知好唔好, 但韓國出產應該OK

其他濕濕碎碎都買左一堆...哈!

另外雪印奶粉
1號做緊$175一罐, 3號思敏傑 $150一罐
買滿一箱有百佳$50禮券/兩箱有$50禮券+Vtech BB電腦/三箱$100禮券+Vtech
我每次都會訂一兩箱, 就算唔係平好多, 但至少唔洗成日落街買


最後最後我最大既收獲係.....

登登登登......


承熹扇仔一把..哈哈哈


好好KEEP住做紀念!

溫馨提示:
有心買野記得帶夠錢, 好多都唔收咭/EPS
帶定個好孭既特大環保袋/喼
最好唔好同老公去, 約埋啲媽媽去會好啲, 始終男人無耐性行咁耐同人迫, 又唔會真正明白BB需要, shopping始終都係女人強項, 哈哈哈

報告完畢!