Miele蒸爐用後分享

講開啱啱個Party, 我真係要介紹下Miele蒸爐俾鐘意招呼朋友返屋企食飯既你

我自己本身好鐘意招呼朋友去我到食飯或開party, 因為係自己屋企玩, 總覺得舒服啲, 尤其依家有左小朋友, 更加適合

話晒屋企本身都乾淨過出面餐廳, 玩具又齊全, 啲小朋友走黎走去都唔怕危險

今次第一次用蒸爐幫手煮食,首先最幫得手既就係幫我煮左八嘜米

我自己屋企本身個飯煲仔係3-4人份量, 每次一多過四個人黎食飯都要煮兩轉, 依家有左Miele幫手, 煮到咁多飯不特止, 仲要係20-25分鐘就攪掂, 勁快!

另一個好處就係蒸出黎既飯比較均勻, 唔會係飯心軟, 飲底硬!! 如果想要炒飯既效果, 可以好似我今次咁, 加少啲水, 就做到隔夜飯效果, 真係一粒粒咁

當日我跟May Fung 馮美基小姐既新書食譜, 做左個超級重量荷葉飯, 係我第一次整荷葉飯, 原來唔係我想像中咁難整

不過預備功夫就多少少步驟

要準備:
雞肉, 蝦肉, 蟹肉, 瑤柱, 冬菇, 芥蘭莖, 全部切粒(瑤柱除外)
落油待熱爆香以上材料盛起備用, 再燒熱油放隔夜飯兜下, 中間開個圓位倒蛋汁落去炒至半熟再兜勻啲飯
加埋所有材料入去炒, 最後加調味料 (糖, 蠔油, 雞粉/雞汁, 胡椒粉少許) , 視乎你兜飯有幾多自己較味

荷葉可新鮮或乾荷葉, 煲一獲水泵一泵水抹乾放係大碗/兜備用


個飯底我下午就炒好, 到夜晚要食既時間先放啲飯落荷葉到

跟住包好就可以攞去蒸20mins



好香荷葉味, 無諗過自己都整到我最愛既荷葉飯! 

同場加蒸....

二十隻扇貝... 如果無個蒸爐, 我又係要分兩轉蒸, 依家一次過攪掂

唯一美中不足係我啲粉絲可能浸得唔夠淋, 有啲乾! (因為魚檔姨姨教我蒸扇貝六分鐘便可, 我唔敢蒸太耐)

每次用蒸爐最多都可以蒸三樣野, 為左減少工作量, 我今次放棄炒雜菜, 改蒜蓉咸蛋蒸勝瓜, 清清地好好食, 啲精髓其實係啲咸蛋黃到

將蒜蓉粉加油, 連同咸蛋白同勝瓜撈勻, 平鋪係碟, 咸蛋黃放面蒸8-10分鐘(視乎你喜愛勝瓜口感淋定硬身)
 
最後蒸好後將啲咸蛋黃壓蓉, 加入麻油撈勻, 再放上勝瓜上, 夾住一齊食, 好好味架!

 

就係多得Miele蒸爐, 幫我慳左好多時間可以做其他野, 而且我係第一次唔會煮到身水身汗, 因為唔係用明火蒸野, 廚房既熱力相對減低(蒸爐本身唔會有熱氣排出)

所以我覺得真係好好用, 連我奶奶黎煮幾次飯都話有左個蒸爐真係慳返啲時間, 唔洗次次炒完菜仲要等條魚熟左先食得飯喎!

值得推介!!!!!!