雜炒

妹妹的百日宴原本係母親節個星期日要擺, 但因為撞啱母親節, 我相信大部份人都應該唔會得閒黎, 所以改左今個星期

今次我無訂到Backdrop (承熹當年既backdrop), 因為實在覺得好浪費, 用完就掉, 都係唔製咁嘥錢! (我啱啱先睇返承熹當時百日宴篇blog, 有人問我個backdrop幾時, 大約二千幾蚊)

所以今次我就咁訂左個細Banner同埋訂左一啲汽球返黎自己做一啲簡單既decoration

希望一切順利, 唔好太醜怪啦! (過兩日同大家分享)


妹妹之前既飲奶時間係 8/12/4/8/11, 我唔想佢食少餐, 但又唔想佢太夜訓, 所以最後餐奶我會早一個鐘俾, 佢食到幾多就幾多

其他時間大約四個鐘食五至六安 (有時可以飲晒, 有時剩少少)

但最近我發覺佢夜晚個轉可以訓到十二個鐘, 所以我就試左幾日俾佢食完夜晚八點或拖到八點半餐奶, 玩一陣, 九點半到入房訓, 訓到第二日大約八點

好多時都聽人講訓緊要過食, 訓得多會長肉, 其實係咪真架?

妹妹平均每日訓18-20個鐘, 真係超級懶訓豬, 但我又唔覺佢好長肉, 反而依家改左一日四餐, 我都有少少擔心對於一個三個月大既小BB, 會唔會飲得太少奶呢?

麻煩有經驗媽媽分享一下呢個問題? 我應該由得佢, 定係好似以前咁十一點再補多枝?

承熹依家大個左, 好多野無以前BB時咁麻煩, 所以去街我多數都會帶埋佢去, 但先決條件我會迫佢自己行, 唔會抱, 一抱我就話返屋企, 佢依家都算合作

依家住緊呢個屋苑落吉之島或太古城都要坐小巴, 初初搬黎時承熹仲要大人抱實, 依家佢自己坐, 識得扶實手抦, 仲扶得好穩

見到佢日日長大, 有時好自私咁諗唔想佢大得咁快!

約左朋友食LUNCH, 朋友們出去學整麵包超人及細菌小子馬卡龍, 特意留左一對俾承熹, 好得意啊!

承熹見到好開心, 但亦都好狠心, 一啖就食落去, 哈!

仔啊, 你可唔可以留住呢份童真耐啲再耐啲啊!

又強吻妹妹

 
妹妹比起哥哥懶訓, 哥哥以前訓覺好少打轉, 阿妹就會!