開學了

上星期二21/8承熹開始返幼兒班啦~

頭一個星期係適應班,只係返45mins, 有家長倍, 之後兩日就無家長倍

到左今個星期, 加至1.5小時, 後幾日加延長至2.5小時

到下星期就會正式返三小時

第一日著校服孭書包返學, 感覺有啲緊張, 加上我唔俾佢帶佢把'命根傘' (自從買左把傘俾佢後, 佢晴天雨天都要帶傘出街, 唔俾佢帶就喊死!)


排隊等入校園時個樣好明顯有啲緊張



好感恩係承熹返學前戒左食手指呢個壞習慣~

初初仲怕佢唔知會食到幾多歲先戒得甩, 又怕佢返左學無人成日睇住佢, 好容易因為食手指而感染病菌

但神所賜既往往係比我預期的更多...

就係因為上幾個星期胃腸炎, 又嘔又疴, 食藥打針令到承熹真係知道食手指既祸害甚大, 

就係咁, 佢唔洗我又打又殺就戒左食手指, 有時見佢心癮想食, 但知唔食得, 頂多放隻手係咀邊摸下摸下! (我已經覺得佢好叻啦~)


原本都有少少緊張, 但見到一啲新奇既事物, 又即時開心晒~


第一日返學, 輕輕鬆鬆鄧梓峰

Day 2

第二日已經無前一日咁緊張, 加埋俾佢攞返佢把'命根傘', 成個人精靈晒~


一攞住把傘幾招積


又放學了!


承熹呢個阿婆擔傘造型, 全校得佢一個, 個個老師, 清潔姐姐都認得佢, 一係室外就開傘, 驚死曬親咁!

Day 3

好開心聽到承熹話好鐘意返學


Day 4


運動look! 

無錯, 基本上除左第一日返學我堅決唔俾佢帶傘後, 佢夜晚挨左我成晚, 叫我第二日俾佢帶傘!!!!

我就心軟了...既然一把傘可以令佢成個人開心, 等同佢既buddy, 我無理由咁殘忍唔俾攞, 所以之後每一日佢都有攞住佢把'命根傘'返學



回顧返呢兩星期, 好感恩承熹獨自返學都算OK, 無喊過, 我倍佢返個兩日都睇得出佢好快可以投入而且享受

反而我坐係後面見到自己個仔原來真係可以咁獨立去上學, 我好大感觸!!!!  承熹真係大個仔了, 以前BB既片段一一湧上心頭, 攪到我都忍唔住眼濕濕~