拍拖週年紀念日

尋日係我同大少既拍拖週年紀念日 ... 數數手指 -- 6年了!

但感覺好似一齊唔係好耐, 我仲停留自己仲係廿幾歲既時候.... 哈~

話就話拍拖週年紀念, 其實都無乜特別, 因為就算唔係咩紀念日, 都會出去食餐飯, 又要湊住兩隻野

原本book左係天后Oyster 18食西餐, 但去到發覺隔離呢間"榤"好似吸引啲, 而且承熹都愛食壽司, 所以都係揀左呢間


天后清風街12號

鋪頭唔大, 只有四五張枱加Bar 枱

其實帶住兩個咁細既小朋友去食飯有時都幾麻煩, 因為有啲餐廳未必歡迎帶小朋友

就算人地唔介意, 我地都怕左承熹, 佢依家最鐘意高聲歌唱, 仲要'懶'係有節奏咁, 越叫佢細聲就大聲

阿妹又係, 有時都會尖叫... 如果我係其他客人, 雖然明白小朋友控制唔到, 但都真係幾騷擾

 

承熹一個人KO左一客加州卷

呢間日本餐廳啲食物唔差, 但又未至於好好食... 不過呢個刺身拼盤就真係好新鮮, 有八款, $580 only... 讚!

和牛鵝肝膺皮天婦羅 (店主推介), 我地覺得OK啦

海鮮墨汁喬麥麵, 一般!

仲有其他普通食物無影...

*******************************************************************************************************************************************************

原本心情都幾好, 食完個刺身都覺得無揀錯餐廳... 但最後都係爛尾收場 >_<

我地八點order食物, 八點半先有第一客加州卷, 跟住九點先有份刺身(一心諗住刺身食完啲熱食會一次過黎),

之後又等等等...等到九點半先有天婦羅... (咁啱我有影低啲相, 所以睇得返啲時間)

然後又呆等等等等等...  每樣食物都要等成半個鐘以上...

妹妹本身好乖訓左覺, 我仲諗可以安安落落食餐飯

點知去到九點九都未黎晒啲食物, 阿妹就醒左!

最嬲係, 我地去到都知佢地多數做熟客, 因為每枱都好似同啲侍應好熟咁, 但無諗過侍遇爭咁遠!!!

遲過我地黎既客人既食物就好快咁上, 我地個啲就一等再等...

妹妹十點要飲奶, 一心諗住八點食飯, 十點乜都食完返屋企

但十點仲係到等緊..... 真係好激氣!

雖然呢餐飯食到我地大少都無晒癮, 如果係以前, 我一定會俾呢啲負面情緒一直影響成晚

但依家既我識得自我舒緩, 同自己講唔好俾其他無謂人/事影響自己既心情

無謂為左一餐飯令到我打後既時間都唔高興, 好唔值呢~

最後又好快無事lu.... 哈哈

希望承熹同采霖比我更醒目, 早啲明白呢啲道, 做個EQ高既人, 做個開心快活人~